Paranda di Fin di Aña di Randal Corsen a pone tur hende riba pia!

WILLEMSTAD – Ni un palo di awacero por a para e di e di dos dia di e expectaculo musical ‘Paranda di Fin di Aña’ di Corsou di e aña aki. Diasabra anochi bou di e cupola na Landhuis Brakkeput Mei Mei, e orchestra bou di encargo di e maestro Randal Corsen a deleita e publico grandi y cu e presentacion di cantantenan manera Dibo D, Ritch Pieter, Yumaira Grijt y e artista invita Izaline Calister pa casi tres ora largo. Un repertorio amplio a zona durante e anochi, unda cu ni awacero no a logra stroba e ambiente. Na comienso di e anochi, e maestro di ceremonia Frans Heiliger a reta e publico caba :“Na final di e prome anochi, tur hende tabata riba pia. Ban wak con ta bay awe nochi”. Y e publico no a defrauda Heiliger. Y asina mes cos a bay unda cu na final, bou di tono di un potpourri di tumba, e anochi a finaliza. Pero no prome cu cada un di e artistanan menciona, a duna nan toke personal na e anochi. Combina cu un intercambio humoristico di Corsen, e anochi a sigui su curso, y esnan presente sigur a disfruta sin fin. Mitar den e concierto, e awacero a dicidi di purba mete, loke e no a resulta. “Nos no ta bay niun caminda” un persona den e publico a grita. “Nos ta stop?” Randal Corsen a puntra e publico, pa cual el a  haya un no rotundo. Despues di un rato cu e awa no kier a stop stop, asina mes cantantenan riba e tarima a continua cu nan presentacion. Finalmente e awacero a dicidi di 'entrega'. Y despues di un pauze programa, tur hende tabata cla pa continua manera nada no a pasa. Manera custumber, Izaline Calister su ‘Wow’i Cariño’ a keda hopi popular, y diasabra anochi esaki no tabata diferente. Clausurando cu un potpuri di tumba carnavalesco, tur hende tabata riba pia y tabata pidi pa mas. Otro aña tin e di 5 edicion, cu Corsen a anuncia caba. “Nos ta bende carchi ora boso sali bay awor” Corsen a bisa na final, den un forma humoristico. Na tur, esnan presente a goza sin fin di e di dos y ultimo anochi di e Paranda di Fin di Aña, algo cu a cuminsa 4 aña pasa y a bira un custumber agradabel y exitoso!.