WILLEMSTAD – Ministerio publico a demanda 26 aña di prison pa ‘Nini’ Fonseca awe tardi. Manera Noticiacla.com a raporta caba, awe, cuater aña despues di asesinato di Helmin Wiels, nos ta dilanti un fase nobo. E asesino, Elvis Kuwas, a keda mientrastanto condena, awor ta toca turno na e middleman: Burney ‘Nini’ Fonseca.
A HACI TUR COS PA TRECE BERDAD DILANTI
Segun OM, polis y Ministerio Publico a hasi tur cos den nan alcanse pa trece e berdad dilanti. Na nan opinion tin, a base di e dossier actual, suficiente prueba cu Fonseca a hasi su mes culpabel na co-responsabilidad of provocacion di asesinato, mata of laga mata Helmin Wiels. Esaki door di ehecuta un plan adelanta traha. For di diferente declaracion di testigo, entre otro di e propio Kuwas, ta sali na cla e rol di Fonseca segun OM. George Jamaloodin y Robbie dos Santos ta ser sospecha di a duna Fonseca e encargo pa busca un hende pa mata Wiels. Hunto cu Luigi ‘Pretu’ Florentina el a huur Kuwas pa mata Wiels. Fonseca y Florentina a fungi manera un ‘makelaar pa mata’ y a organiza e asesinato. Florentina a tene contacto cu e culpabelnan finalmente, Fonseca cu esnan cu a duna encargo. Fonseca tabata e homber grandi tras di pantaya cu un rol crucial .
EFECTO DI MATA WIELS
Door di mata Wiels a ranca un homber kerí for di su famia y for di e proceso democratico. Esey tabata e intencion tambe di Fonseca: comete un asesinato politico. Anto no door di comete esaki e mes, pero door di cobardia laga otro hende hasi e trabou. Kuwas tabata e pistol den man di Fonseca.
PERDE LIDER
Segun OM, no ta Pueblo Soberano so a perde su lider, pero tambe un lider ku tabata ser carga door di Corsou. Esun cu comete e hecho condenabel aki di likida un politico, merece di ricibi un castigo largo. Bala (municion) y violencia nunca no por tuma e luga di palabra den un democracia i un pais di estado di derechi.
CORSOU DEN SHOCK
Corsou, segun OM, te dia di awe te ainda ta di shock door di e asesinato, tambe pa motibo cu no a hiba tur responsabel ainda dilanti mesa berde. Fonseca ta nenga di duna cuenta y razon y ta nenga di duna claridad den e investigacion. Ku esaki e ta stroba e husticia cu Wiels, su famia y comunidad merece di haña. Fonseca a keda condena mas biaha, tambe despues di e hecho aki. Fonseca nunca no a mustra duele of duda moral ora el a ricibi e encargo of reparti e tareanan cu a conduci na asesinato di Wiels.
DEMANDA MAS HALTO
Ta pesey Ministerio Publico ta hasi un demanda mas halto cu ta posibel cu por pidi pa Fonseca: 26 aña. Mester desconta esaki for di e castigo di 4 aña cu el a ricibi recientemente. Neto ta nifica un demanda di 26 aña di prison. Ministerio Publico den e caso aki no ta yega na un demanda di bida largo pa motibo cu un castigo asina ta ser duna normalmente na momento di mas cu un morto of na momento di resediva di delito contra bida.
INVESTIGACION KEN A DUNA ENCARGO
E investigacion den e caso aki pa determina esnan cu a duna encargo ta continua. Bon investigacion ta un trabou delicado Y ta tuma su tempo. Mientrastanto a pidi Venezuela extradicion di Jamaloodin, tambe pa su envolvimento den asesinato di Wiels. Tin ainda suficiente posibilidad pa acumula prueba. Tanten cu esaki ta e caso, no ta stop e investigacion. Foto cortesia matutino Extra.
WILLEMSTAD - E frakshon di MFK ta hopi preokupá ku kasnan ku no tin suministro ainda di awa. P’esei nan ke un reunion públiko, kaminda ta invitá minister Ruthmilda Larmonie-Cecilia i su kolega minister Ruisandro Cijnte pa ta den sala di parlamento i asina debatí ku nan riba e tópiko aki.
WILLEMSTAD. – E akusado V.V. (33) nasé na Aruba su kaso a keda tratá den su ousensia. Segun akusashon dia 21 di febrüari último, el a trata na eksportá 1.535 gram di mariwana.
WILLEMSTAD - Ministernan di Enseñansa Robbert Dijkgraaf (Hulanda) i Sithree van Heydoorn (Kòrsou) den presensia di minister di Edukashon di Aruba, Endy Croes a firma ayera un akuerdo pa instituí e beka Tula. Pa medio di e beka aki un studiante di Kòrsou por hasi un estudio di historia na Hulanda na nivel di “bachelor”.
ORANJESTAD - E di dos konferensia di trabou di SEA a tuma lugá awe i ayera na Kòrsou, unda tur isla di Karibe i Hulanda a partisipá. SEA, òf Aliansa Edukashonal Stratégiko, tin komo meta primario stimulá éksito den estudio i chèns igual pa studiante karibense. Ademas, a presta atenshon tambe na e prioridatnan di e proyekto SEA.
WILLEMSTAD – Juan Luis Guerra y 440, Maluma y Jennifer Hudson a keda añadi na e line up pa e proximo Curacao North Sea Jazz Festival na autustus proximo. Juan Luis Guerra ta presenta riba diabierna 30 di augustus y Maluma y Jennifer Hudson riba diasabra 31 di augustus. Fuera di e cantantenan grandi aki, tin Marc Anthony tambe y Eros Ramazoti cu ta presenta tambe durante e festival aki.
WILLEMSTAD – Mientras cu na Aruba, ta wardando kico Ministerio Publico ta bay haci cu e doño cu a maltrata su cacho Khaleesi, te cu e la muri, na Corsou, polis a detene un homber cu a tira un cacho mata. Tabata diadomingo pasa den e bario di Kanga, cu e homber aki di 31 aña a menasa un otro homber cu arma y maltrat’e y tira su cacho mata. E la bira fugitivo, pero finalmente diahuebs mainta 7’or polis a pone man riba dje na Suffisantweg. Despues a tene un entrada hudicial na su cas na Kanga. E homber ta deteni, pendiente e resultado di e investigacion.