ORANJESTAD – For di e siman aki, The Mill Resort tin un gerente general nobo, den persona di Willie Chin. Chin no ta un desconoci den e mundo hotelero, y despues di mas di 20 aña a bolbe su isla natal den un funcion asina halto. “Mi ta hopi orguyoso di ta bek na mi isla natal atrobe” Chin a splica NoticiaCla.com den su prome entrevista den su funcion nobo. Ela cuminsa su carera hotelero na Aruba cu companianan manera Holiday Inn y Sonesta (actual Renaissance), y despues a muda pa lugarnan manera Puerto Rico y Miami unda cu ela traha cu companianan grandi manera Intercontinental y Starwood. Hunto cu Chin, tin tambe otro Arubiano Shirley Geerman cu tambe ta bolbe su isla natal den funcion di Sales & Marketing Director di The Mill.
ACTO CRUEL DEN SU PROME SIMAN
Un experiencia menos positivo den apenas su prome siman di trabou, tabata e caso di asesinato cu a tuma lugar practicamente den ‘cura’ di e hotel. Algo sigur tragico y lamentabel mirando con cerca e ta di e hotel. Chin a splica cu esaki a sosode algun dia prome cu ela cuminsa cu e hotel, (su mes tin apenas 4 dia den e funcion) ela tuma nota di e caso cruel di asesinato dilanti porta di hotel (Olde Molen Nightclub). Como reaccion breve, Chin a splica cu e caso ta uno desafortuna, y mes momento ta clarifica cu e hotel no ta responsabel pa e club. Nan doñonan ta totalmente diferente y independiente di e club. Esey no ta kita afo cu e ta keda un caso lamentabel y cu ela sosode algun dia prome cu e cuminsa cu su labor como GM.
STAFF EXPERENCIA Y MOTIVA
Bek pa e operacion di hotel, Chin a splica cu e ta orguyoso di nos turismo na Aruba, y ta impresiona di mira con hopi esaki a crece desde cu ela bay for di nos isla. E staff cu e la bin haya na hotel, tambe e ta orguyoso di dje, sigur si mira cu gran parti ta hendenan cu tin hopi aña trahando cu e hotel. E hecho cu e tin hopi tempo for di Aruba ta algo bon, ya cu e ta bin cu wowonan ‘fresco’ y asina por duna un input diferente di loke tin caba, uzando su experiencia acumula di tur e añanan trahando den hoteleria. E intencion ta pa guia e hotel den un proceso total di renovacion, y pa una bes e renovacion ta completa, cambia di nomber y converti e hotel den un Courtyard Resort By Marriot. E trabou lo tuma por lo menos 12 luna pa completa, mirando cu ta haci esaki den fase ya cu e hotel lo keda den operacion durante e remodelacion.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.