ORANJESTAD - Como parti di e restructuracion di e aeroliña InselAir Aruba, fuentenan cerca di e proceso a informa NoticiaCla.com cu esaki lo cambia di un 'scheduled airline' pa un 'chartered airline'. Esta cu no ta bay efectua buelonan comercial manera ta hacie'le awor, pero ta bay opera solamente a base di charter. E intencion ta pa haci esaki despues di luna di september di e aña aki mes. Esaki ta rekeri tambe e ora un restructuracion unda cu a cuminsa y lo continua di restructura e compania cu ta inclui reduccion di personal tambe. Esaki a cuminsa caba y lo continua te ora cu yega na e situacion aceptabel cu e por ser maneha como un aeroliña charter.
SITUACION FINANCIERO
Manera ta conoci, e compania no ta pasando den su miho momentonan, y final di aña a bay termina dilanti hues ora cu un grupo di trahado a exigi pa e compania cumpli cu traspaso di fondo di e.o. belasting y pensioen. Hues no a honra e peticion di e trahadonan, sino mas bien a bay na banda di e aeroliña, citando interes general. Cu esaki, e compania a haya espacio pa continua cu su programa di restructuracion, cu e intencion di fin di luna di januari cuminsa cumpli cu e pagonan pendiente manera e pagonan atrasa di traspaso di belasting y pensioen. E CEO di e aeroliña Frederick Nuboer no tabata disponibel pa un reaccion.
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.