CITGO Aruba mester busca 'fuente externo' pa financia refineria na Aruba

HOUSTON - Tin indicacion cu no ta CITGO Petroleum lo financia e 450 pa 650 miyon dollar manera cu e comunicado oficial di CITGO ta bisa. Den nan comunicado, ta papia pa cuminsa di un suma menos cu 1 biyon dollar, y cu esaki lo 'wordo obteni di fuentenan externo financiero', indicando cu e compania local na Aruba (cu ta cay bou di PDV Holding,  subsidiario di PDVSA y ta wordo acesora pa CITGO Petroleum na Merca) tin cu bay busca financiamento pa e proyecto aki. Ademas e comunicado ta referi na e parti di gas, como un proyecto 'complementario bou di consideracion' cu ta nifica cu mientras cu ta papia enberdad di 'reduci gastonan di energia significativo', e ta 'wordo evalua pa cu e meta aki'. Esey ta nifica cu e no ta un done deal cu ta confirma e MOU cu a wordo firma. Gobierno ta bisa sinembargo cu ta trata di un parti huridico y ta splica esaki den un otro forma. Pues e parti cu mester ta esun mas importante di e deal, esta uzo di gas pa haci e refineria berde, ainda no ta concretisa y ta awor ta bay evalua esaki. Esey ta nifica cu e costonan pa cu e tuberia tampoco ta confirma. Minister de Meza como defensa e siman aki a bisa, cu tin un acuerdo firma y cu awor CITGO ta mara na esaki y tin cu cumpli. Por lesa e comunicado di CITGO aki.