- Aruba a ricibi su prome buelo di British Airways diadomingo
- Conocido comediante y artista Eligio Melfor a bay sosega
- Awe nochi ta bo chens di gana 650 mil florin cu Lotto 5
- SETAR ta sponsor di Soul Beach Music Festival 2023
- Ex tesorera di fundacion di partido POR sentencia na 120 ora di trabou comunitario
Sociedad Interamericana di Prensa: Aruba ta obstacula trabou di prensa
MIAMI – Aruba ta un di e 12 paisnan cu ta obstacula trabou di prensa, segun Sociedad Interamericana di Prensa (SIP). Asina nan ta informa diahuebs y a avisa e gobierno di Aruba y 11 otro pais. Nan ta pidi e gobiernonan pa ‘stop di restringi derecho constitucional y ley di acceso di informacion publico’. SIP a pasa un resolucion aproba diahuebs durante e reunion semestral na Miami. Aki a pidi pa ‘abstene’ pues di obstaculisa e trabou di prensa y ‘desmantela e cultura di secreto’.
RIPITICION
No ta prome biaha cu SIP ta hala atencion di Aruba. Den pasado esaki a sosode y e ora gobierno a reacciona y pidi SIP coregi e info ya cu a opta lamentablemente pa publica informacion sin verifica cu esun cu ta wordo acusa. Den e occasion ey, gobierno di Aruba a sigura SIP cu e informacion no tabata corecto y a pidi pa SIP coregi e informacion difundi.
RESOLUCION CONTRA ARUBA
Mientrastanto, den e considerans di e resolucion, ta afirma cu e restriccionan di aceso di informacion ta un di e principal limitacion di libertad di expression y derecho di publico na informacion. SIP ta raporta cu tin 12 paisnan cu ta ‘padece’ e restriccionan menciona ta Aruba, Bolivia, Canada, Costa Rica, Cuba, Merca, Guatemala, Paraguay, Peru, Puerto Rico, Republica Dominicana y Venezuela.
REACCION GOBIERNO
Noticiacla a tuma contacto cu gobierno di Aruba, specificamente minister presidente Evelyn Wever Croes y minister di Telecomunicacion Geoffrey Wever. “Nos no a haya e resolucion aki oficialmente. Ta lamenta cu ta publica esaki sin cu Aruba a wordo notifica di e resolucion y sin duna Aruba e chens pa reacciona” tabata e prome reaccion di minister Geoffrey Wever, di Telecomunicacion diabierna mainta. “Mirando cu mi no conoce e contenido di e resolucion awor no ta possible pa duna un declaracion mas amplio” e mandatario a sigui bisa. “Mi kier remarca si cu e articulo ta menciona transparencia di gobierno y no ta menciona e procedura legal cu Aruba tin den nos leynan cu ta obliga Gobierno pa duna informacion na entre otro prensa esta e lansverordening openbaarheid van bestuur. E ley aki ta un ley cu ta garantiza cu gobierno mester ta transparente y divulga informacion. Mi sa cu no ta tur ora informacion pidi basa riba e ley aki ta wordo divulga rapido” e mandatario a sigui bisa. Segun e mandatario, den e ley tin ancra e uitzonderingsmogelijkheden si pa gobierno”.
KEHO CONTRA MINISTERNAN
Por corda con recientemente algun periodista miembro di SIP na Aruba a keha cierto gobernantenan ora cu nan a opta pa no contesta pregunta di e medio di comunicacion 24ora.com. Potret cortesia SIP.
Rey Charles di Inglatera a cancela bishita na Francia debi na protestanan
LONDON – E Rey di Inglatera Charles a pospone su bishita na Francia debi na protestanan contra aumento di edad di pensioen den e pais Frances. Ayera sindicatonan a bolbe anuncia mas accion pa otro siman diamars, cu ta e dia cu e bishita mester a cuminsa. E mester a bira e prome bishita oficial di Charles como Rey. Charles (74) lo a yega diadomingo pa un bishita di 3 dia.
Prome minister Wever tabata riba plataforma internacional na Nacionan Uni
NEW YORK – Prome Minister di Aruba Evelyn Wever Croes diahuebs tabata riba plataforma internacional na Nacionan Uni ora cu na nomber di Rein Hulandes, e la duna un declaracion riba e tema di awa. “ Den nomber di Aruba, Curacao, Sint Maarten y Hulanda mi a duna un declaracion na Nacionan Uni. Awa ta un reto pa henter mundo. Sea ta dimas awa, mucho poco awa of awa mucho sushi cu no por wordo usa” e mandatario a cuminsa na bisa.” Den Reino Hulandes nos ta pone e retonan aki halto riba agenda, pasobra e efectonan por ta devastador. Pero nos no por hasi’e nos so. Nos mester pa mas pais, tur pais, duna e problematica aki prioridad riba e agenda politico. Y nos mester scucha di nos hobennan” sra Wever Croes a sigui bisa. “Pa e motibo ey un hoben, Sarah Oey, a duna e di dos parti di e discurso den cual den nomber di hobennan a urgi e paisnan miembro di Nacionnan Uni pa tuma accion awor”. Segun e mandatario, e discurso a haya hopi reaccion na New York, principalmente pasobra a combina cu expresionnan di un hoben.
Rey Willem Alexander a organisa un encuentro cu e "Small Island Developing States (sids)" cu ta inclui Aruba
ORANJESTAD - Diamars mainta, Rey Willem Alexander na New York a organisa un encuentro cu Minister President di Aruba Evelyn Wever, y e Ministernan di e paisnan cu ta wordo considera como "Small Island Developing States (SIDS)". Presente tabata, Aruba, Sint Maarten, Boneiro, Curacao, St. Kitts, Barbados, Jamaica, Tuvalu, Fiji, y Maldives. Durante e encuentro aki, a enfoca hopi riba e paisnan chikito den e contexto di cambio climatico y e problematica di awa. Tabata di remarka cu e paisnan aki ta hopi similar pa loke ta trata e grandura di e pais y e total di habitantenan, y den caso asina, mayoria di biaha ta confronta e mesun retonan.
Willem Alexander: Parti di Boneiro por ta bou di awa prome cu fin di siglo, si no haci nada
NEW YORK – Prome cu e fin di e siglo aki, parti di Boneiro, incluyendo e capital Kralendijk por ta bou di awa. Y mester haci tur cos pa evita esaki. Esey tabata parti di e mensahe di Rey Willem Alexander den un video dirigi na miembronan di Nacionan Uni diaranson, como antesala di e conferencia riba e tema di awa. Como cu Bonaire ta parti integral di Hulanda desde 10-10-2010, ta considera cu parti di Hulanda ta den peliger pa cu e situacion aki. Den un video di mas of menos 4 minuut, e Rey ta splica e situacion di Bonaire y otro parti di mundo riba e tema.
Rey Willem Alexander tabata anfitrion di evento riba tema di awa na Nacionan Uni
NEW YORK – Rey Willem Alexander hunto cu presidente di Tayikistá Emomali Rahmon a habri e tunnel ‘Source to Sea’ cu ta duna entrada na e edificio di Nacionan Uni. Aruba su prome minister Evelyn Wever Croes (manera por a mira riba e potretnan) tambe ta invita pa e eventonan di e siman aki cu ta relaciona cu e tema di awa. E tunnel ta e simbolo pa coneccion di awa, politica y solucionan inovativo. Awe mainta e Rey lo hiba un discurso na apertura di e conferencia di Nacionan Uni riba e tema di awa. Esaki ta e prome conferencia di Nacionan Uni riba e tema di awa den casi 50 aña. Prome cu e apertura, Rey Willem Alexander y e presidente Rahmon tabata anfitrion pa tur lider di delegacion di paisnan cu ta participa na e conferencia aki.
Secretario di Estado Mericano Blinken a felicita Aruba pa dia di Himno & Bandera
WASHINGTON – Secretario di Estado Mericano Anthony Blinken a manda felicita Aruba pa e dia di Himno y Bandera dialuna. E mandatario Mericano a sigura cu Merca ta keda comprometi pa e asosacion di tempo largo cu Aruba. “Nos ta contento di nos trabou hunto pa debilita e netwerk transnacional criminal, combati actividadnan illicito, y sostene un region Caribense sigur y prospero” e mandatario a sigui bisa. “Nos ta comprometi pa traha hunto cu Aruba pa confronta e crisis climatologico y ta mira dilanti pa un colaboracion via trabounan publico y priva pa logra e meta di Aruba pa cu energia renobabel. Mester bisa cu e mensahenan aki no ta nobo y ta tuma lugar tur aña unda cu e mensahe solamente ta cambia un poco. Por mira e felicitacion AKI.
Follow NoticiaCla
