ORANJESTAD - E declaracionan recien di minister di husticia Arthur Dowers ta sorprende ex colega Otmar Oduber. "Ora cu mi scucha e minister di husticia reacciona, y mi conoce como un persona masha calmo y trankilo, e forma con ela reacciona hopi emocional y hopi cansa, tabata duidelijk cu no tabatin argumento" Oduber a cuminsa na bisa NoticiaCla.com. Dowers recientemente a 'habri afo' contra su ex colega, uzando un sin fin di ehempel pa 'ilustra' tur loke cu Oduber a haci cu lo ta malo.
COOPERACION ENTRE GOBIERNO Y AHSF
Segun Oduber, e acusacion cu e acuerdo no tabata funciona entre gobierno y AHSF y cu cosnan tabata cana otro, ta mustra cu e mandatario ta 'completamente off'. "E no ta compronde con e sistema ta hinca den otro" Oduber a bisa. A repasa cu na 2012 ATA a tuma e proceso di haya suma over for di AHATA, pa determina kico e fondo su necesidad ta, pa medio di un board. Prome cu e fecha ey AHATA no tabatin cu duna ningun cuenta. Algo cu a cambia na 2011. "Pa ley e minister (di Turismo) ta responsabel pa e suma. Ey caba Dowers ta bruha". No ta pa Oduber controla placa segun e mes ta bisa. "Dowers no ta compronde e sistema. Mi a compronde cu ela bisa cu Oduber kier haya poder, kier haci como si fuera ta di dje e placa ta. No, e placa no ta di dje. E placa ta di pueblo".
A NENGA PLACA DI TURISMO PA COMBATI CRIMEN
"Mi persona nunca a bisa cu ela nenga di ricibi (fondo di turismo pa combati crimen)." Oduber a reacciona riba e parti ey. "Su persona a boycotea fondonan cu tabata bin di ATA. Y mi por duna mil y un ehempel" Oduber a bisa, y a sigui na duna ehempel di renoba material pa visibility team na Renaissance, reunionan di AHSF unda e fondo tabata destina, pero cu Dowers nunca no tabata presenta. A elogia e mandatario si, cu ta ricibi autonan y material di fondonan di turismo.
ORGANISA CONCIERTO CU TA BENDE DROGA PA ARUBA
Dowers a acusa Oduber recientemente di ta organisa concierto unda cu ta bende droga, uzando e electric festival como ehempel. Segun Oduber, Dowers ta acus'e di esey pasobra no tin argumento. "Pasobra den henter su declaracion mi no a tende bisa con ta bay atende cu criminalidad den nos comunidad". Ora cu e portal aki a puntra Oduber riba e validez di argumento di Dowers, e politico a desmenti esaki categoricamente. "Absolutamente!". A usa potretnan cu, segun Oduber, Dowers mes a pose banda di DJnan den e concierto di EF(Electric Festival), ta baila cu su yiu, y famia. "Esey kier men cu nan ta drogando? Esey kier men cu nan tambe ta participando na e acto di bende of uza droga? Mi no ta kere. Mi ta convenci cu no. Mi ta hinca man den candela cu no. Mescos cu mi yiu tabatey" Oduber a sigui bisa den su defensa. E potret cu Oduber ta referi na dje, mientrastanto a wordo refuta cu ta saca na EF, segun e DJ cu tabata riba e potret tambe, y a clarifica riba FACEBOOK cu esey tabata un potret saca na un otro evento, uno educacional pa hubentud.
PAKICO DOWERS TA DEFENDE SU MAL MANEHO
Segun Oduber, Dowers ta uza e argumentonan aki pa defende 'su mal maneho'. Ta bisa cu despues cu 3 aña cu concierto (EF) ta wordo organisa pa atrae turismo di afo cu ta aproba door di Parlamento di Aruba (fondonan pa e concierto), ta bin critica esaki. Siendo cu Dowers mes a duna permiso pa e conciertonan wordo organisa. "Nos mester stop cu e minister di Husticia por kere di por djies tira un atake y kere cu tur hende ta bay gare y pa e gana punto cu ne."
NO POR DEMANDA MINISTER DOWERS
A puntra e politico pakico no ta demanda Dowers pa e acusacionan (mayoria di nan serio) contra dje, el a bisa cu Dowers 'no ta bisa nada'. "Les'e un biaha mas bon, y bo ta wak cu e no ta bisa nada. E ta bisa cu tin conciertonan cu ta wordo organisa caminda cu porta extasy ta wordo bendi", pues no ta nada concreto cu e por mara Dowers na dje.
RETA PA DEBATI RIBA E TEMA
Oduber a reta Dowers e ora pa (mirando cu Dowers a bisa cu e tin mucho mas pa papia contra Oduber) e bin banda di dje, y bin cu prueba cu droga a wordo bendi eynan y door di ken a wordo bendi. "Pasobra ta berguensa cu un minister di husticia bisa cu droga a wordo bendi na un evento, y bo no ta gara e hendenan cu a bende e droga" Oduber a bisa. Ademas e kier pa Dowers a acusa carnaval wordo uza pa uza droga pa muchanan.
ODUBER TA ADMITI DI A CRITICA VOCERO DI POLIS
Oduber na prome instante ta desmenti e acusacion cu elo a reclama vocero di polis cu a papia riba e asunto di bendemento di droga na concierto. "Absolutamente cu no. Pakico mi tin cu reclama si nan gara droga" Oduber a bisa. Riba insistencia di e portal aki, a puntra atrobe y aki Oduber a bisa cu tabatin un evaluacion cu a tuma lugar anto cierto momento a puntra den e tempo ey tabatin lollypop cu a wordo bendi, cu a resulta cu no ta di droga. Eynan Oduber a sigui bisa "Mi no por reclama nunca di mi bida un trabou cu cuerpo policial ta tuma lugar. Loke cu mi a lamenta e tempo ey, ta e forma con a presenta e noticia na comunidad". Eynan Oduber ta admiti cu enberdad a reclama e vocero. Pero e ta mustra cu reclama ta uno y puntre con e asunto por afecta e imagen di un concierto ta otro.
A PAGA 5 MIYON PA CONCIERTO
Oduber a desmenti cu a paga 5 miyon pa un solo concierto, manera cu Dowers a reclama. Na varios concierto si, y hopi mas cu 5 miyon, pero no pa solamente un concierto. A mustra cu e presupuesto di ATA ta 100 miyon. E acusacion segun Oduber, ta 'ridiculez di marca mayor'. Scucha e entrevista completo AKI.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.