- KLM Aruba Marathon a registra record historico cu 3.000 participante for di 42 pais
- Hulanda ta invita Hulandesnan na Aruba pa registra pa eleccion di Senado
- Long Table Aruba 2026 a recauda $100.000 pa cinco organisacionnan local
- Minister Gerlien Croes riba conseho di RvS: ‘Ora nos caba di bespreek, mi lo duna reaccion’
- Corsou ta rumbo pa Merca pa su prome experiencia den Copa Mundial di Futbol
- KLM Aruba Marathon a registra record historico cu 3.000 participante for di 42 pais
- Hulanda ta invita Hulandesnan na Aruba pa registra pa eleccion di Senado
- Long Table Aruba 2026 a recauda $100.000 pa cinco organisacionnan local
- Minister Gerlien Croes riba conseho di RvS: ‘Ora nos caba di bespreek, mi lo duna reaccion’
- Corsou ta rumbo pa Merca pa su prome experiencia den Copa Mundial di Futbol
Dialuna ta dera baluarte di cultura Hubert ‘Lio’ Booi
ORANJESTAD – Dialuna awor ta dera e baluarte di cultura di Aruba, Hubert ‘Lio’ Booi. Un siman despues cu e la fayece na edad di 95 aña, e programa ta conoci di e tributo y e entierro cu ta sigui despues. E tributo mes ( lesa e program di tributo aki) ta awe diasabra 27 di December 2014 for di 6'or di atardi pa 10'or di anochi den Sala di Expo di Cas di Cultura riba Vondellaan, unda nos artistanan local y instancianan lo rindi tributo. E entierro ta dialuna 29 di December 2014 for di 1'or di atardi pa 4'or di atardi den Pro Catedral San Francisco na Oranjestad.
Prome cu hiba Sr. Lio Booi pa e Pro Catedral San Francisco lo tin un ruta riba caminda cu e Shersh: Saliendo pa 12:00 pm for di Olive Tree na Cumana den direccion retonda di Aereopuerto bini pa Camacuri, yega Retonda Las Americas despues drenta Stadionweg ( lo bira Caya Huberto Obdulio (Lio) Booi) banda di Cas di Cultura den direccion Oficina di UNOCA y eynan lo para un rato 1 pa 3 minuut, directiva di Unoca lo haci un entrega floral...pa sigui riba Caya Avenida Milo Croes, yega retonda Banco di Caribe sigui riba De La Sallestraat bini abou, dobla nan man drechi drenta Kamerlingh Onnestraat, yega Club RCA ta bira bini bek y para na su cas riba Kamerlingh Onnestraat # 27 (2 min.). Pa despues bini bek riba De La Sallestraat dobla na man drechi bini abou pa Retonda di Piet banda di La Salle College, dobla na man robes subi e caya di J.E. Irausquinplein y yega Pro Catedral pa 12:45 pm.Tabata un siman pasa cu NoticiaCla.com a relata cu e baluarte di cultura di Aruba, Hubert “Lio”Booi a bay sosega. E tabata malo pa algun tempo y a fayece den hospital. Booi, boneriano di nacemento (1919), a considera su mes Rubiano for di tempo cu e la bin biba na Aruba, integrando su mes completamente riba nos isla. Booi, fuera di tabata poeta, tabata pintor y musicante tambe. Su trabou mas grandi, pero porta no hopi conoci, ta e di tres couplet di e himno di Aruba, Aruba dushi tera.
Booi a nace na Nikiboko na Bonaire riba 25 di juli 1919. E la atende scol basico na Bonaire y cu 18 aña a bin biba na Aruba na 1937. E la casa cu Floraquetina Coronel(q.e.p.d) y tin 6 yiu. Un homber y 5 muher di cual porta esun mas conoci ta Ludwina. Booi a traha den gobierno na e.o. WEB, oficina di turismo, y despues servicio di informacion di gobierno (BUVO awe). Pa 15 aña e la maneha Instituto di Cultura di Aruba. Finalmente na 1980, Booi a bay goza di su pensioen bon mereci.
Su carera artistico nunca no a para. Premionan tambe e la gana y haya na cantidad. Entre nan e Premio di Papiamento na 1999. Un honor grandi tabata ora cu na 2003, Cas di Cultura a nombra e plenchi paden na su nomber, Plaza Hubert Lio Booi. NoticiaCla.com ta manda palabra di forza pa su famianan y cu e baluarte di cultura sosega na paz. Foto cortesia bibilioteca publico di Aruba.