Analisis: Neutralidad, critica y gobierno: E rol incomodo pero necesario di periodismo

Scirbi pa Tito Laclé

Manera por a spera, e analisis di ayera, a crea un ola di reaccion. Bon y malo. Y cu esey mi ta refiriendo na e comentarionan cu tabata sea positivo of negativo pa loke ta e contenido di e analisis. Y esey ta OK. E ta parti di cualkier analisis. E reaccion. Pero, mi ta laga tur esey pa loke e ta. Reaccion. Reaccion ta bon pasobra  ora un analisis crea reaccion, e la toca un persona, sea bon of malo. Y esey ta e meta. Crea un chispa di combersacion, y debate entre nos, pa mantene nos bibo y skerpi. Si bo ta kere cu bo ta bay scirbi algo y kere cu bo por sirbi tur Dios, bo ta hopi robez. Y mi ta conciente di esey.

Mi punto ta cu , ora un  analista (of un periodista) toca un tema politico of social sensitivo, semper lo bin reaccion. Specialmente den un comunidad chikito manera Aruba, unda hopi biaha e liña entre politica, emocion y experiencia personal ta hopi fini. Pero e existencia di reaccion, positivo of negativo, no ta algo malo.At all.  Al contrario!. Manera mi a bisa caba, e ta mustra cu ainda tin interes pa discuti riba e direccion, riba gobernacion y riba e realidad social di nos isla.

EXISTENCIA DI PERIODISMO

Periodismo no ta existi pa confirma loke hende kier tende. NO. Mi ta bisa esey constantemente. E rol principal di periodismo, ta pa observa, cuestiona, analisa y pone desaroyonan publico den perspectiva. Esey no ta nifica cu tur critica ta un atake, ni cu tur observacion critico automaticamente ta señal di parcialidad, aunke hopi kier y ta wak e asina si. 

Den e reaccionnan cu a sigui e analisis anterior, algun lector a menciona cu no tabatin suficiente atencion pa e cosnan positivo cu gobierno actual a logra. Y si. Ta correcto pa bisa cu tin diferente iniciativa cu a yuda PARTI di pueblo: apoyo adicional pa pensionadonan, mehoracion den barrio, y otro medidanan concreto. Esakinan ta realidadnan cu merece wordo reconoci.

Pero na e mesun tempo, e pregunta cu un analista tin derecho di haci, ta si algun di e accionnan ey ta parti di un vision structural pa futuro, of si nan ta principalmente instrumento politico pa mantene apoyo publico. Esey ta un pregunta legitimo den cualkier democracia.

Tin un tendencia moderno unda gobernacion eficiente ta bira noticia extraordinario, simplemente pasobra pueblo a cuminsa custumbra na e funcionamento deficiente. Y talvez esey ta un di e preocupacionnan mas grandi: no solamente kico ta wordo haci, pero tambe con nos a baha nos expectativa di gobernacion. 

GOBIERNO ACTUAL 

Pa loke ta e gobierno actual, si berdad nan ta haci cosnan bon tambe, manera e analisis a mustra. Nan tin nan curason na e lugar corecto (mayoria di nan). Sinembargo un gobierno mester goberna cu atencion pa soluciona e problemanan di awe, y mira padilanti pa evita problemanan den futuro. Aruba tin un lista di  problema cu actualmente ta menasa su progreso social, turistico, economico, trafico y ambiental cu merece di atencion urgente tambe y cu transparencia, pa asina pueblo sa kiko ta haciendo al respecto. Esey tambe ta periodismo. 

Periodismo no tin como meta principal tampoco pa elogia gobernantenan. No. Si un gobierno logra resultadonan positivo, e resultado mes lo papia pa su mes. Sin cu e periodista tin cu haci esey.  Rol di prensa no ta propaganda, pero tampoco destruccion. E mester, prome cu tur cos, keda independiente y alerta.

Neutralidad absoluto probablemente no ta existi. Tur hende ta mira realidad for di su propio experiencia y criterio. Pero tin un diferencia grandi entre tin un punto di bista, y perde honestidad intelectual. Credibilidad di un periodista no ta wordo midi door di cuanto hende ta satisfecho cu su analisis, sino den su capacidad pa sigui haci preguntanan cu por ta incomodo, hasta ora cu e no ta haci’e popular.

Y keremi. E analisisnan lo sigui bin. Di algun,  lectornan lo ta di acuerdo cu nan, otro no. Y esey ta OK. Pero si nan djis  logra pone mas hende pensa, discuti y reflexiona riba rumbo di Aruba, nan ya caba ta cumpli cu un funcion importante. Pasobra un pais no ta avansa door di silencio. No. E ta avansa juist door di conciencia, confrontacion honesto (di buena fe), y e boluntad pa sigui haci nos mes e preguntanan dificil.

Y POR ULTIMO

Loke mi ta haci cu e analisis tambe, no ta solamente expone, of critica (of elogia), sino tambe semper, duna un possible solucion, y un punto di bista, cu por ta, por genera un otro tipo di combersacion despues. Ningun hende ta perfecto. Pero cu e analisnan, lo mi sigui haci loke por pa yuda contribui pa hiba e dushi barranca aki cu yama Aruba, dilanti. C’est la Vie