Ta definitivo cu pa 2018 ta introduci plachi permanente pa auto

Ta definitivo cu pa 2018 ta introduci plachi permanente pa auto

Posted on 04/21/2017 11:12 am AST | Updated on 04/21/2017 11:53 am AST

ORANJESTAD – Decision ta tuma cu pa 2018 gobierno lo introduci un plachi di number permanente. Belastingdienst ta trahando riba e detayenan di esaki. Minister di finanza Angel Bermudez a sigura cu no ta bay sigui cu e sistema actual di plachi anual, ni sticker anual manera cu e ta aworaki. E intencion ta pa bin cu un formato mas moderno, unda cu por pensa e.o. riba plachi cu tin chip aden, holografische inscriptie y mas. No ta papia di plachi mas manera cu nos conoce awe, sino cu tin cierto tecnologia moderno aden.

PROBLEMA DI PASADO

Den pasado recien caba a purba haci esaki, pero no a logra. Segun e mandatario, en berdad no a logra haci e cambio prome, pasobra simplemente belastingdienst tabatin otro prioridad. Tabata enfoca tambe mas hopi riba e presupuesto pa por a cobra impuesto. “Na mi aparecer lo tin e cambio” Bermudez a bisa riba cambio di proceso di number di auto. Ora cu a confronta e mandatario kico exactamente mester compronde bou di ‘na mi aparecer’ , e mandatario a bisa cu e ta referi na e proceso cu ta buscando tur informacion riba e material cu lo bay uza pa number di auto, pa despues e wordo implementa. E detayes no ta conoci, pero si e ta bin ta un hecho segun e mandatario. Lo inclui comunidad tambe cu e tipo di dibuho y color cu e plachi lo mester tin, pues tin henter un proceso cu ainda falta, prome cu por ta cla cu plachi nobo. Pero e ta bira un hecho, segun e mandatario a sigura e portal aki.

  • Oduber: Situacion bergonzoso riba beach entre operadornan no lo wordo acepta

    Oduber: Situacion bergonzoso riba beach entre operadornan no lo wordo acepta

    ORANJESTAD – E situacion bergonsoso riba beach entre operadornan (manera por a mira riba video riba rednan social e dianan aki) no lo wordo acepta . Asina minister di infrastructura Otmar Oduber a laga sa pa medio di un comunicado. Segun e mandatario, e maneho di ‘3 strikes you’re out’ ta activo y lo tin cero tolerancia pa actonan asina.

  • Ex minister Sevinger na minister Oduber: ‘I don’t give a damn’!

    Ex minister Sevinger na minister Oduber: ‘I don’t give a damn’!

    ORANJESTAD – Durante su disertacion awe mainta den e reunion publico pa trata e proyecto di Green Corridor y Watty Vos Boulevard, ex minister responsabel pa e proyecto esta Benny Sevinger a declara cu e ta orguyoso di e trabou cu su team e tempo ey a haci pa e proyecto y cu e forma con a anda cu e proyecto tabata corecto. Ademas a cuestiona e forma con actual minister encarga cu e proyecto, Otmar Oduber kier resolve e problema, cu ta busca mas placa pa caba esaki. Pero loke mas a hala atencion, tabata e declaracion final di e ex minister, unda cu el a bisa cu kico cu e minister actual kier haci, ‘Be my guest.. pasobra I don’t give a damn! ”. Un declaracion cu rapidamente a bira e palabra di dia, tanto den Parlamento como riba rednan social. 

  • Aruba investigando informacion di articulo di Trouw riba contrabanda Venezolano

    Aruba investigando informacion di articulo di Trouw riba contrabanda Venezolano

    CARACAS/ORANJESTAD – Oro y diamanta for di Venezuela ta wordo transporta di contrabanda pa Corsou y Aruba na gran escala, y facilita pa ehercito Venezolano. Asina e corant Hulandes Trouw ta raporta den su edicion awe. E informacion cu periodistanan di e corant a haya, ta bin di ex general Cliver Alcalá. Prome minister Evelyn Wever den su prome reaccion awe riba e articulo a bisa di tabata na altura di e articulo en cuestiony cu mesora el a manda investiga si esaki ta conta enberdad pa Aruba, ya cu segun e articulo e enfoke tabata Corsou y no tanto Aruba. For di fuentenan gubernamental Venezolano, NoticiaCla a haya un reaccion inoficial indicando cu no ta duna mucho balor na e informacion ya cu Alcala ta conoci di ta un persona ‘malo’, osea no di confia. Mientrastanto, fuentenan periodistico di e portal aki ta mustra cu mientras cu e ex general tabata hopi cerca di ex presidente Chavez, el a distancia di Maduro pasobra e tabata critica hopi di su politica. Pues e reaccion di parti di fuentenan di gobierno, ta comprondible e ora. E articulo mes en cuestion ta di e periodista investigativo Bram Ebus, cu a haci un investigacion di e asunto aki. E ta bin na remarke net awor cu tin un impasse entre Aruba y Venezuela pa contrabanda di hopi material cu Venezuela tin problema cune. Ta netamente pa e asuntonan aki, Venezuela tin su frontera cu islanan ABC cera pa mas di un siman caba. Segun e presidente di e pais andino, Nicolas Maduro, e problema ta contrabanda di mafia. Diahuebs tin combersacionnan atrobe pa wak si ta sali di e impasse aki y si Venezuela ta dispuesto pa firma e acuerdo di concepto yega na dje diabierna anochi. Fuente: Trouw.nl.. foto cortesia REUTERS. 

  • Tin solucion pa reduci e ‘presion’ na Spoed Eisend Hulp

    Tin solucion pa reduci e ‘presion’ na Spoed Eisend Hulp

    ORANJESTAD – E introduccion di dos docter di cas extra na Spoed Eisend Hulp mester yuda reduci e tempo di espera ora cu un pashent ta na e departamento ey di hospital. Asina minister di Salud Dangui Oduber a bisa dialuna mainta den un conferencia di prensa. Segun Oduber, tin dos localidad habri na hospital unda cu AZV lo cubri dos huisarts cu ta specialmente atende y asisti tur caso di emergencia. E pashent cu yega, lo wordo trata. Esun cu resulta di no ta emergencia, e 2 docternan di cas lo trata. Asina e mandatario lo kier baha presion riba SHE, y reduci tempo cu pashent ta warda pa ayudo medico. Awor ta buscando si tin docter di cas disponibel cu por cuminsa di biaha, y si ta pa e minister, esaki por cuminsa dentro di un luna caba. “Pero por lo menos ya tin palabracion entre hospital i AZV pa cubri e gastonan” Oduber a bisa.

  • Wever: Integriteitskamer ta realidad prome cu fin di 2018

    Wever: Integriteitskamer ta realidad prome cu fin di 2018

    ORANJESTAD – Ta e intencion pa durante e prome aña di gobernacion Wever Croes, introduci e asina yama ‘integriteitskamer’ osea e ‘camber di integridad’. E camber aki tin cu scrutina tur proyecto y asunto di gobierno pa sigura cu esaki ta cumpli cu tur norma di integridad. Asina prome minister Evelyn Wever Croes a bisa dialuna durante conferencia di prensa. E structura di e camber aki sinembargo ta hopi curu ainda. E unico cos cu ta sigur, ta cu e ta bin e aña aki ainda, y cu e ta consisti di un grupo di persona ‘no politico’, sino e ta ‘beat the whole purpose’.

  • Gobierno a lamenta cu CITGO Aruba a nenga parlamentarionan Hulandes informacion

    Gobierno a lamenta cu CITGO Aruba a nenga parlamentarionan Hulandes informacion

    ORANJESTAD - Gobierno di Aruba ta lamenta cu Citgo Aruba a nenga informacion na parlamentarionan Hulandes. Esaki tabata e reaccion official un dia despues cu dos parlamentario Hulandes a reclama publicamente cu nan no a haya informacion di e refineria y a wordo prohibi entrada. Ta trata di parlamentarionan Hulandes van Raak y Bosman cu tabata na Aruba siman pasa pa atende reunionnan interparlamentario entre Aruba Hulanda y Sint Maarten. Pa cu e reunion aki e delegacion Hulandes a pidi Parlamento di Aruba pa por regla un bishita na refineria of por lo menos pa Citgo duna un presentacion na Parlamento. Lamentablemente Citgo a nenga di haci esaki, y e dos Parlamentarionan a bay busca informacion nan mes. Nan a bay na e refineria y locual nan a mira a decepciona nan. Nan a mira hopi hero bieu, y nan no a mira practicamente ningun actividad. Riba medionan social nan a cuestiona esaki masha hopi mes y un video di sr. van Raak “locual mi no tabata mag di wak na Aruba” a circula den henter Reino. A puntra Prome Minister di Aruba su reaccion, y sra. Wever-Croes a indica cu e ta lamenta cu Citgo no a duna e Parlamentarionan informacion tocante e proyecto. Pa gobierno tambe aparentemente ta dificil pa haya informacion. Tin reunionnan planea e siman cu ta bin pa haya mas informacion di e status di e proyecto. Mes momento Gobierno ta studiando e contractnan cu Gobierno di AVP a cera cu Citgo pa operacion di e refineria, pasobra indicacion ta cu e inversionnan no a tuma lugar y no tin claridad ki tempo nan lo tuma lugar. Gobierno di Aruba a anuncia siman pasa caba cu a institui un comision independiente pa studia e contract y conseha Gobierno kico pa haci cu n’e. Foto cortesia di gobierno su oficina di prensa.   

  • Powered by SETAR