• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Dufi Kock: Recordando 77 aña pasa riba e Di Dos Guera Mundial

ORANJESTAD - Awe marduga pa 0131, dia 16 di februari, 2019, nos ta recordando cu 77 aña pasa cu nos isla a wordo involucra den e Di Dos Guera Mundial. Aunke dia 10 di mei 1940, nos a sinti un sabor di guera ora cu e forsa Aleman a invadi Hulanda y e mesun anochi Capitan Ferdinand Schmidt ta sink su barco E.S. Antilla na Malmok pa no entreg’e na e militarnan Hulandes. Na palabra, historiador local Dufi Kock. Kende e tempo ey por a pensa cu un isla asina chikito manera di nos lo por a experiencia un guera desastroso asina. Kende di nos awe ta reflecciona y pensa riba e rol importante cu nos isla chikito aki a hunga durante e guera aki. Kende awe cu a traha na refineria di Lago por bati riba su pecho pa recorda con importante nan refineria tabata pa e aliadonan. Kende awe ta den tristesa recordando nan sernan keri cu cruelmente a bay laga nan. Hopi famia no por a ni mira nan defunto pa motibo cu nan santana a resulta den fondo di lama, unda nan ta sosegando cu tur honor. E perdidanan aki y otronan, a resulta den e calamidad di mas grandi cu nos pais por a experiencia den nos historia. Den apenas tres ora y pico, 47 persona ta perde nan bida, entre nan 13 Boneriano. Un famia Boneriano ta perde dos yui homber e marduga ey. Ta Dios Gracia cu Capitan Hartenstein no a mira e tankero SS Hooiberg cu net na e momento ey tabata biniendo na e mesun sitio pa hancra. Tampoco nos mester lubida cu ora e submarino U-156 di Capitan Hartenstein tabata manda cayon riba e refineria, ningun a dal e 3000 tonelada di TNT riba waf, sino cuanto parti di nos isla lo a somenta, includiendo nos refineria y cuanto morto mas lo a cay. Tampoco nos mester lubida nos heroe, Sr Boy Ecury cu na un edad hoben di 22 aña ta entrega su bida pa awe nos tin e libertad.

Pesey awe mi kier bolbe concentra riba e victimanan aki. Pakiko pasobra ami si ta kere cu nan merece un monumento na nan honor pa motibo cu nan a perde nan bida eherciendo nan trabou na Lago, contribuyendo na nos desaroyo economico y social. Cu hopi desapunto mi tin cu bisa cu mi tin mas di 20 aña ta luchando, acercando diferente gobierno y instancianan concerni, pa instala un monumento na nan honor, pero sin resultado. Dia 13 di april 2009 cu nos grupo di sambuyado a risca nan bida pa lanta un chapaleta di e tankero SS Oranjestad na un hondura di 225 pia, cu a wordo torpedea y gesink dia 16 di februari 1942, cu e meta pa us’e pa e monumento, nos a kere sigur cu e momento a yega, pero un bes mas sin resultado. Pero nos no a entrega, porfin aña pasa esaki a wordo realisa ora cu un di nos miembronan, Sr. Andre Loonstra a acerca Sr. Albert de Veer cu tabata ocupa cu su proyecto, Boy Ecury Park. Sr. de Veer no a hesita y cu brasa habri a acepta nos idea y awe nos ta sinti nos mes hopi honra pa admira un bunita monumento hopi bishita pa nos localnan y turistanan. Esaki sigur a bira un medio unda tur esnan cu bishita e parke por siña di e rol importante cu nos isla, e refineria y otronan a hunga durante e guera desastroso aki. Como Presidente di e comision y tur miembro, nos ta hopi agradecido na Sr. De Veer pa e honor duna na nos.

Otro Logro. Tres aña pasa nos a ricibi un bon noticia for di e Comision di Guera na Hulanda cu a acepta nos peticion pa reconoce 37 victima mas di guera cu mester wordo inclui riba e plakaat di guera, entre nan dos Arubiano, Srs. Elias Lacle y Crismo Willems cu accidentalmente a perde nan bida door un bala di scopet. Danki na mi amigo y colega, Sr. Jos Rozenberg cu tabata traha na Defensie na Den Haag, Hulanda, cu a haci e peticion cu colaboracion cu Sr. Edic Croes di Archivo Nacional y mi persona nos a ricibi e confirmacion. E plakaat riba e monumento di guera na Adriaan Lacle Blvd. cu tin actualmente 129 nomber, pero mester ta 128, door cu tin e nomber di Herman Thielman dos biaha menciona, cu e 37 adicional mester bira un total di 165 nomber di victima. Sr. Rozenberg a manda un peticion pa gobiernonan di tur seis isla pa nan aprobacion, pero no a tende nada. Riba un dia cu mi a entrega un buki na Su Excelencia Gobernador, Sr. Fredis Refunjol, mi a hiba copia di e peticionnan y e lista di victimanan. Sr. Gobernador a bisa mi cu esey no ta cay bou di su encargo, pero e lo pasa esakinan pa Prome Minister Mike Eman. Si esaki a bay door, mi no sa pa motibo cu ami ni Sr. Rozenburg a tende algo di e peticion aki. Un cos si mi sa cu Gobierno di Corsou a duna nan aprobacion y un plakaat temporario cu e 37 victimanan a wordo instala caba for di aña 2015 den presencia di Sr. Rozenberg. Jos a caba di bisa mi cu e comision di guera ta bezig cu e plakaat final cu tur 165 victimanan riba dje. Nan mester a trah’e di nobo pa motbo cu nan a lubida Sr. Elias Lacle su nomber. Mi ta spera cu na mei proximo, den e proximo programa di Herdenking na e Plaza na Adriaan Lacle Blvd. e plakaat nobo ta instala cu lo haci e ceremonia mas efectivo.

Otro informacionnan interesante. E victima di mas edad cu a muri durante e periodo di e guera tabata Sra. Johanna Visscher-Willems, cu na edad di 83 aña ta perde su bida den un prison di guera Japones na Batavia, antes Nederlands Oost Indies. E victima di mas jong tabata Maria Theresia Wensing, un criatura di apenas cinco siman cu tabata cu su mayornan y otro tres yiu nabegando for di Amsterdam bek pa Corsou riba e barco crusero di KNSM, Simon Bolivar. Un dia despues e barco ta dal dos mina Aleman y sink den Noordzee banda di Harwich (UK). E criatura aki ta muri den e awa frieu den brasa di su mama kende a nenga pa lag’e bay. Tur dos a muri, y tambe un otro yiu mas bieu. E tata y dos otro yiu a sobrevivi. Diesdos victima tabata mucha, siete mucha muhe y cinco mucha homber. Un otro nabegante hopi jong di Boneiro tabata Claudio Benedicto Cicilia cu tabata un hoben di 15 aña trahando como Camarero Aprendis riba e tankero SS Punta Gorda di Lago cu a sink dia 18 di september 1944, despues cu a box cu un otro barco Ampetco II banda di e costa di Venezuela.  

Famia Martijn di Boneiro ta perde tres yiu homber trahando riba e tankeronan di Lago, ora cu e submarinonan Aleman ta ataca e isla y e tankeronan. E yiu homber di mas bieu, Hose Bernardo (1908) ta muri riba e tankero SS Oranjestad dilanti di e refineria di Lago ora e submarino U-156 ta torpedea y sink e barco. Un rato despues e yiu homber di mas jong, Dominico (1917) a perde su bida ora cu e submarino U-502 a torpedea y sink nan barco SS Tia Juana banda di golfo di Venzuela. E di tres yiu homber, Oliver Dominico (1910) a muri dia 18 di september 1944 ora su tankero Punta Gorda a box cu un otro tankero Ampetco II banda di Cabo San Roman, Venezuela.

Nace y muri riba un barco. E famia Landenga (tata, mama y yiu homber di 16 aña) ta nabega riba Simon Bolivar na november 1939. Tata tabata un capitan di un remolcador y trahando den e wafnan di Willemstad, Corsou. E yiu homber, Ulbo Ladenga (1923) a nace riba e remolcador di su mayornan, mientras nan tabata mara den e haf di Groningen, Hulanda. El a muri ora cu e Simon Bolivar a sink hunto cu su mama. Probablemente e tabata un di e poco personanan den historia cu a nace riba un barco y muri riba un barco.   

Un tata y yiu homber cu nunca a conoce otro. Cornelis van der Hoeven a nabega riba Simon Bolivar, solamente dos siman despues di su matrimonio na Rotterdam. Su señora lo a sigui riba e siguiente barco pa Corsou. E siguiente dia el a muri ora cu Simon Bolivar a sink. Simannan despues su señora a descubri cu e tabata na estado y e yiu homber a nace na augustus 1940. Cornelis nunca tabata sa cu su casa tabata na estado y nan yiu homber a perde su tata, prome cu el a nace.