- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Discusion grandi na IPKO tocante Venezuela
DEN HAAG – Cu aumento di e tension na Venezuela e presion riba e comunidadnan na y islanan di Antia tambe ta subi. Diaranson riba e prome dia di IPKO (Deliberacionnan Interparlamentario di Reino) na Hulanda tambe tencionan a aumenta, especialmente relata na e papel cu Reino ta hunga den e problematica di refugiado for di Venezuela.
Segun Menki Rojer (Corsou) diariamente tin 70 pa 100 Venezolano ta yega Corsou y entretanto tin mas cu 5000 cu ta kedando ilegalmente na Corsou. Ana Maria Pauletta (Corsou): “Nos ta papia di un fluho di migrante pa un isla chikito.”
Pa cada refugiado cu gara, segun e tin siete cu si ta yega tera. Corsou asina no por handle e aumento di criminalidad pa motibo di contrabanda di droga y arma mas, e ta bisa. Giselle McWilliam (Corsou) ta haña cu Hulanda mester ta para cla militarmente y politicamente. Segun Rojer Hulanda mester yuda e islanan. Niun di nan no ta bisa con.
Responsabel
André Bosman (Hulanda) ta haña esaki muchu facil bisa. “Si tur hende ta responsabel, niun hende no ta responsabel” e ta bisa e delegacionnan Caribense. E kier pa e paisnan Caribense tuma nan propio responsabilidad pa despues wak unda Reino mester yuda y di ki manera.
Despues Pauletta cu Bosman ta pega. E ta haña e miembro di VVD ta bagatelisa y ta ridiculisa e input di e islanan y e manera cu nan ta pinta e problema. Bosman ta haña cu nan ta ignor'e personalmente (no den microfon) y ta ripiti cu e islanan mester bira mas concreto. Antje Diertens (Hulanda) ta haña cu tur delegacion mester papia pa pensa solucion.
Legislacion di asilo
Miembro di Eerste Kamer Frank van Kappen (VVD) ta interveni. Reino ta responsabel pa Defensa, pero mantencion di derecho humano, maneho di asilo y deportacion ta asunto di e pais. “T’asina e cos ta, pero ainda tin e boluntad tambe di sostene otro”, Van Kappen ta bisa. “Pero por lo pronto ainda Hulanda lo no mete. Un di e cosnan cu e paisnan (Caribense) por haci, especialmente Corsou, ta drecha nan legislacion.”
Ey Van Kappen ta mishi cu un punto penibel pa Corsou: nunca e pais no a drecha su legislacion. UNHCR (Comisario Mayor pa Refugiado di Nashonnan Uní) ta trata e peticionnan pa asilo y ta pone esun cu pidi den un otro pais no na Corsou.
Aruba si tin legislashon di asilo, pero ey tambe e precupacionnan ta grandi. Segun Evelyn Wever-Croes ultimo lunanan 1500 Venezolano a ‘keda atras’. “Pa nos esaki ta hopi. Nos mester haci palabracion den relacion di falta di espacio.
Relato: Ret Karibense Foto Marisol Lopez Tromp
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
