Destra Garcia artista invita pa celebra apertura refineria diasabra

ORANJESTAD - “Esaki ta mi di dos bishita na Aruba e aña aki, mi stima e isla aki masha”, asina Destra Garcia di Trinidad & Tobago, conoci pa ta un strea grandi den e genero di musica Soca, R&B y Pop, a duna di conoce na su yegada diabierna. Refineria di Aruba a organisa un conferencia di Prensa den VIP Room di Aeropuerto na yegada di e artista. E tabata compaña pa Claudius Philips di OREO hunto cu Antoni Gario di Le Groove, kendenan tambe lo presenta diasabra awor riba scenario. 

E evento pa celebra reapertura di nos refineria ta tuma luga diasabra awor dia 22 di october den Carnival Village na San Nicolas. E evento lo cuminsa for di 4or di atardi y lo sigui te den oranan laat cu un lista largo di bandanan musical cu lo haci nan presentacion pa e publico presente. E agrupacionnan y DJnan ta varia for di DJ Mike Ross, OBS Brassband, presentacion di Popcorn Dancers, Vince Irie, Tsunami Aruba, Janiro Eisden, Le Groove, show di vuurwerk, OREO y pa cera e anochi cu presentacion di e reina di Soca, esta Destra!

Entre 4:00pm pa 7:00pm lo registra tur esunnan cu drenta na e evento gratis aki, pa asina nan participa den rifa di bon di gasolin. Despues di 7:00pm, durante cada ora lo regala bonnan di gasolin entre e participantenan, pues yega trempan y participa. Unico condicion ta cu mester ta presente den Carnival Village pa por reclama bo premio mesora. 

Specialmente e pueblo di San Nicolas pero henter Aruba en particular ta masha contento cu reapertura di e refineria, den cuadro di su inyeccion den nos economia, crea cupo di trabou, inversionnan, lanta e optimismo y crea mas oportunidad pa San Nicolas y vecindario.