- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Minister a duna ordo pa investiga iregularidadnan na Colegio Arubano
ORANJESTAD – Minister di enseñansa Michelle Hooyboer Winklaar a duna orden pa inicia un investigacion riba varios iregularidadnan na Colegio Arubano, variando di supuesto fayo riba tereno di personal, y tambe e administracion financiero di e scol. Ademas ta inicia un investigacion riba posibel conflicto di interes pa loke ta mercancia pa scol y algun posicion vulnerabel, den cuadro di ‘good governance’. “A base di e resultado di e investigacion aki e mandatario lo evalua pa tuma pasonan adicional. Directie Onderwijs y Inspectie Onderwijs ta encarga cu e investigacion aki. Asina e mandatario a bisa den un carta dirigi na Diocesis (Bisdom) na Corsou diaranzon.
CONTENIDO DI E CARTA
Den e carta di tres pagina, Hooyboer ta splica cu gran parti di e accionan ta basa riba preocupacion di e comision di mayor OCCA riba e ‘continuidad’ di Colegio Arubano. Algun tempo atras, Colegio mes pa medio di un comunicado extenso a elabora riba e topico aki. E mandatario ta gradici Bisdom pa por a reuni en persona y intercambia riba e tema menciona. Mientras cu e mandatario ta riba e mesun liña cu tin enseñansa catolico a pecho. Loke nan no ta mira mescos ta e forma con ta andando cu e problemanan na Colegio. A mustra den e carta cu obviamente papia solamente no ta suficiente y cu mester tuma accion. Ta haci mencion entre otro di problema cu directiva di scol, cu ta un ‘consecuencia di falta di transparencia y disponibilidad pa scucha otro’. Tambe ta papia di un falta ‘structural’ na confianza y e confianza pa cuminsa un discusion habri cu otro.
RETIRA DOCENTE FOR DI COMISION DI SELECCION
Como un ehempel, e mandatario ta mustra riba e hecho cu e siman aki ainda Hunta di supervision a retira tres docente for di e comision di seleccion pa un rector nobo. E rason duna tabata cu nan lo a firma e peticion pa proposicion pa un conrector nobo.
Esaki ta mustra cu no tin confianza den opinion di e docentenan, cu ta puntonan cardinal pa ‘drecha un organisacion internamente’. Esaki ta nifica cu e peticion pa tin un hunta cu por tin ‘algo di bisa tambe’, hopi mas necesario awor, manera cu a keda sugeri pa docente y comision di mayor. A sugeri pa den e comision ey, tin tambe un representante di gobierno, mirando cu ultimo 4 añanan gobierno a subsidia no menos cu 72 miyon florin den e scol. E mandatario a mustra tambe cu como mandatario responsabel pa enseñansa na Aruba, e mester responsabilisa su mes dilanti Parlamento ora cu ta trata di mal prestacion di fondonan publico y mal maneho di trahado y alumno di un scol cu ta wordo subsidia pa gobierno.
NO TA SOSTENE STATUS QUO
E mandatario a mustra cu contrario na peticion di Bisdom pa laga e situacion un rato den un ‘status quo’ pa duna partidonan chens pa ‘haya otro’, no ta suficiente, pa por drecha e asuntonan urgente cu ta malo. Segun e mandatario, mirando cu Bisdom no kier mete aworaki a termino corto pa yuda soluciona e problema, e ta haya su mes obliga pa haci esaki su so. Y basa riba esey, e ta dicidi pa tuma e accionnan ya menciona. Lesa e carta completo AKI.
Video: Ryçond Santos do Nascimento ta considera su entrada den AVP como un eror
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
Minister a anuncia mando nobo temporal na Cuerpo di bombero
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
Acuerdo di colaboracion entre instancianan di salud mental den CAS-BES reforsa
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
Gobierno y CAFT ta den proceso pa reemplaza actual miembro pa Aruba ora su termino vence
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
Oduber: Maneho nobo pa haya permiso pa hotel; Ta permiti solamente Boutique hotels!
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Follow NoticiaCla
