Postura VVD pa Aruba y resto Caribe Hulandes no ta cambia

Postura VVD pa Aruba y resto Caribe Hulandes no ta cambia

Posted on 03/17/2017 9:22 am AST | Updated on 03/17/2017 1:24 pm AST

DEN HAAG – “E postura pa cu Aruba y e islanan di Caribe Hulandes ta keda mescos” parlamentario pa partido VVD den Tweede Kamer Andre Bosman a sigura NoticiaCla.com. “Mi ta hopi contento cu e pueblonan di Aruba, Corsou y St Maarten. Solamente cu e gobernantenan mester drecha nan situacion” Bosman a bisa. Cu esey, e ta referi na e situacion financiero mester ta na ordo. Di otro banda, presidente di e comision di Reino de Tweede Kamer Jeroen Recourt y colega Roelof van Laar di PvdA no ta bolbe mirando cu nan no a keda eligi. Esey por trece cambio den cierto miembrecia y cu ne. Esaki aunke cu Bosman ta sigura cu cos ta keda manera cu e tabata.

PASAPORTE Y INDEPENDENCIA

E asunto pa bin cu pasaporte diferente pa Caribe Hulandes pa por identifica nan diferente, ta keda vigente segun Bosman. Esey ta un parti di e asina yama ‘gemene best’ unda cu ta papia di paisnan independiente cu ta traha hunto y unda cu cada un tin nan propio pasaporte. “E ta keda un topico di loke nos di VVD kier” Bosman a bisa. E ta keda un asunto ‘interno’, y ta keda na cada isla kico nan kier. “Si mi tende e voznan na Corsou, nan no kier nada cu Hulanda. Ta bon. Pero e ora laga nos tuma e pasonan pa regla esaki bon” Bosman a bisa, indicando cu esaki ta nifica preparacion pa independencia. Pa VVD, ainda ta para cu e islanan lo mester bira independiente.” Y cu esey, un otro pasaporte!”. Bosman a sigui bisa. Cambionan pa loke ta e maneho no ta bay tin. “Bo conoce VVD. Nos ta haci palabracion y ta tene nos mes na dje. Asina tur hende sa kico ta kico” Bosman a finalisa bisando.

CDA Y D66 NA FABOR DI ARUBA

E hecho cu tin dos partido cu posiblemente lo bay forma un coalicion cu VVD y cu ta amigo di Aruba, no mester stroba e plan di VVD. “Mi no por imagina cu tin partidonan cu kier pa continua cu deroche di placa, of cu asuntonan financiero no ta na ordo. P'esey lo mi papia cu nan (e partidonan ey) riba e asunto ey” Bosman a bisa. “Mi lo convence nan di e interes pa un bon situacion financiero ta esencial” Bosman a finaliza bisando. E ta sigui disponibel pa forma parti di e comision di relacion di reino. RECOURT

Mientrastanto den un declaracion pa Daily Herald di St Maarten, Recourt a bisa cu aunke cu e no ta bolbe den e comision cu e la presidi, e ta contento cu mayoria di e otro miembronan si ta bolbe, y cu e ta spera cu su partido mantene e relacion di Reino como un prioridad. Tambe e ta spera cu Caribe Hulandes keda u punto di discusion durante formacion di un gobierno nobo. Foto cortesia Daily Herald SXM.

  • Ex premier Hulandes Ruud Lubbers a fayece

    Ex premier Hulandes Ruud Lubbers a fayece

    DEN HAAG – E persona cu tabata e prome minister pa mas tempo na Hulanda, Ruud Lubbers a fayece diaranson na edad di 78 aña. E tabata prome minister di Hulanda di 1982 pa 1994 y tabata lidera e partido politico CDA. E la lidera 3 gabinete y prome cu esey e tabata entre otro minister di Economia, miembro di Tweede Kamer y lider di fraccion di CDA. Despues di su carera politico e tabata docente y tambe comisario pa refugiado na Nacionan Uni. E tabata envolvi dos biaha caba na formacion di gobierno como informador, tanto na 2006 como 2010. E tabata malo pa basta tempo caba.

  • Rey Willem Alexander a acepta retiro di ex minister Zijlstra

    Rey Willem Alexander a acepta retiro di ex minister Zijlstra

    DEN HAAG – Rey Willem Alexander a acepta e retiro di Halbe Zijlstra como minister Hulandes di Relacionan Exterior ayera. Zijlstra a pidi Su Mahestad pa dune su retiro despues cu el a anuncia esaki algun rato prome. Motibo di su retiro ta cu e ex mandatario a gaña riba un bishita cu e lo tabata parti di dje na 2006, pero cu no a resulta berdad. Mientras cu no tin reemplazante pa Zijlstra, e minister Hulandes pa Relacionnan Exterior comercial Kaag lo reemplace. Asina gabinete di Rey a informa. Potret cortesia Nu. 

  • Halbe Zijlstra a anuncia su retiro como minister na Hulanda

    Halbe Zijlstra a anuncia su retiro como minister na Hulanda

    DEN HAAG – Cu un voz emocional, minister Hulandes pa Relacionan Exterior Halbe Zijlstra a anuncia su retira como minister. El a haci esaki den Tweede Kamer, envez di inicia cu un debate riba e tema. Cu su retiro, e ta asumi su responsabilidad pa e fayo garafal politico, door di gaña cu e tabata presente durante un reunion cu presidente Ruso Vladimir Putin na 2006. Durante su declaracion dado momento, su emocionan a domine, pa cual e la haya sosten di un braza di prome minister Mark Rutte.

  • Personal Cas di Aruba y ATA Europa cu antesala pa Dia di Betico

    Personal Cas di Aruba y ATA Europa cu antesala pa Dia di Betico

    DEN HAAG – Personal di Gabinete di Minister Plenipotenciario y di ATA Europa a tene awe 24 di januari, na antesala di Dia di Betico, un ceremonia pa recorda e fecha natalicio di Sr. Gilberto Françoise “Betico” Croes, politico y estadista Arubiano. Minister Plenipotenciario Guillfred Besaril y director di ATA Europa Tirso Tromp a pone un flor na e busto di Betico Croes. E ceremonia cu a keda transmito live via di Facebook a termina cu cantamento di nos himno nacional ‘Aruba Dushi Tera’. Potretnan ta cortesia di Cas di Aruba.

  • Hulanda kier encuentro 'nobo' cu Venezuela riba medida

    Hulanda kier encuentro 'nobo' cu Venezuela riba medida

    ORANJESTAD/DEN HAAG/CARACAS - Hulanda kier un encuentro nobo cu Venezuela riba e medidanan cu e pais Andino a tuma contra islanan ABC dos siman y mei atras. Asina minister di relacionan exterior di Hulanda Halbe Zijlstra kier. Asina e portal di noticia Hulandes, NOS ta raporta. E reunion nobo ta despues cu Union Europeo a anuncia medida nobo contra Venezuela. Segun e mandatario Hulandes, Venezuela a acopla e sancionnan cu e medida contra e islanan ABC. Zijlstra ta lamenta profundamente cu Venezuela a haci esey, siendo cu ta dos cos separa di otro. E sancionnan ta pasobra segun UE, Venezuela ta stroba funcionamento di democracia. 

  • Van Raak: CITGO no a permiti delegacion Hulandes entrada na refineria

    Van Raak: CITGO no a permiti delegacion Hulandes entrada na refineria

    ORANJESTAD - E refineria CITGO no a permiti e delegacion Hulandes di drenta den e refineria. Asina e parlamentario Ronald van Raak pa partido SP y vocero pa asuntonan di Reino Hulandes den Tweede Kamer a bisa den su columna, un dia despues cu e tabata di bishita na Aruba. Den su funcion como columnista, a raporta su bishita den e portal The post Online bou di e titulo, "Loke mi no a wordo permiti pa mira". Fuera di a repasa su bishita completo, el a dedica tempo na e bishita di e delegacion na e refineria, pero no tabatin bon palabra pa esaki. "Na e refineria, e portanan a keda duro cera. Nos a pidi e compania CITGO pa un combersacion, pero nan a nenga pa ricibi delegacion di Tweede Kamer" van Raak ta sigui bisa. 

  • Powered by SETAR