- Partido MAS a entrega mocion di desconfiansa contra minster Glenbert Croes
- Na Corsou a sentencia homber Arubiano gara cu 1 kilo y mei di marihuana geplak na barica
- Mas di 2 mil habitante di Aruba, Corsou y St Maarten por vota den eleccion parlamentario Europeo
- Maduro: Venezuela ta sigui cu of sin licensia Mericano pa alivia sancion petrolero
- HOH Academy a ofrece curso ‘ Doctor On Board’ pa ora di incidente riba avion
Sociedad Interamericana di Prensa: Aruba ta obstacula trabou di prensa
MIAMI – Aruba ta un di e 12 paisnan cu ta obstacula trabou di prensa, segun Sociedad Interamericana di Prensa (SIP). Asina nan ta informa diahuebs y a avisa e gobierno di Aruba y 11 otro pais. Nan ta pidi e gobiernonan pa ‘stop di restringi derecho constitucional y ley di acceso di informacion publico’. SIP a pasa un resolucion aproba diahuebs durante e reunion semestral na Miami. Aki a pidi pa ‘abstene’ pues di obstaculisa e trabou di prensa y ‘desmantela e cultura di secreto’.
RIPITICION
No ta prome biaha cu SIP ta hala atencion di Aruba. Den pasado esaki a sosode y e ora gobierno a reacciona y pidi SIP coregi e info ya cu a opta lamentablemente pa publica informacion sin verifica cu esun cu ta wordo acusa. Den e occasion ey, gobierno di Aruba a sigura SIP cu e informacion no tabata corecto y a pidi pa SIP coregi e informacion difundi.
RESOLUCION CONTRA ARUBA
Mientrastanto, den e considerans di e resolucion, ta afirma cu e restriccionan di aceso di informacion ta un di e principal limitacion di libertad di expression y derecho di publico na informacion. SIP ta raporta cu tin 12 paisnan cu ta ‘padece’ e restriccionan menciona ta Aruba, Bolivia, Canada, Costa Rica, Cuba, Merca, Guatemala, Paraguay, Peru, Puerto Rico, Republica Dominicana y Venezuela.
REACCION GOBIERNO
Noticiacla a tuma contacto cu gobierno di Aruba, specificamente minister presidente Evelyn Wever Croes y minister di Telecomunicacion Geoffrey Wever. “Nos no a haya e resolucion aki oficialmente. Ta lamenta cu ta publica esaki sin cu Aruba a wordo notifica di e resolucion y sin duna Aruba e chens pa reacciona” tabata e prome reaccion di minister Geoffrey Wever, di Telecomunicacion diabierna mainta. “Mirando cu mi no conoce e contenido di e resolucion awor no ta possible pa duna un declaracion mas amplio” e mandatario a sigui bisa. “Mi kier remarca si cu e articulo ta menciona transparencia di gobierno y no ta menciona e procedura legal cu Aruba tin den nos leynan cu ta obliga Gobierno pa duna informacion na entre otro prensa esta e lansverordening openbaarheid van bestuur. E ley aki ta un ley cu ta garantiza cu gobierno mester ta transparente y divulga informacion. Mi sa cu no ta tur ora informacion pidi basa riba e ley aki ta wordo divulga rapido” e mandatario a sigui bisa. Segun e mandatario, den e ley tin ancra e uitzonderingsmogelijkheden si pa gobierno”.
KEHO CONTRA MINISTERNAN
Por corda con recientemente algun periodista miembro di SIP na Aruba a keha cierto gobernantenan ora cu nan a opta pa no contesta pregunta di e medio di comunicacion 24ora.com. Potret cortesia SIP.
Maduro: Venezuela ta sigui cu of sin licensia Mericano pa alivia sancion petrolero
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
Flambeu olumpico ta cendi!:E marcha largo pa Paris a cuminsa!
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
Caso penal historico contra ex presidente Trump a inicia na Merca
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
Portal ya ta propaga cu matrimonio di pareha di mesun sexo na Aruba ta legal
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.
Conocido personahe Mericano O.J. Simpson a fayece di cancer
LOS ANGELES – Conocido personahe Mericano O.J. Simpson, a fayece na edad di 76 aña di cancer. Asina su famia a anuncia diahuebs. E tabata rondona pa su yiunan y nietonan. Na februari, Simpson a keda diagnostica cu cancer di prostaat, y tabata den cuido di hospice durante su tratamento di kimoterapia. E tabata hopi famoso pa su logronan como futbolista americano (rugby) durante 11 temporada. Pero e ta mas ‘conoci’ ainda pa e caso legal unda cu a culpe pa asesina su ex casa Nicole Simpson na 1994. E la keda absolve di e cargo ey, pero despues a drenta prizon toch pa otro cargonan di robo di memorabilia.
Na Bogota awe ta cuminsa ta ‘schakel’ suministro di awa entre municipionan
BOGOTA – Entrante awe, cuidadanonan di Bogota y becindario ta haya nan mes den un situacion fastioso cu awa. Esaki debi cu a cuminsa ‘schakel’ entre municipio pa awa debi cu e nivel di e lugarnan cu ta abastece e zona cu awa, ta hopi hopi abou. Pa sigura cu toch tin un fluho di awa y pa tin miho control pa tur hende haya awa, a dicidi pa schakel e proceso di awa. Esey kier men cu ta spaar asina dos metro cubico pa seconde di awa, y ta garantisa suministro di awa aceptabel pa por lo menos 10 miyon di persona. Un di e problemanan ta e fenomeno di El Niño cu ta causa esaki tambe. E ciudad ta parti den 9 zona cu ta suspende e awa cada 24 hora pa turno. Hunto cu publicacion di un schedule, ta haya sa ken tin awa ki ora.
Follow NoticiaCla
