ORANJESTAD – Minister di labor Paul Croes a desmenti na NoticiaCla.com awe tardi cu e lo tin pensa di elimina e ley di 1613x, manera cu sindicato FTA a indica mas prome durante un conferencia di prensa. Ora cu NoticiaCla.com a puntr'e riba esaki, el a a sigura cu no ta asina. “No, ningun momento” Croes a bisa. El a bisa cu pa evita cualkier confusion, e lo bay sinta cu nan un biaha mas pa trece clarificacion. Tabata mas prome durante e conferencia di prensa di FTA, su presidente Hubert Dirksz a bisa cu el a tende y a haya confirmacion di varios caminda, cu e mandatario lo ta ‘halando atras’ di su palabra. Y cu si ta asina, e sindicato lo bringa esaki totalmente y no ta descarta accion.
LEY 1613X SIGUR TA FOR DI MESA
E mandatario sinembargo ta desmenti esaki. E ta sigura cu eliminacion di 1613x ta for di mesa. “Locual si a wordo discuti ta alternativa hunto cu union sindical con pa logra mas trahador hoben, personanan cu limitacion, 50-plussers y bijstandtrekkers haya un trabou” Croes a bisa. Segun e mandatario, na e momentonan aki un dunador di trabou por emplea un trahador pa un periodo di 6, 8, of 12 luna por medio di un uitzendbureau. Un dia pa otro e trahador aki por wordo manda cas. Sin previo aviso.
MAS PROTECCION
Cu un contrato corto di 6, 8 of 12 luna e trahador tin mas proteccion pasobra e doño di trabou no por kita bo zomaar. “Dicon via un uitzendbureau si, y no via un contrato corto? “ e mandatario ta puntra. E ta sigui bisa cu e trahador ta hopi mas protegi bou di e dos opcion. “Pasobra pa kita e trahador aki bo lo mester bai labor pa un ontslag. Dus awo hunto cu e sindicatonan nos a keda di pensa riba esaki. Ampliacion di 1613x por ehempel ta un opcion. Enbes di eliminacion. Na mesa mi a bisa cu mi a cambia posicion pa falta di politieke draagvlak. Mi a splica hasta cu fraccion di AVP a reuni cu mi pa pidi mi re-evalua e posicion inicial, y bai bek mesa” Croes a sigura NoticiaCla.com. No ta conoci ki dia e mandatario lo reuni cu e sindicato pa clarifica e asunto aki ‘un biaha mas’.
ORANJESTAD – Minister di finanza demisionario Xiomara Maduro a contesta presidente di Parlamento Gerlien Croes dialuna, cu no mester tin ningun excuse pa trata e presupuesto 2025. E la reacciona despues cu siman pasa Croes a indica cu ta wardando riba Gobierno, pa por trata e presupuesto pasobra Gobierno ainda falta pa manda cierto documetonan. For di e contesta di Maduro por compronde cu Gobierno a manda tur cos caba. “Desde siman pasa e contestanan di Gobierno tambe a bay pa Parlamento, pues Presidente di Parlamento tin tur informacion pa asina por yama e reunion publico pa atende cu Presupuesto 2025” Maduro a bisa den un reaccion publico.
ORANJESTAD – “Nos a tuma nota tambe di menasa nan contra di Cuerpo Policial, y esaki sigur no lo ser tolera” tabata parti di un reaccion dialuna di minister demisionario di husticia Rocco Tjon na Noticiacla riba e caso lamentable di fin di siman unda cu un polis a tira un persona mata durante un persecucion. “ Na prome lugar kier manda palabranan di condolencia y forsa na famia di e fayecido”: e mandatario a cuminsa na bisa Noticiacla.
ORANJESTAD – Dialuna mainta a habri cu un confrontacion entre lider di fraccion di partido PPA Otmar Oduber y e presidente di Parlamento Gerlien Croes. Ora cu Oduber tabata hiba su disertacion durante tratamento di presupuesto di Algemene Rekenkamer van Aruba (ARA), e presidente a hala atencion di Oduber mirando cu e lo tabata desviando di e tema y a bay riba e aumento di botter di gas. Aki Oduber a irita y a mustra Croes cu e no por interumpie den un disertacion. Ademas a referi na e hecho cu Croes awor ta forma parti di e siguiente gobierno, cu ta culpable pa e aumento aproba. Esaki pasobra ta e minister actual Geoffrey Wever, cu lo forma parti di e proximo gobierno, ta responsabel pa e aumento. A keda un bay bin chikito entre e dos personanan aki awe mainta. Remarcable ta cu e segmento di e video aki ta poni riba e propio pagina di facebook di Parlamento di Aruba.
ORANJESTAD – Partidonan AVP y FUTURO a yega na un base di acuerdo pa traha hunto. Esaki ta e mensahe principal cu e formadornan Mike Eman y Gerlien Croes a informa Gobernador di Aruba SE Alfonso Boekhoudt diabierna mainta. Esaki ta confirma e noticia di ayera di noticiacla, cu a raporta cu tabatin huma blanco, usando e referencia na ora cu scohe un pontifice nobo, cu ta nifica den e caso aki cu partidonan realmente a haya otro pa traha cu otro. Ademas di loke a keda declara, a confirma cu lo bay forma un gobierno cu 7 minister, di cual 5 ta bay pa AVP y 2 pa FUTURO. Ken ta bira kico, ainda no ta conoci y awor lo traha riba esey. A mustra tambe riba e proceso nobo di screening, cu ta pone cu lo tuma mas tempo awor pa esaki keda cla y a pidi pa tene cuenta cu esaki. E proximo encuentro cu gobernador lo ta dia 18 di februari 2025 proximo, y e momento ey por duna un miho bista cuanto tempo mas lo dura prome cu por bisa miho pa ki tempo por papia di huramentacion di e gabinete nobo.
ORANJESTAD – Tin huma blanco pa loke ta e proceso di formacion di un gobierno nobo. Noticiacla a compronde cu inoficialmente e partidonan AVP y FUTURO a haya otro y ta cla pa formalisa nan acuerdo e siman aki. Inoficialmente pasobra e ta bira oficial te ora cu e keda presenta na Gobernador di Aruba, SE Alfonso Boekhoudt cu por sosode mayan diabierna despues cu e dos formadornan topa cu Gobernador. E detayes completo no ta conoci, pero loke si por bisa ta cu despues di un bay bin henter e siman aki, partidonan a keda cla si, y awor mester anuncia e lista oficial di cartera di minister, pero mas importante, e detaye di e programa di gobernacion di e gabinete. E no tabata un proceso facil, Noticiacla a compronde, pero, awor si ta cla y lo tin un gabinete nobo. Tin varios lista cu ta circula di e carteranan y ken lo bira e respectivo ministernan pa e respectivo partidonan.
DEN HAAG / ORANJESTAD – Prome Minister Evelyn Wever -Croes dciahuebs 6 di februari, a reuni y na e mesun momento cera conoci cu Minister President di Hulanda, señor Dick Schoof. Durante e reunion a trata diferente punto di interes, pero e prome punto cu e Premier Hulandes tawatin riba su agenda a trata e maneho financiero responsabel di pais Aruba. Riba esaki Prome Minister di Aruba a duna e mandatario Hulandes un relato detaya di tur e trabounan cu a haci y ta haciendo pa Aruba ta financieramente stabiel na e momento aki.