Rekenkamer: Aruba ta informa Hulanda mihor cu su mes Parlamento

ORANJESTAD – Algemene Rekenkamer di Aruba a conclui cu gobierno, den ciertonan caso, ta rindi cuenta mihor na financieronan Hulandes y Europeo cu na Staten di Aruba mes. Segun Rekenkamer, financieronan externo ta ricibi raportahe structural tocante fondonan di presupuesto, mientras cu e informacion ey no ta wordo comparti automaticamente cu Parlamento.

E descubrimento ta den e raport “Buiten beeld, buiten controle”, publica diabierna, unda cu Rekenkamer ta investiga maneho di fondonan di presupuesto di Pais Aruba. Ta trata di fondonan unda placa di gobierno ta wordo maneha apart pa obhetivonan specifico, manera turismo, combate di criminalidad y problematica di migracion.

Segun Rekenkamer, pa fondonan cu financiamiento Hulandes of Europeo, hopi biaha tin condicionnan severo di rendicion di cuenta. Den practica, mayoria di biaha ta cumpli cu e obligacionnan ey. Pero, e mesun raportahe no ta wordo presenta structuralmente na Staten.

Rekenkamer ta yama esaki “administrativamente incorrecto” y ta indica cu e forma di trabou aki ta contra articulo V.19 di Staatsregeling di Aruba. Segun e raport, esaki tambe ta debilitando e tarea di control di Parlamento.

Segun e raport, como consecuencia di esaki, Staten no ta dispone di e bista completo, confiabel y na tempo cu nan mester pa ehecuta nan derecho presupuestario adecuadamente. Rekenkamer incluso ta papia di un situacion unda cu e derecho presupuestario di Staten ta wordo “vacia poco a poco”.

Rekenkamer ta indica cu fondonan di presupuesto, den practica, ta funciona largamente afo di bista di Parlamento debi na falta di presupuestonan, cuenta anual atrasa y rendicion di cuenta deficiente. Como resultado, flujo financiero substancial ta sali afo di control parlamentario efectivo.

Den e raport tambe ta señala falta di un marco general di politica pa fondonan di presupuesto. Como consecuencia, supervision, governance y administracion financiero ta varia hopi pa cada fondo, y segun Rekenkamer no tin un bista financiero total completo y confiabel.

Algemene Rekenkamer ta alerta cu eficiencia nunca mester ta un motibo pa limita supervision of suministro di informacion na Staten. “Eficiencia no mag bay na costo di transparencia y supervision”, Rekenkamer a scirbi.

Gobierno a reconoce den su reaccion cu suministro di informacion na Staten mester wordo mehora y a indica cu ta trahando riba reformanan dentro di maneho financiero di Pais Aruba.