- Un total di 18 ciudadano di Aruba ta haya Condecoracion Real
- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
AVB lo sanciona esunnan responsabel pa agresion riba veld
ORANJESTAD - Den fin di siman a tuma luga un wega di futbol den stadion Guillermo Trinidad den cual tabatin agresion, te cu referee mester a para e wega. E agresion tabata precisamente contra e referee y e linesman. Arubaanse Voetbal Bond, di acuerdo cu e reglanan stipula, a inicia un investigacion interno mesora pa yega na e berdad di locual a sosode riba veld y pa sanciona tur esunnan responsabel pa purba daña e bon nomber y imagen di e deporte Rey di Aruba y di mundo, esta futbol.
Bou di ningun circunstancia, ni pa ningun motibo, e asociacion di futbol di Aruba, cu ta resorta bou di CONCACAF y consecuentemente bou di FIFA ta permiti ningun tipo di agresion riba veld. E principio di e deporte ta disciplina y di promove paz, hunga den ekipo pa logra victoria, logra desaroyo positivo den comunidad, formando lidernan y talentonan deportivo.
Locual ta sosode awor ta cu e referee principal di e wega ta traha su rapport y ta entreg'e na e comision di sancion di AVB, cu ta evalua e rapport y di tur otro envolvi, scucha testigonan y mira material di video disponibel, pa por yuda forma e imagen corecto di locual a sosode durante e wega entre SV Bubali y SV Caravel. Separa di AVB mes, e asociacion ta conta cu e federacionnan mes di e ekiponan tambe lo sa di asumi nan responsabilidad den e proceso aki y sanciona hungadonan cu nan mes ta mira cu no a comporta nan mes debidamente durante e wega. Di e forma aki tur partner den futbol lo sa di subraya e importancia di "fair play" riba veld di bala.
AVB, adelantando resultado di e investigacion ta subraya e respet pa refereenan como e maximo autoridad riba veld. Ta conoci cu na Aruba ta dificil pa haya hende interesa pa "fluit wega" precisamente pa temor pa e tipo di situacionnan asina. E no ta sosode hopi y AVB lo sigura di sanciona comportacionnan asina pa no promove agresion contra esunnan cu, den nan tempo liber, ta dirigi wega di futbol. Den caso cu ekiponan no ta di acuerdo cu decision di un referee, semper tin forma pa protesta. Pero cu agresion sigur no ta alcansa ningun meta, den ningun circunstancia, sigur no den deporte di futbol.
Ta importante pa laga e proceso cana su caminda y no laga emocion hunga un rol den e situacion aki. AVB tin personanan capacita den e comision cu por trata e caso aki pa asina por yega na un bon decision, cumpliendo cu e reglanan vigente di AVB.
Inter ta titula campeon di Italia pa di 20 biaha ganando di AC Milan
MILAN – E ekipo di futbol professional Italiano Inter a gana su di 20 titulo di campeon di Italia, despues di a gana e final contra AC Milan dialuna atardi cu score di 2-1. Denzel Dumfries, e orguyo di Aruba a drenta den 7 minuut prome cu final di e partido , pero a keda expulsa algun minuut despues cu carchi cora na final pa un bringamento cu un hungador di AC Milan Hernandez cu a provok’e. Un asunto cu tabata canando caba. Cu e victoria aki, inter por pone un di dos strea riba nan uniform den e proximo temporada. AC Milan tin uno.
Ekipo di Denzel Dumfries (Inter) ta hunga contra Milan pa e titulo di Italia awe
MILAN – E ekiponan rival Italiano AC Milan y Internazionale ta topa otro pa e titulo nacional. Interesante pa Aruba ta cu e ‘Arubiano’ Denzel Dumfries ta figura den e hungadornan pa e seleccion di Inter. E ekiponan ta rivalnan grandi di otro. Mientras cu Inter ta e faborito, 46% chens pa gana epartido, un victoria no ta sin mas. Milan lo haci tur cos pa daña e ‘fiesta’ di Inter. E hecho cu Inter a gana Milan 5-1 tempran den e temporada aki, no ta nifica nada pa e wega di awe nochi, segun comentarista italiano di futbol. E wega ta cuminsa pa 2:45pm ora di Aruba.
MLB impresiona cu catcher di Aruba pa Atlanta Braves Chadwick Tromp
ATLANTA — E pelotero professional di Aruba Chadwick Tromp ta hayando mencion tras di mencion pa su prestacion actualmente den e ekipo di Atlanta Bravez. E siman aki tabatin un otro raportahe riba su prestacion, unda cu varios punto di Tromp ta resalta. Entre nan, su abilidad pa conecta cu pitchernan di su ekipo, e determinacion pa traha duro, e disciplina y su forma di ta. Y e prestacion actual pa e temporada aki unda cu e la habri 6 wega caba como e catcher principal pa e ekipo, ta wordo considera como remarkable.
E careda di ciclista ‘12 Hours di Aruba’ ta bolbe na 2024!
ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.
Coredornan di Aruba ta cla pa e marathon di Londen pa diadomingo
LONDEN – Un grupo basta grandi di por lo menos 10 coredor di Aruba ta participa diadomingo na e marathon di London, considera como un di e marathon crucial internacional. Diabierna nan a registra nan mes oficialmente y a haya nan number y bib (e registro electronico) pa nan por participa. For di e portal deportivo 297 Sports, noticiacla a compronde cu tin por lo menos 50 mil participante diadomingo awor. Esnan di Aruba cu ta participa ta e.o. e docter di cas Joaquin van Trigt y e coredor conoci Shariska Winterdaal, Ana Mujica, Jeanette Croes, Lili Mejia, Edeline Weller, Filomena Paesch, Esther Colina, Carla Fingal y Ricky Refunjol. Potret cortesia 297 Sports.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Follow NoticiaCla
