Grupo di 9 sindicato ta contra cambio ley laboral 1613X

Posted on 10/19/2015 9:47 pm AST | Updated on 10/20/2015 8:26 am AST

ORANJESTAD – Sindicatonan ta determina pa bringa gobierno riba e topico di cambio di ley laboral. Durante un reunion urgente dialuna atardi laat, un total di 9 sindicato (SEPPA, UEA, FTA, STT, SIWA, ABV, SADA, ALVAST y SIMAR) a mustra nan malcontento cu e intencion di gobierno pa e cambio di e ley. Aparte di e topico ey, a discuti tambe union di sindicatonan y e ley di CAFT y su consecuencianan negativo cu por tin pa e clase trahado.

UNION SINDICAL

Pa loke ta e union, presidente di sindicato FTA, Hubert Dirksz a mustra NoticiaCla.com cu e boluntad t'ey, e disponibilidad t'ey, y cu e sindicatonan ta dispuesto pa coregi tur eror cometi den pasado. Y nan kier cambia nan forma di traha pa tin un union mas solido pa por atende cu e dunador di trabou y gobierno.

ARTICULO 1613X

Riba e tema di e ley laboral, tur sindicato ta para tras di FTA pa para e cambio aki. A mustra cu expresionnan di otro sindicatonan ta aun mas fuerte cu esun di FTA. Esey ta mustra cu nan ta porta ‘mas rabia’ cu FTA mes. Segun e lider sindical, FTA tin un apoyo basta grandi di tur sindicato na Aruba.

REACCION RIBA REACCION DI MINISTER

Tumando nota di e reaccion di e mandatario den fin di siman (cu gremionan ta 100% tras di gobierno), sindicatonan ta reuniendo cu tur miembronan, partiendo flyer, a saca un video, y tabatin un congreso dialuna anochi mes. “Ainda nos tin cu tuma un decision con nos ta bay haci esaki (pa loke ta atende cu e problema di e ley) y tin bastante trabou pa haci.

NO TA COMPARTI PENSAMENTO DI MINISTER

“Nos no ta di acuerdo cu e minister. Na prome lugar e ta comete eror di bisa cu na Aruba no tin posibilidad di contratacion di termino corto. Si e t'ey, pero e ta condiciona” Dirksz a bisa. Ademas a mustra cu si kier pone 50-plussers y studiantenan pa traha, si bo tin compania cu ta traha p'abo, no ta sin mas bo ta cambia e cantidad di trahado. “Tin espacio pa modifica e ley pa pone nan traha sin cu tin cu haci cambio den e ley pa trece henter e clase trahado den futuro den un incertidumbre bou presion di e dunado di trabou” Dirksz a bisa. Ta considera esaki un desision anti sindical, anti social. Riba un posibel acercamento cu e minister, Dirksz a splica cu e minister no ta mustra di ta habri.

 

  • Powered by SETAR