ORANJESTAD- Famia di minister Paul Croes ta contradeci informacion di ministerio publico cu a keda publica den NoticiaCla.com riba e asunto di cargo extra. Den un comunicado cu e portal aki a ricibi, e famia ta mustra e.o. cu e informacion cu e portal aki a ricibi di ministerio publico no ta cuadra cu berdad. Manera ta conoci diaranzon e portal aki a raporta e informacion riba e tema. Ta vocero di ministerio publico a confirma y clarifica cu “E cargo di mensensmokkel a wordo agrega relaciona cu e hayazgo di e persona indocumenta na su cas”. Sinembargo, e abogado di Croes, Marije Vaders ta sigura segun famia cu ‘e asunto di traficacion di hende’, refiriendo na e Señora cu lo a ser haya na e cas, ‘no ta nada nobo’.
SEÑORA NO TA ILLEGAL
Segun e abogado, enberdad a haya un señora na e cas di e famia, pero cu e no tabata ilegal. Ademas e cuestion di mensen smokkel aki, a ser trece dilanti caba pa Ministerio publico for di 28 di Maart fecha cu nan a hasi inval riba cas di e Mandatario. Asina e famia ta alega. Segun e famia “vocero di Ministerio Publico mes a confirma esaki tambe, cu ta trata di e Señora cu tabata na cas di e famia, cual ta cay bou di traficacion di hende’.
PASENSHI PA INFORMACION
Alaves Abogado Mr. Vaders a pidi tur hende pa tin poco pasenshi y laga investigacion sigui su curso. Pronto lo yama un conferencia di prensa pa duna informacion di caso cu a causa hopi consternacion den e aña electoral aki.
.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.