DEN HAAG – E caso di Mitch Henriquez (dfm) lo wordo trata probablemente na november di e aña aki. Esey a keda indica awe mainta na Hulanda ora cu Corte a trata e caso pro forma atrobe. E caso mester a wordo trata cu contenido awe, pero a keda posponi te otro fecha. Awe Corte a pidi un di tres experto di Nederlands Forensisch Instituut, pa investiga e causa di morto di Mitch Henriquez. E experto ta e medico forensico Daan Botter. Na tur parecer, e caso lo tuma lugar awor entre 13 pa 24 di november, cu un sentencia mas probabel dia 21 di december.
POSPONE CASO
Motibo pa a pospone e caso tabata e cu defensa di dos agente, awor nombra como agentenan DH01 y DH02, a bin cu un rapport di e medico forensico Kees Das. Segun su analisis e morto di Henriquez no tabata a consecuencia di e nekklem, sino un atake cardiaco. Sinembargo ta parce awor cu e medico aki no a investiga e 300 foto di e sectie, y tampoco no a investiga e curpa di Henriquez, sino cu ela basa su mes riba e informacion den e documento. Corte awe mainta a mustra cu nan no ta tuma defensa na malo cu nan no a bisa cu tabatin un otro investigacion andando.
PARLAMENTARIO DE SOUSA
Den corte, tabata presente parlamentario di AVP Desiree de Sousa Croes, cu ta presidi e comision di husticia di parlamento di Aruba. E ta preocupa cu e forma con cos ta bayendo y kier a presencia esaki pa asina wak con cos ta bay cu e proceso legal.
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
SCHIPHOL -Durante e vacantie di mei proximo (otro luna) aeropuerto di Schiphol ta cuminsa usa scanner di seguridad nobo cu mester agilisa e trafico di persona na e aeropuerto. Schiphol a reemplasa tur e scannernan cu cual pasahero ta keda controla, cambia pa ehemplarnan mas liher. E ehemplarnan nobo tin mester di menos di 3 seconde pa wak si un biahero tin artefactonan prohibi den nan posesion. Tambe door di e tecnologia nobo, tin necesidad di menos listramento. E aeropuerto ta pronostica 10% mas biahero cu aña pasa y ta premira cu nan tin cu procesa minimal 70 mil pasahero diario. Esaki ta cantidadnan mes halto cu den vacantie di zomer. Aunke cu tin e scannernan nobo, no ta nifica necesariamente cu e filanan ta bira mas chikito.
DEN HAAG - Un areglo di supsidio pa inisiativa sosial ku ta fásilmente aksesibel. Kambio di nòmber grátis pa desendiente di katibu bibá na Hulanda Oropeo i Hulanda Karibense. Mas atenshon na prevenshon di diskriminashon i rasismo. Invershon den herensia kultural. I amplia konosementu di e manera ku pasado di sklabitut tin afekto te ku awor. Esaki ta algun di e pasonan konkreto ku gabinete hulandes a tuma despues di e diskulpa di Gobièrnu pa e pasado di sklabitut. E manera ku ta yena e asina yamá ‘espasio tras di e kòma’ ta un proseso kouteloso ku embolbimentu aktivo di desendientenan. Esaki ta pará den e karta di progreso tokante e programa di pasado di sklabitut ku gabinete hulandes a manda awe pa e parlamento.
AMSTERDAM – E instancia similar na DVG na Aruba, pero na Hulanda esta RIVM a instala un Outbreak Management Team (OMT) nobo, manera tempo di Covid, pero e biaha aki pa sarampi (mazelen). OMT ta bisa si cu e situacion no ta agudo, pero si ta conseha e minister di saloud pa tuma medidanan extra. Te awor tin 64 caso di sarampi registra cerca RIVM. E la cuminsa cu un kluster na trahadornan migrante na Limburg. Pero awor ta mustra cu mayoria di casonan di sarampi ta den region di Eindhoven.
AMSTERDAM – Un grupo di accion ‘Extinction Rebellion (XR)’ kier causa ‘problema’ diasabra dia di Rey na Amsterdam Hulanda, door di blokea un ader principal di e ciudad gandi aki, esta e A10, un biaha mas. E grupo di protesta aki kier pidi Rey Willem-Alexander pa papia contra e financiamento di e industria fosil. E intencion ta pa blokea a caminda for di 12’or di merdia na e ringweg na altura di e ex oficina principal di ING. E grupo kier pa e instituto aki stop di financia e industria di fosil. Si e Rey papia contra e intento di financiamento aki, e grupo lo stop nan accion.