Na Corsou, señora ataca pa cacho pitbull lo keda invalido!

WILLEMSTAD - Tur kos ta indiká ku e señora víktima den e kaso di atake feros di dos kachó estilo pitbull lo keda inválido pa semper, esei pa motibu ku dor dje mordénan ya e no por usa su mannan normal manera mester ta i awe dos aña despues di e insidente ainda el a keda ku doló na diferente parti di su kurpa. Pero wes a dikta un sentensia ku ta dun’é un sierto montante komo kompensashon pa e daño ku el a sufri. E lo tin di risibí mas ku 22 mil florin pa e daño material i no material, emoshonal ku el a sufri.

T’asina ku ayera mainta a trata e kaso akí ku a surgi dia 11 di ougùstùs 2023. Riba e dia ei sra. Jaqueline Hamilton a ser ataká di forma feros dor di dos kachó paresido na pitbull (‘pitbullachtig’) den Kaya Prononia. Despues ku el a kaba di hasi trabounan doméstiko den bisindario el a pasa i dos dje kachónan a sali for di kura i atak’é. Segun rapòrt di CMC el a haña komo 40 mordé ku a varia for di den kara, pechu, brasa, barika i pianan. E doño dje kachónan a sali sí pa trata di kita e animalnan, pero e no por a kontrolá nan.

Durante tratamentu dje kaso ayera mainta, wes a hiba un kòmbersashon ku e víktima den sala i esaki a deklará i demostrá den korte tambe ku p.e. un man i un brasa ya no tin e mobilidat kustumbrá. Ainda e ta sinti doló den pechu, tras di su orea i den brasa. Su pianan tambe ta hasi doló konstantemente i p’esei e ta hañando yudansa boluntario di un konosí ku ta bai tur kaminda ku mester, aunke e ta pag’é algu pa su gasolin. I pa su situashon dòkter a preskribí remedi.

Komo konsekuensia di e atake di kachó aki i komo ku el a keda hopi tempu sin por traha, sra. Hamilton a bin pèrdè su trabou na Crefona, pero pa motibu di su falta di mobilidat e no por hasi trabou di kas mas tampoko.

Tambe a bini dilanti den e kaso ku algun luna despues di e insidente a kuminsá ku un trayekto di mediashon pa wak te kon leu e doño ta dispuesto pa kompensá e víktima pa e daño ku el a sufri. Den e proseso akí a yega na un akuerdo ku e doño, sra. Elena C., lo a paga un suma di Xcg. 500 pa luna, pero bou dje kondishon ku nada lo no sali den prensa. Komo ku el a mira algu a sali publiká den prensa, el a stòp di paga. E doño a duna di konosé ku e tambe a pèrdè trabou komo resultado dje insidente akí, aunke EXTRA a komprendé ku e tin trabou.

Den e mesun trayekto di mediashon akí sra. Hamilton mester a haña yudansa di otro instansianan den forma di pakete di kuminda ya ku e no ta traha mas. Awendia e tin di konformá su mes ku Xcg. 200 di ònderstant kada dos siman. Echo ta ku e señora akí lo keda inválido pa bida. NOTA: Texto ta scirbi den papiamento fonetico di Corsou.