Ter Steege: Dificil pa haya PG nobo debi na ambiente hostil pa traha aden

ORANJESTAD – E buskeda pa haya un Procurador General (PG) nobo pa Aruba ta mas dificil cu a pensa. E PG actual, mr Bote ter Steege, ta bandona Aruba na augustus di e aña aki despues di a cumpli cu su 3 añanan di trabou. E mes ta admiti cu e clima fastioso cu tin na Aruba rond di e trabou di un PG ta dificulta e proceso pa busca un reemplasante. E ta yama e situacion te hasta ‘toxico’. Y cu esaki e kier men e forma con e instituto y su funcion (PG) ta wordo ataca constantemente door di politiconan y cierto prensa cu no ta aproba di e maneho di e instituto di cual e ta responsabel p’e. 

ATAKE CONTRA PG 

Sigur ora cu persigui politiconan pa actonan penal, ta bin atakenan constante contra e PG, y esaki ta yega na un nivel hopi serio. Hopi hende consecuentemente, no kier ta den e sapato di un PG y esaki tambe ta traduci den un falta di interes grandi pa un persona tuma e funcion aki. Esaki ta pisa mas aparentemente, cu traha den Caribe unda e tempo ta hopi dushi manera Aruba y un garantia di trabou bek na Hulanda (pa esnan cu solicita for di Hulanda). “Pero, tin hende. Tin hende cu ta interesa ainda toch, aunke cu tin tur e situacionan venenoso aki, pa bira PG”, ter Steege ta sigura den e programa. E proceso inicial mester a termina na December pero a bolbe habri e solicitud na februari, y awor nan ta den e di dos ronda (no a logra den e prome ronda) cu candidatonan cu ta den combersacion. Ta spera cu prome cu ter Steege bandona Aruba na augustus di e aña aki, por tin un reemplasante nombra pa Gobierno di Reino Hulandes. Cada PG ta keda apunta pa 3 aña (ter Steege a cuminsa dia 1 di September 2020:red) 

COMISION

E proceso ta un largo unda cu e candidatonan tin cu pasa por lo menos dilanti 3 comision, cu ta esun di PG, uno di Hof di Aruba y finalmente un combersacion cu e presidente di Hof y e dos PG den e area aki. Y despues e presidente lo sugeri un persona na gobierno di Reino. 

ARUBIANO COMO PGE pregunta cu si no tin candidato local pa reemplase, ter Steege a bisa cu mientras cu e no ta bay menciona nomber, cu Aruba sigur tin hopi persona capacita pa e funcion. Y ta hendenan cu e la cera conoci cu nan durante su periodo di trabou ultimo 3 añanan. Pero atrobe, e ta sigura, cu e funcion no ta un ‘stima’. “Bo ta para  continuamente den un tormenta. Tin suficiente talento riba e isla. Pero e ambiente den cual bo tin cu haci bo trabou, no ta semper di ‘un isla feliz”. “No ta semper dushi tera. Mas aun, tin momentonan cu ta te hasta hopi venenoso”, ter Steege ta sigui bisa.