Fiscal a pidi 18 luna di prizon pa conocido DJ 'Mc Oz'

Posted on 03/9/2017 2:53 pm AST | Updated on 03/9/2017 9:14 pm AST

ORANJESTAD – Conocido personalidad di radio Ostrick ‘Mc Oz’ Jansen a tende fiscal pidi 18 luna di castigo di prizon p'e, pa a tene relacion sexual cu un dama menor di edad. Di e 18 luna, 6 ta condicional cu 2 aña di prueba. Abogado di Jansen, Chris Lejuez a calcula cu si hues bay di acuerdo cu e demanda di fiscal, ta warda Jansen 5 luna mas di castigo di prison kitando e periodo cu el a sinta caba y tambe si dune e conocido VI, esta kita 1/3 di e castigo basa riba bon conducta. Jansen a admiti e acto, pero cu e no tabata sa cu e dama tabata menor di edad (14 aña). Pero pa ley, esey no ta haci diferencia. Ni si e dama a ‘set up’ Jansen, y a gaña su edad, e ley ta hopi cla y fuerte. Un hecho asina ta castigabel pa ley, sin piedad. Pa e hecho cu Jansen ta un persona conoci, no ta pone cu mester trate diferente. Puntonan sinembargo na su fabor ta cu ta su prome ofensa, y cu ela coopera cu husticia for di momento di su detencion.

INTERCAMBIO ENTRE HUES Y JANSEN

‘Mc Oz’ manera cu Jansen ta conoci den comunidad, a splica hues loke a sosode ta ‘di loke e ta corda’. Hopi tabata e momentonan cu hues a confronta Jansen cu declaracionnan contradictorio. D.B. Jansen a admiti di a tene relacion sexual cu e persona, pero cu e no tabata na altura e momento ey cu e tabata menor di edad, ora el a tene relacion cu ne. E hecho cu e biaha aki – normalmente e mes ta admiti di ta uza condon-, e no a uza condon y a saca e dama na estado, Jansen ta relaciona cu e estado cu e tabata aden. ‘Mi tabatin drinks aden, mi tabata tipsy, cosnan ta pasa. Mi no sa pakico mi no a uza condon’ Jansen a declara. E hecho cu ela saca e dama na estado a consecuencia di esey, tambe ta conta contra dje, y tambe e forma con e kier a laga e dama comete abortus. Un abortus cu, segun hues, no tabata nada corecto y tambe di un forma ilegal. Tur e puntonan aki despues fiscal despues den su presentacion, a uza contra di Jansen, cu ta pisa riba e castigo. Durante e interogacion di hues pa cu Jansen, a describi varios momento, cu a resulta diferente di e declaracion di e dama. “Pakico mi tin cu kere abo y no e dama?’ hues a puntra Jansen na dado momento. Algo cu tambe fiscal a pone den contra di Jansen despues, cu a pone cu a uza e declaracion di e dama cu a haci e denuncia. E relacion sexual entre e partidonan tabata mutuo, y esey no a wordo desmenti. Jansen a splica cu pa evita represaya di e dama, e kier a termina e situacion di un forma miho posibel. Algo cu no a logra. E mama na final a haci denuncia cu a conduci na detencion di Jansen.

FISCAL

Fiscal a remarca cu e declaracionnan di Jansen no tabata consistente, cu a pone cu fiscal a bay tras di e denuncia oficial haci. A confirma cu e relacion sexual tabata consenti y te hasta por papia di un relacion amoroso. Pero e edad di e dama ta den contra di Jansen. Segun fiscal un persona di 14 aña no por determina si e ta cla pa un relacion. Y esey ta haci e caso castigable. Pa loke ta e status di Jansen, no por ta asina cu esey ta pone cu mester wak e caso diferente. “Tur hende mester haya e mesun castigo” e fiscal a bisa. Esey no ta kita afo cu tin puntonan cu por ta diferente. Pero e mensahe mester ta cla cu tin cu tene cuenta cu e hechonan cometi. Puntonan cu a pisa contra Jansen segun fiscal, ta cu e mester tabata sa cu e persona tabatin 14 aña. (un persona cu mester pidi permiso pa e bandona su cas, e forma con e ta biba cu su mayornan etc., ta indicacion cu mester a deduci su edad menor). Tambe e hecho cu a tene relacion sexual sin proteccion, ta contra Jansen. Un embaraso iresponsabel cu a bira e resultado di nan accion, tambe ta pisa contra Jansen. Pio ainda e forma con Jansen no tabata dispuesto pa yuda e damita den e caso. Positivo pa Jansen, segun fiscal, ta cu e no tin un ‘strafblad’, a admiti cu e tabatin sex cu e dama, y a bay di acuerdo pa haya ayudo pa evita cu esaki por sosode atrobe. Pero tur e puntonan negativo a conduci cu fiscal a pidi castigo di 18 luna di prizon, di cual 6 condicional y periodo di prueba di 2 aña.

LEJUEZ

Abogado di Jansen, Chris Lejuez a argumenta cu contrario na informacionnan presenta, Jansen a tene relacion sexual solamente 1 biaha cu e dama. Ademas, e curpa di e dama no ta uno cu ta aparenta 14 aña di edad. A sigui pa describi e bida di Jansen, su trabou, popularidad y su trabounan den comunidad. Entre nan e hecho cu e ta duna lectura pa hoben riba motivacion, cu e compania Elka. E compania a te hasta confirma cu nan lo uz'e atrobe pa sigui cu e trabou cu e tabata haciendo. Finalmente Lejuez a mustra hues riba un caso similar cu a tuma lugar na december ultimo unda cu e hecho tabata similar y cu aki a duna e sospechoso un castigo di 12 luna, cu ta menos cu su cliente ta hayando. Como tal a haya cu e castigo pidi di 18 luna ta mucho hopi.

DECLARACION DI JANSEN

Na final, Jansen a dirigi su mes na esnan presente, pidiendo tur despensa, cuminsando cu su mayornan, famia directo, famia di e victima y amigonan cu a bin sostene den corte. “Mi ta pidi despensa, y boso por conta cumi no ta un persona asina. Sorry. E ta un les pami” Jansen a sigura tur presente. Ademas ela pone su mes disponibel pa cualkier tratamento cu tin bin p'e di parti di Reclasering. Tribuna tabata completamente yena cu sostenedornan di Jansen, bisti completamente na blanco. Por a nota conocido musiconan manera Janiro Eisden y Jairo Evertz y DJ Vibes. Hues a cera e caso y lo dicta sentencia di 30 di maart proximo pa 8:15 am. NOTA. Foto principal ta di abogado di Jansen, Chris Lejuez. E otro ta di algun di e hopi amigonan cu a bin sostene Jansen durante e caso. 

 

  • Manera anticipa pa Noticiacla: Ex minister Besaril a recobra su libertad

    Manera anticipa pa Noticiacla: Ex minister Besaril a recobra su libertad

    ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes. 

  • Ex minister Besaril por recobra su libertad diabierna

    Ex minister Besaril por recobra su libertad diabierna

    ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan. 

  • Corte: Radioemisoranan mester paga DUCAPRO pa toca musica, y lo dicidi tarifa den dos luna

    Corte: Radioemisoranan mester paga DUCAPRO pa toca musica, y lo dicidi tarifa den dos luna

    ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna.  E propietario di e radio a sigura cu no ta cu nan no kier paga, sino cu nan tin problema cu e suma/tarifa. 

  • Ex minister Besaril ta keda encarcela pa 16 dia mas!

    Ex minister Besaril ta keda encarcela pa 16 dia mas!

    ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe. 

  • Awe ta dicidi si ta prolonga detencion di ex minister Besaril cu 8 dia mas

    Awe ta dicidi si ta prolonga detencion di ex minister Besaril cu 8 dia mas

    ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.

  • 'Caribisacion' di nos magistratura: Di 11 hues actual na Aruba, 6 tin pasado local

    'Caribisacion' di nos magistratura: Di 11 hues actual na Aruba, 6 tin pasado local

    ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “

  • Powered by SETAR