Posibel keho falso entrega pa maltrato di cachonan di minister Paul Croes

Posted on 04/18/2017 1:15 pm AST | Updated on 04/18/2017 2:38 pm AST

ORANJESTAD – Tin indicacion cu keho falso a keda entrega recientemente contra minister Paul Croes pa ‘maltrato di bestia’ esta dierenmishandeling. Informacion cu NoticiaCla.com a ricibi, ta mustra cu algun dia pasa a drenta un keho na unda ta acusa Croes pa "dierenmishandeling" . E minister cu ta amante di bestia y cu tin tres fila Brasilera na su cas y lo den perfecto condicion awor a bira motibo pa un denuncia contra di dje.

VETERINARIO TA CONTRAARESTA E KEHO

Un carta firma pa su veterinario dokter Contreras a substancia loke e Minister mester a splica Polis pa contraresta e acusacion falso cu a surgi contra dje. “Cachonan cu tur nan vacuna nan na tempo, suficiente espacio den cura (no mara na cadena), estado di salud perfecto y higienicamente limpi ta algun di e puntonan cu a wordo verifica pa cuerpo policial” e fuentenan a sigura e portal aki. A entrega tambe na Cuerpo policial potretnan y tambe un declaracion di e dokter. Fuentenan ta kere cu esaki ta un plan maligno pa trece e mandatario den descredito.

DEN MAN DI ABOGADO

No ta conoci ainda kende a entrega e denuncia, pero abogado di e minister ta tras di e caso. Cuerpo policial despues di e verifica un que otro a considera e denuncia como cera, mirando cu tabata un acusacion falso cu ta mustra como un accion politico. Despues cu Ministerio Publico a drenta e residencia di Minister Croes dia 28 di maart aparentemente en busca di placa, droga of arma (y lo no a haya nada), awor ta trata di un denuncia falso pa abuso di bestia.

  • Grupo di amante di bestia a protesta dilanti ‘Kill Cage’

    Grupo di amante di bestia a protesta dilanti ‘Kill Cage’

    ORANJESTAD – Un grupo respeta di persona a protesta diamars atardi dilanti di e asina yama ‘Kill Cage’, of ‘Afmaakhok’ na Wayaca, banda di e Animal Shelter. Motibo di e protesta, ta pa haya atencion di esnan encarga di e trabou di pone e cacho y pushinan drumi cu ta wordo deposita na e sitio tur dia. E grupo di Crijijo Trappers a lidera e protesta aki y a pidi pa cumpli cu un lista di demanda, cu nan a comparti cu gobierno tambe. Segun nan, e reglanan aki por mehora e situacion den cual e bestianan ta wordo ‘poni drumi’. Nan tin un stappenplan cu dentro di poco lo keda anuncia. Segun e grupo, servicio veterinario cu ta responsabel pa e trabou, no ta haciendo nan trabou bon, ta pone e bestianan mata den un forma cruel y contra regla internacional. E departamento concerni un dia prome a desmenti esaki y ta lamenta cu ta plama informacion ‘falso’ riba rednan social.

  • DTI ta muda pa su edificio nobo na Barcadera

    DTI ta muda pa su edificio nobo na Barcadera

    ORANJESTAD – Dienst Technische Inspectie (DTI entrante diahuebs 18 di januari lo inicia cu e proceso di mudamento pa nan edificio nobo situa na Barcadera 153. Den cuadro di esaki DTI no por ricibi yamada via 584-5300 di cliente te cu dialuna 29 di januari. Dialuna 22 di januari pa dilanti DTI ta bay den full swing cu mudamento pa Barcadera y lo ta cera pa publico. Diamars 30 di januari DTI ta planea pa ta operacional atrobe. (lo monitor e proceso y ahusta fecha si ta necesario). Dialuna 5 di februari lo ta 100% operacional atrobe. Por yama ora di urgencia na 593-7945 pa servicio/informacion durante e periodo cu ta cera. No ta tuma cita pa keur auto. Pa accidente na pia di trabao por yama na 593-7913. DTI ta pidi disculpa pa e inconveniencia.

  • Vd Berg: Ta pone bestianan na afmaakhok drumi di forma humano

    Vd Berg: Ta pone bestianan na afmaakhok drumi di forma humano

    ORANJESTAD – Servicio veterinario ta pone tur bestia cu keda laga atras na e asina yama ‘afmaakhok’ of ‘kill cage’, drumi den un forma responsabel, humano y segun standard internacional. Asina hefe di e departamento Riem vd Berg a sigura durante un conferencia di prensa dialuna atardi. E conferencia tabata uno di urgencia, den un intento pa evita cu diamars awor un grupo di persona tene un accion di protesta na e sitio. Vd Berg a purba sigura na varios momento cu ta e unico forma cu tin aworaki pa resolve e problema di sobre poblacion di bestia. E otro forma segun vd Berg, ta concientizacion pa ta un doño responsabel di bestia.

  • Kock: Protesta mester cambia maneho di Kill Cage na Wayaca

    Kock: Protesta mester cambia maneho di Kill Cage na Wayaca

    ORANJESTAD – E forma con departamento veterinario ta pone cacho y pushi drumi, ta cuestionable. Como tal un di e fundacionan cu ta rescata bestia riba caya, Crijojo Trappers ta protesta diamars atardi 5’or na e ‘popularmente’ yama Kill Cage of ‘Afmaakhok’ di veterinaire dienst na Wayaca. E meta segun e lider di proyecto Mervine Kock, ta pa concientiza nos hendenan kico ta tuma lugar eynan y pa trece cambio na e proceso cu ta pone e bestianan drumi. Asina Kock a bisa den e programa NoticiaCla LIVE riba Facebook.

  • Segun Venezuela, cambio di ultimo ora di Hulanda a tranca acuerdo

    Segun Venezuela, cambio di ultimo ora di Hulanda a tranca acuerdo

    ORANJESTAD - 'Debi cu Hulanda a haci dificil na ultimo ora, e acuerdo entre esnan cu a reuni diabierna pa mas di 6 ora largo, no a keda aproba'. Fuentenan na Caracas di NoticiaCla y prensa Venezolano cu tabata presente, a bisa despues di nan regreso diabierna anochi. Tabata durante e ultimo parti di e negociacion, cu Hulanda kier a trece cambio den un paragrafo, pa cual e delegacion Venezolano a bisa cu nan mester haya aprobacion na Caracas prome, ya cu e cambionan di 'ultimo ora', nan no ta autoriza pa aproba riba nan mes. Esey a pone cu mester a para e reunion y keda pendiente pa un aprobacion pa despues nan firma e concepto di acuerdo, definitivamente diahuebs awor durante un otro reunion na Aruba. Kico e cambio ta, no ta conoci. Foto ta di delegacion Venezolano durante e reunion di diabierna ultimo.

  • ATA a firma acuerdo cu hotel management school Maastricht

    ATA a firma acuerdo cu hotel management school Maastricht

    ORANJESTAD - ARUBA TOURISM AUTHORITY A FIRMA ACUERDO CU HOTEL MANAGEMENT SCHOOL MAASTRICHT ORANJESTAD – Recien, Oficina di Turismo di Aruba a firma un acuerdo cu Hotel Management School Maastricht (HMSM) un acuerdo pa asina eleva e nivel di servicio aun mas den nos sectornan di hospitalidad y turismo, den su totalidad. Esaki mas cu claro por medio di e Aruba Certification Program (ACP).HMSM, un institucion reconoci mundialmente, ta bay desaroya conhuntamente cu ACP diferente modulo di curiculo di servicio, como tambe entrena nos profesionalnan local pa asina consecuentemente sigui transmiti e conocemento aki na nos forsa laboral riba tur nivel. Pa haci esaki posibel, HMSM a bin ta haci desk research den december y awo a bishita Aruba pa combersa cu nos socionan riba diferente topico pa por identifica y compronde miho e contexto cultural, comercial y turistico di nos sociedad. Consecuentemente lo crea y incorpora un standard di calidad den nos servicio cu ta den linia internacional y di es manera aki lo desaroya un programa conforme necesidadnan den nos mercado y bao di nos hendenan. Mediante e acuerdo aki, Aruba Certification Program lo conta cu manualnan di entrenamento y materialnan relevante pa e curso, entrenamento di nan personal y un curiculo di servicio. Introducion di e cursonan nobo lo tuma luga den e luna di maart / april proximo. Esaki ta nifica cu banda di e programa actual, pronto ACP lo expande locual ta ofrece na cursonan y lo ahusta e programa actual asina tumando e oportunidad pa update un cu e otro. Expansion di e cursonan ta wordo desaroyo a base di feedback cu a ricibi e siman aki. Hotel Management School Maastricht ta forma parti di e ZUYD University of Applied Sciences na Hulanda. E ta consisti di tres departamento cu ta: e scol mes cu tin mas di 65 aña di trayectoria educacional, produciendo rond di 250 hoben profesional pa aña, hobennan cu ta wordo selecta pa forma parti di e skol; e Teaching Hotel Chateau Bethlehem reconoci internacionalmente como un centro di aprendisahe y desaroyo maneha door di studiantenan; y e HMSM Hospitality Consultancy cu ta un grupo di profesionalnan cualifica cu ta conecta e conocemento di HMSM cu e mundo di hospitalidad internacionalmente. E ultimo aki ta esun encarga pa desaroya e programa pa Aruba Certification Program. Aruba Certification Program a wordo crea na 2011 cu e proposito pa eleva e nivel di servicio. Awe orguyosamente ACP a logra certifica alrededor di 4000 particpante . Oficina di Turismo y ACP a haya den Hotel Management School Maastricht un socio cu cual ta desaroya e componente specifico di servicio den e programa existente y cu cual lo amplia e oferta di cursonan bao di ACP. E desaroyo aki ta den linea cu e plan ‘Cu Mira Pa Futuro’, unda ta delinea tambe e necesidad di enfoca riba mehoracion di e servicio cu nos ta brinda nos bishitantenan en general.

  • Powered by SETAR