Arends: En berdad a firma MOU cu CITGO pa construi tuberia di gas pa Aruba

ORANJESTAD - En berdad gobierno di Aruba a firma un MOU cu e compania CITGO. Hefe di e team negoshador pa Aruba Richard Arends a confirma esaki den un comunicado difundi diadomingo. Hopi cu a mira e ceremonia televisa diabierna, a cuestiona si ta MOU a bay firma atrobe, of si ta un acuerdo mes a bay cera. Arends a splica esaki despues. "Na Venezuela a firma tambe un MOU (Memorandum of Understanding) pa construccion di un tuberia di gas entre Aruba y Venezuela pa operacion di e refineria di Citgo" Arends a cuminsa na bisa. Pues awor ta bay evalua y haci e investigacion di con miho por traha e tuberia aki. Algo cu hopi a considera straño mirando cu henter e idea tabata pa cuminsa cu e tuberia aki pa haci e deal uno 'berde' pa evita cu ta uza fuel oil, y awor uza gas na su lugar. 

KICO TA HACI E MOU AKI DIFERENTE CU PROME

"A wordo firma un MOU cu ta eigenlijk resalta e MOU di aña 2010 cu 2013 cu Gobierno di Reino a firma cu Republica di Venezuela e tempo ey,"  Arends afirma, splicando cu  ' esun di 2010 tabata papia caba di estudionan tecnico pa un pipa di gas cu lo conecta e refineria di Aruba cu Venezuela'. "Awo, cu e operacion door di Citgo, e coneccion via un pipa di gas ta bay wordo realisa pa e operacion di e refineria.". Loke Arends no ta splica sinembargo, ta cu ta papia aki di a firma cu CITGO Petrolium, mientras cu prensa Mericano (ABCNews) ta papia di CITGO Aruba, esta e compania estableci na Aruba na januari ultimo. 

RVA Y PARLAMENTO MESTER APROBA DEAL PROME

Loke cu na Venezuela miembro di Asamblea Nacional a cuestiona, ta confirma tambe pa Arends. E ta e hecho cu e acuerdonan cu Citgo Petroleum Corporation, despues cu a wordo firma diabierna ultimo, mester pasa Raad van Advies di Aruba prome pa conseho y djey ta bay Parlamento, prome cu e por bira un ley. Algo cu lo tin cu tuma lugar tambe na Venezuela. Segun Arends, pa prome di augustus Citgo tin planea pa cuminsa trabounan di revitalacion riba henter e compleho petrolero y segun plan ta tuma 18 luna pa cuminsa cu produccion. E compleho tin 5 aña cu ela cera su portanan y mester haci hopi trabou pa sigura integridad di e ekipo cu tin algun aña sin traha.

HULANDA TA CUESTIONA DEAL

Den combersacion cu miembro di Tweede Kamer di VVD na Hulanda Andre Bosman, ela splica NoticiaCla.com diadomingo cu e ta un deal hopi straño y cu tin hopi pregunta. No ta normal segun Bosman, cu ta cera un deal prome y despues bay parlamento. "Unabez cu tin un acuerdo, bo ta mara legalmente pues hopi mas no por wordo haci pa parlamento pa trece cambio pasobra e deal ta cera caba" Bosman a bisa. E ta compara e asunto cu ora cu gobierno Hulandes a 'bail out' ABN AMRO. "E biaha ey, e deal a wordo papia cu tur protagonista, berdad den forma secreto, pero tur hende tabata sa prome cu a cera e deal, kico e tabata encera. Despues Tweede Kamer a aproba e deal!" Bosman a bisa.