ORANJESTAD - Awacero a sorprende hopi hende awe for di mainta tempran y a keda yobe practicamente henter dia. Esaki no obstante cu e tabata den pronostico di Meteo for di diasabra. Na aeropuerto sinembargo no a registra mucho awa. E cantidad segun servicio meteorologico, pa 5'or a raporta ta apenas di 1.8 mm di awa, mientras cu na Haduricurari a registra mas hopi, cu ta 4.9 mm. Mas tanto di e awa a yobe na Playa y Noord.
PRONOSTICO
Den proximo 24 ora humedad den atmosfera regional lo ta suficiente pa pone temporalmente mas nubia pasa riba nos isla. Pa e motibo aki por spera un awacero pasahero, principalmente den oranan di marduga y mainta. Diadomingo anochi: levemente te parcialmente nubla cu chens pa un awacero pasahero. Den marduga y dialuna: parcialmente nubla cu un awacero pasahero. Labaderanan biniendo for di noord noordoost ta menguando; sinembargo, keto bay nan ta ocasiona lama bruto na nos costa. Ta suplica ocupantenan di boto chikito y usuarionan di lama pa tene cuenta cu esaki.
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.