Aruba International Film Festival bek cu otro organisacion

ORANJESTAD: Despues di lunanan di negociacion, Aruba Tourism Authority a logra cera un acuerdo cu un organisacion nobo cu lo organisa e “Aruba International Film Festival”. Asina ATA a informa pa medio di un comunicado extenso. Segun e comunicado di ATA, e festival di cine lo tuma luga den e salanan di Caribbean Cinemas na Palm Beach Plaza for di 7 pa 11 di october. E organisacion nobo ta consisti di personahenan local conoci den e mundo di cine y turismo kende ta Aaron Hosé, Rebecca Roos y tambe Frits Israel.

FUNDADONAN

Manera ta conoci, A.T.A. for di aña 2010 te cu 2012 tabata e patrocinado principal di e festival di cine cu a trece diferente celebridadnan Aruba pa forma parti di e evento aki. Funda dor di organisadonan Jonathan Vieira y Giuseppe Cioccarelli, A.I.F.F. a bin cu ideanan inovativo y a posiciona Aruba como un “trend setter” na momento di organisa eventonan pa promove e isla como destinacion turistico. E cobertura obteni internacionalmente durante e festival aki na dado momento a surpasa 8 miyon dollar di e asina yama “PR Value” cual sigur ta un montante significante y tabata mas halto cu e meta cu a wordo poni inicialmente durante tur e añanan di e festival.

MIEMBRONAN DI COMISION NOBO

Aaron Hosé, kende ta e Director di Programming pa A.I.F.F., ta un productor, director, y editor Arubiano cu mas di 15 aña di experiencia den e mundo di film, television y produccion di video. Pa su documentarionan y serie di television na Merca el a wordo otorga cu tres premio y seis nominacion di Emmy Regional entre 2008 y 2014.

Rebecca Roos, kende ta e Directora di Industry Events pa A.I.F.F., ta un productor, y director Arubiano premia cu mas di dos decada di experiencia den e mundo di cine. Durante su carera, Roos a percura pa varios documentario, videonan corporativo y propagandanan internacional. Tambe e tin experiencia amplio den “cinema management”, distribucion di pelicula y organisacion di festival di cine.

Frits Israel, kende ta e Chief Financial Officer pa A.I.F.F., ta un persona cu hopi aña di experiencia den e mundo di turismo y sector comercial cual sigur ta un pilar fuerte pa cu un maneho eficas pa por tin e resultadonan desea pa e edicion aki di Aruba International Film Festival.

CONTRIBUCION

E festival a contribui na posiciona Aruba den e mundo di cine y a logra pa Aruba sali den publicacionnan importante manera The Hollywood Reporter, The Huffington Post, Empire Magazine, BBC Europe, y hasta a wordo nombra pa e Hollywood Foreign Press Association (HFPA, organisadornan di e prestigioso “Golden Globe Awards”) como e “must attend film event” den e region Caribense. Durante e ultimo añanan Aruba ta haciendo un bon trabou den relaciona su mes cu celebridadnan pa medio di diferente esfuersonan manera entre otro e participacion na e Aruba Super Bar na e Superbowl na Merca na 2014 y januari ultimo cu Aruba su participacion na e tan aclama Sundance Film Festival.

ADDICION

E festival di cine ta un adicion na e esfuersonan aki cu ta enfoca riba entre otro celebridadnan cu ta wordo considera como influenciadornan cu tin hopi siguido. Pero e evento ta mustra un Aruba tambe rico na atributonan y talentonan artistico! E tremendo cobertura y acceptacion cu e festival aki tawatin den tur mercado -pero specialmente esun di Latino America- tawata impresionante, poniendo Aruba den un luz diferente.

2012

Na final di aña 2012, A.T.A. despues di 3 aña a evalua e contract cu Aruba International Film Festival, y a dicidi di no continua cu e acuerdo debi na e situacion financiero causa dor di e combinacion di un “concert series” cu e festival di cine. No obstante esaki, mester subraya cu A.T.A. semper a kere den e concepto y a mira resultadonan positivo pa cu e nivel di cobertura durante añanan di e festival di cine.

2013

Na aña 2013, e festival a wordo organisa exitosamente cu financiamento priva y cu bista principal riba entre otro peliculanan di Latino America, Merca, Caribe y Aruba. E aspecto aki a haya un reaccion hopi positivo di esnan local y di prensa internacional. Pa cu e edicion di 2015, a keda acorda cu e organisacion nobo bao e maneho di Hosé, Roos y Israel lo enfoca solamente riba e mesun elementonan exitoso di aña 2013, pa asina duna A.I.F.F. e oportunidad pa luci den 2015 y sigui crece.

FILM MARKET

Otro parti interesante di e edicion di AIFF 2015 ta e introduccion di un “film market” nobo. E International Film Market Aruba (I.F.M.A.) lo ta un di e prome mercadonan di cine den e region Caribense, caminda lo tin varios distribuido di pelicula internacional cu lo ta na Aruba. Aki productornan di pelicula local y esnan cu lo ta di bishita na Aruba lo por presenta nan pelicula pa asina mira si un di e distribuidonan internacional ta desea di representa y bende nan pelicula den mercadonan internacional. E aspecto nobo aki di A.I.F.F. tin e potencial pa trece un cantidad amplio di turista nobo pa Aruba tur aña.

WORKSHOP

E festival di cine aki ta representa un manera tambe pa yega na nos comunidad local y nos hobennan y duna nan e oportunidad pa medio di e “workshop” y sesionnan pa educa y inspira nan mes mas riba e creatividad y mundo di cinematografia cu sigur ta un profesion hopi bunita cu mester mas empuhe riba nos isla.

Combinacion di e elementonan aki cu ta bini hunto den un festival di cine, ta haci Aruba mas rico ainda for di angulo nan cu ta capta atencion di prensa internacional y ta yuda posiciona Aruba debidamente.