ORANJESTAD - Recientemente Banco Central di Aruba (BCA) a publica “Strengthening Digital Financial Inclusion in Aruba” den cual ta presenta resultado di un investigacion nacional tocante aceso, uso y calidad di servicionan financiero na Aruba. E rapport di investigacion ademas ta presenta un strategia integral consistiendo di diferente recomendacion pa fortalece inclusion financiero digital di Aruba.
Pa un economia lora, placa mester circula. Inclusion financiero ta esencial pa desaroya un economia sostenibel unda ta fomenta participacion eficiente, confiabel y digital di consumidor y comerciante den e sistema financiero. Inclusion financiero digital ta un referi na aceso confiabel, uso responsabel y calidad sigura di servicionan financiero pa medio di sistemanan digital. Inclusion financiero digital ta importante pa fomenta stabilidad y educacion financiero, ademas di promove derecho financiero di consumidor.
Generalmente, inclusion financiero ta encera diferente tipo di servicio y producto, incluyendo cuentanan di pago, ahoro, prestamo y seguro. Den un economia incluso, consumidornan tin aceso na cuentanan bancario basico, transaccionan financiero ta eficiente y sigur, unda ta respeta derechonan financiero di cada cuidadano. Cu digitalisacion di economia y comercio, tecnologianan digital ta integral pa servicionan publico y financiero, cu na su turno ta rekeri siguridad digital (‘cyber security’) avansa.
E resultadonan di e investigacion ta mustra cu aunke mayoria di consumidor y comerciante tin aceso basico na cuentanan bancario pa haci pago y transacion financiero (mas cu 85 procent), tin un gap basta grandi pa cu cuenta di ahoro (menos cu 40 procent), seguro (menos cu 45 procent) y aceso na credito (menos cu 40 procent). Casi 60 procent di comerciante ta indica cu aceso na financiamento no ta facil. Pa loke ta trata finanzas digital y uso di tecnologianan digital, mayoria di negoshi y consumidor ya caba ta usa internet (mas cu 50 procent). Sinembargo, notabel ta cu apenas ta haci uso di ‘mobile banking’ (menos cu 30 procent).
A base di e resultadonan, e investigacion ta conclui cu tin un necesidad creciente di fortalece inclusion financiero digital y promove participacion y educacion financiero. Di e manera aki e rapport ta presenta diferente recomendacion pa traha riba nivel nacional riba un vision y strategia pa fomenta inclusion financiero digital. Pa por logra esaki ta necesario pa traha un plan
di maneho cu ta brinda diferente instrumento pa fortalece inclusion financiero digital na Aruba, incluso responsabilidad di sector publico y priva. Un di recomendacionan clave na gobierno ta pa establece cu un conseho nacional pa inclusion financiero na Aruba cu lo enfoca riba diferente tema integralmente, incluyendo, ID digital, educacion financiero, derecho di consumidor y digitalisacion di nos infrastructura.
BCA ta gradici comunidad en general, especialmente consumidor y comenciante cu a participa den e estudio aki. E rapport “Strengthening Digital Financial Inclusion in Aruba” ta disponibel riba website di BCA (www.cbaruba.org).
ORANJESTAD – Danki na un di e hotelnan all-inclusive na Aruba, nos isla ta na prome lugar di e top 10 di miho All-inclusive resorts pa famia den Caribe. Por lo menos segun e portal Travel & Leisure. Ta trata di e resort Tamarijn Aruba. Segun e articulo en cuestion, loke ta haci e diferencia den e destinacionan Caribense, ‘ta e abundancia di resortnan increibel all-inclusive’. E ta un forma perfecto pa famia por disfruta. Y ta describi tur e loke e turista por goza di dje. Mester bisa cu e resultado di e top 10 ta basa riba experiencia personal di e escritor di e portal turistico.
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.