ORANJESTAD – Despues di a scucha e circumstancianan personal di tur 7 sospechoso den Corte Apelacion pa e caso penal Avestruz diabierna mainta, e huez principal di e tres hueznan, a indica pa ki dia por spera sentencia. “No spera un sentencia den e acostumbrado 3 siman cu ta rekeri” e huez a bisa. Esaki mirando e embergadura. Pa por haci esaki, e ta suspende e caso na final otro siman, y lague habri. Esaki ta dune espacio legal pa evita e 3 siman rekeri pa ley pa duna un sentencia. “Por spera un sentencia na comienso di juli (di e aña aki)” e huez a sigui bisa. Otro siman dialuna ta cuminsa e tratamento di e rekisotorio di Ministerio Publico, pa despues e defensa cuminsa cu su trabou y e repliek y dupliek. Pa diaranson, si keda cla, ta ‘suspende’ e caso atrobe y ta duna e huez chens pa traha ‘trankil’ riba e sentencia.
ORANJESTAD – Diabierna dia 17 di mei ultimo WEB Aruba y Wärtsilä Finland Oy a firma e ‘final take over’ di planta RECIP IV. Cu e firmamento aki, Wärtsilä formalmente a entrega e planta na WEB Aruba. Operacion di RECIP IV ta conduci na un reduccion drastico di combustibel, na menos emision di gas den medio ambiente y na tarifanan di coriente sostenibel. Ademas, na momento di interupcion di suministro di coriente, e tempo pa recupera ta hopi mas cortico cu den pasado. E ceremonia a tuma lugar den planta di WEB den compania di diferente mandatario, diferente partner di proyecto, empleadonan y contratistanan di e compania di awa y energia. Pa e ocasion aki a haci un donacion total di Awg. 27.500,- na diferente instancia educativo, social y deportivo.
ORANJESTAD – Den menos cu 12 ora, dos accidente separa a causa interupcion di coriente na Aruba. Si tabata blaas di helium, awor ta accidente tras di accidente ta sosode cu e mesun consecuencia. Mester bisa si cu e ultimo caso, ta mas bien un incidente cu un accidente. TA un truck cu a pasa ranca waya di coriente den area di Kudawecha cu a causa un interupcion grandi den area di Sabana Liber, Noord y vecindario. E interupcion awe mainta tabata algo despues di 9’or esta 9:08 di mainta. Esun prome, manera cu nos a raporta caba, a sosode algo despues di mei anochi, unda cu aki si un auto a accidenta mes, lagando suficiente destruccion atras di un palo di coriente completo.
DEN HAAG – E excusa cu (awor) formador Ronald Plasterk a haci diabierna den direccion di lider di partido NSC Pieter Omtzigt, tabata un condicion di Omzigt, pa e por sostene Plasterk como candidato pa prome minister nobo di Hulanda. E caso pa cual mester a pidi excusa, tabata pasobra Plasterk den Tweede Kamer a divulga cu e la fia su auto di trabou na Omtzigt. Algo cu no mester a bira publico. Plasterk den un carta habri den e corant De Telegraaf, a pidi despensa publicamente y a admiti cu e no mester a divulga e informacion ey publicamente. “Enberdad mi no mester a haci esey. Pieter, despensa” Plasterk a scirbi den su carta habri. No ta conoci si e despensa publico aki ta habri caminda pa Omtzigt bay di acuerdo awor pa Plasterk bira e proximo premier di Hulanda.
ORANJESTAD – Diabierna marduga banda di 1:45 am, a sosode un accident na haltura di Franse Pas. Acausa di esaki un gran parti a perde coriente den area di Pos Chiquito,Sabana Basora, Burunbundo y Rooi taki. Tecniconan di Elmar a traha ariba esaki pa asina purba restablece coriente lo mas rapido posibel y pa 2:30am, barionan afecta a cuminsa haya coriente bek.