Buelo Aruba Airlines casi perhudica pa motibo di falta di pago

ORANJESTAD – Un avion di Aruba Airlines for di Miami a baha na Aruba cu un retraso chikito, debi na un problema cu espacio aereo y pago atrasa. E avion a sali for di Miami na ora awe mainta pero no por a sigui su curso, debi cu a prohibi’e di drenta espacio aereo di Corsou/Aruba (pa falta di pago atrasa atrobe). E avion a circula un tempo den cercania di Republica Dominicana y despues di promesa di pago, a laga e avion sigui su curso pa Aruba. Informacion no confirma ta mustra cu e avion lo wordo geground na Aruba pendiente pago. E avion mientrastanto a ateriza na Aruba pa 11:22 awe mainta envez di 11’or cu ta su ora regular.

PROHIBI DI DRENTA ESPACIO AEREO

Informacion cu NoticiaCla.com a ricibi ta cu for di fin di siman DCANSP (Dutch Caribbean Air Navigation Service Provider) a suspende servicio pa 4 avion di e aerolinea, entrante awe pa drenta espacio aereo di Corsou, conoci como Curacao FIR (TNCF). Esaki ta importante pasobra pa por yega Aruba, mester uza e espacio aki tambe. Consecuentemente awe mainta ora cu e buelo di un di e avionnan cu a sali for di Miami rumbo pa Aruba tabata ‘en route’, a prohibi’e pa drenta espacio aereo di Corsou. Esey a pone cu e avion mester a keda circula pasobra a compronde cu e capitan no kier a bolbe Miami. Despues di un rato, lo a haci promesa pa paga, cu a duna nan e permiso ‘e biaha aki’ pa continua cu nan buelo pa Aruba. No ta prome biaha cu esaki ta sosode, ya cu algun luna pasa caba e portal a raporta e prohibicion aki pa falta di pago. A resulta e tempo ey cu ta constantemente esaki ta sosode cu e aerolinea pa falta di pago, y despues ta core paga pa por continua cu e operacion.