Hulanda ta manda mas experto pa sostene ehecucion di Landspaket na Aruba

ORANJESTAD - Gobierno hulandes ta aumenta apoyo na Aruba cu personal extra y experto specialisa pa yuda cu ehecucion di e reformanan di Landspaket. Esaki ta sali na cla den e mas reciente Uitvoeringsagenda y Uitvoeringsrapportage 2026 entre Aruba y Hulanda.

Segun e informe, Aruba ta enfrenta falta di capacidad riba varios proyecto di reforma. P’esey Hulanda a envia apoyo adicional riba tereno manera maneho di personal, economia, casino, salud y ICT.

Entre otro, O&P Rijk ta yuda Aruba cu modernisacion di politica di personal y desaroyo di instrumento nobo di HRM. Tambe a nombra un coordinador pa Autoridad di Casino y un program manager pa economia. Ademas, un experto lo brinda apoyo temporal riba tema di “carrying capacity”, tocante cuanto desaroyo y turismo Aruba por carga.

Den sector di salud, ta trahando riba expancion di Zorgakkoord y creacion di un instituto di calidad pa mehora cuido medico y mantene esaki pagabel. Pa esey tambe lo tin un project manager specialisa.

Na mes momento, Hulanda su participacion den ICT ta crece. Aruba ta desarroya un ICT Shared Service Organisation central pa gobierno, cu lo coordina servicio digital, innovacion tecnologico y modernisacion di ICT. E meta ta pa e structura ta completamente operativo pa principio di 2028.