Oduber(PPA): No por descarta loke pueblo a vota p’e den e eleccion ultimo aki!

Oduber(PPA): No por descarta loke pueblo a vota p’e den e eleccion ultimo aki!

Posted on 12/10/2024 4:46 pm AST | Updated on 12/10/2024 4:47 pm AST

ORANJESTAD – No por descarta loke pueblo a vota p’e. Tabata mensahe di lider di partido PPA Otmar Oduber diamars atardi despues di su audiencia cu Gobernador di Aruba. Oduber tabata e ultimo di 4 lider politico invita pa trata e resultado di eleccion 2024 y con PPA ta mira esaki. Segun Oduber 11 mil persona a manda un mensahe cla cu nan kier cambio. E ta referi na e 7 mil y pico voto di partido FUTURO y 3 mil y pico di PPA cu a bisa cu nan kier un cambio y un partido cu tin un programa cla. Ademas, Oduber a bisa cu e ta dispuesto pa sostene un gobierno activamente si e wordo invita. 

KEN TA REPRESENTA PPA DEN PARLAMENTO

Ademas, riba su propio participacion, e decision lo cay awe nochi den partijraad, si ta Oduber mes ta esun cu ta drenta Parlamento dia 7 di januari 2025 of no, debi cu e tin un caso penal andando pa cual tin un sentencia dia 22 di januari 2025. E la declara na varios occasion cu si e sentencia ta cualkier otro cos cu absolucion, e lo no drenta Parlamento e ora. Pero si declare liber, manera cu e tin tur conviccion cu lo sosode, e mes lo representa PPA den Parlamento y lo ta manera un klier of carpata riba e otro parlamentarionan pa tene nan riba e promesa cu a haci na pueblo. Pues, awe nochi ta bira conoci ken ta representa PPA finalmente den Parlamento otro aña. 

  • Powered by SETAR