Bonaire protestando contra reduccion di pensioen

Posted on 04/10/2017 10:48 am AST | Updated on 04/10/2017 11:02 am AST

KRALENDIJK – E isla di Bonaire ta practicamente plat awe dialuna. Varios sindicato , entre nan USIBO a yama un welga general pa protesta e reduccion den pago di pensioen. Miembronan a acumula riba Wilhelminaplein for di 8’or awe mainta. Schoolnan ta cera y varios departamento di gobierno ta cera. Trahadornan di RCN, OLB ( gobierno di Reino resp. local) y esunnan cu ta afilia na e pensioenfonds di 'gobierno' PCN. Solamente esnan di scol secundario tin cu presenta conforme roster pa examen. Sindicatonan solidario cu ta representa otro sectornan manera WEB y CUROil ta na un hilo fini pendiente tambe pa join. Segun Aymed Ayubi di Live 99FM, tin algun instancia ainda cu tin cu dicidi despues di merdia, pa pone e isla completamente plat. Esey por tin efecto serio mirando cu ta papia e ora cu hasta aeropuerto lo por cera durante di welga aki. Foto cortesia Live 99 fm

 

  • Periodistanan Colombiano ta exigi liberacion di coleganan di programa Spoorloos

    Periodistanan Colombiano ta exigi liberacion di coleganan di programa Spoorloos

    BOGOTA - Periodistanan di e fundacion Colombiano pa libertad di prensa FLIP, a bula aden pa defende nan coleganan Hulandes secuestra na Colombia esta Derk Bolt y Eugenio Follender. Ambos ta traha cu e programa 'Spoorloos' cu ta conoci pa ta busca paradero di famianan perdi di ciudadanonan Hulandes. Ironicamente nan mes 'disparce' durante un buskeda na Colombia, ora cu nan a wordo secuestra pa e grupo guerillero ELN. E periodistanan Colombiano a protesta cu pancarta riba plaza na Bogota y riba pancarta e texto cu nan kier liberacion di nan coleganan. Un dia anterior accionnan militar a wordo para, como gesto pa e guerilleronan para nan accion y libera e periodistanan. E periodistanan a disparce den e jungle di Cucuta. 

  • Diputado di Bonaire Clark Abraham den libertad atrobe

    Diputado di Bonaire Clark Abraham den libertad atrobe

    KRALENDIJK - Diputado di Bonaire Clark Abraham a recobra su libertad awe. Asina vocero di OM Norman Serphos a confirma. Segun Serphos, Ministerio Publiko BES a presenta e sospechoso  Abraham awe dilanti un Hues-Comisario. OM ta di opinion cu e investigashon di KPCN a presenta suficiente sospecho serio pa pidi Hues-Comisario su enkarselacion. Parew cu esei OM a pidi pa schors e encarselacion bou di condishonan stringente pa evita cu e sospechoso ta ripiti e hechos. Condishonan manera entre otro cu e sospechoso ta keda un distancia for di e cas di su partner cu mientrastanto ta biba na un otro adres. Tambe cu e sospechoso ta sigi coopera cu raportahenan. Bou di e condicionan aki e por warda persicucion penal liber na cas.

  • OM: Diputado Clark Abraham ta sigui deteni na Bonaire

    OM: Diputado Clark Abraham ta sigui deteni na Bonaire

    KRALENDIJK - Conocido politico y actual diputado di Bonaire Clark Abraham ta sigui deteni. Vocero di ministerio publico Norman Serphos a confirma dialuna mainta cu Clark ta aktualmente den su encarselashon preventivo di 2 x 24 ora (inverzekeringstelling). Mayan, djamars 20 di juni 2017, Fiskal tin cu tuma un desicion pa loke ta trata su prolongacion di encarselacion preventivo. E ta ser sospechá door di Ministerio Publiko BES di entre otro di maltrato, stalking, violashon di privacidad (huisvredebreuk) i saca un menor di edad for di custodia di mayor sin autorisacion. Den e caso aki tin un denuncia haci.

  • Diputado Clark Abraham di Bonaire deteni

    Diputado Clark Abraham di Bonaire deteni

    KRALENDIJK. - A detene e homber Clark Abraham diasabra anochi alrededor di 8 or na warda di polis di Boneiro. Asina vocero di OM Norman Serphos a confirma pa NoticiaCla. E ta ser sospecha entre otro di maltrato, stalking, violacion di privacidad (huisvredebreuk) y saca un menor di edat for di custodia di mayor sin autorisacion. Den e caso aki tin un denuncia haci. E detencion a tuma lugar riba ordo di Fiscal di Ministerio Publico (OM) BES. KPCN ta encarga cu e investigacion.

  • Aruba remarcablemente ausente na conferencia Ombudsman

    Aruba remarcablemente ausente na conferencia Ombudsman

    KRALENDIJK – Aruba tabata remarkablemente Ausente na e Conferencia di Caribbean Ombudsman Association (CAROA), Cu a tuma lugar e siman aki na Boneiro. Asina presidente Nilda Arduin, defensor di pueblo di Sint Maarten y Ombudsman Nacional Reinier van Zutphen ta bisa. Van Zutphen como ombudsman di BES tambe ta miembro di CAROA y e biaha aki tabata anfitrion di e conferencia di cada dos aña.

  • Aruba ausente di paisnan Caribense aproba pa proyecto financia pa Europa

    Aruba ausente di paisnan Caribense aproba pa proyecto financia pa Europa

    GOSIER, Guadeloupe – Un lista publica e siman aki di proyectonan aproba pa financiamento Europeo pa e periodo valido te 2020, ta mustra cu di e 11 proyectonan aproba, Aruba ta e notabel ausente. E lista a keda publica durante un reunion na Guadeloupe e siman aki y reproduci pa e medio Caribbean News Now. Notabel ta e participacion di Bonaire, Corsou, St Maarten y St Eustatius. Kico e motibo ta cu Aruba no ta wordo menciona, no ta conoci. Varios di e proyectonan tin temanan specifico cu no ta aplicabel pa Aruba. Sinembargo tin otronan cu ta mas general, y cu Aruba a wordo laga afo. E suma aproba ta €85.7 million euro. E proximo comision di seleccion lo reuni na september pa studia proyectonan nobo. Foto cortesia Caribbean News Now. 

  • Powered by SETAR