ORANJESTAD - Interes pa kavel pa Carnaval e aña aki a surpasa esun di aña pasa y ta premira cu e ta yegando e nivel di 'antes' atrobe. Miembro di management team di Directie Infrastructuur en Planning (DIP) Isabel Dammers a confirma cu faltando 2 dia completo pa cera e inscripcion pa kavel, ya a practicamente yega e cantidad total di aña pasa. "Aña pasa nos a bende lootjesnan december y a bende total di 7826 lootjes" Dammers a bisa. E aña aki a habri benta dialuna cu benta di riba 3900 lootjes. Ayera a cera riba un 6700 lootje. "Awe te cu awor nos ta na 7400 lootjes and counting. Nos ta verwacht cu pa diabierna nos ta surpasa by far, e benta di aña pasa y e lo yega riba nivel 'normal' atrobe" Dammers a sigui bisa. Ora papia di normal, ta varia entre 12 pa 14.000 lootjes. Mientrastanto por a tuma nota cu e kavelnan ta 'marca' caba riba caminda.
KICO TA E DIFERENCIA E AÑA AKI
Segun Dammers, e temporada di aña ta hunga un rol hopi. Aña pasa mirando cu carnaval a cuminsa echt hopi tempran, mester a haci e proceso di lootjes pa kavel for di december, segun ley ta prescribi. "Den december nos cultura di Aruba, tur hende nan cabes ta den Pasco y Aña nobo. Y ora cu aña bolter e ora ey e enfoke ta bin riba carnaval. Nos ta kere esey a causa cu aña pasa e benta di lootjes a cay" Dammers a sigui bisa.
PROCESO CU TA SIGUI
Ainda tin tempo pa hende aplica pa e kavel y por haci esaki te cu diabierna proximo. Unabes cu diabierna yega y cera e buzon, esaki ta wordo seya. "Nos a haci'e un siman largo pues tur hende tin amplio tempo durante ora di oficina pa cumpra na lootjes. No ta druk. No tin rij. Probecha" Dammers a sigui bisa. Otro siman diamars caba notario ta saca e lootjes, dia 17 di januari. Esey ta nifica cu pa diaranson of diahuebs, ta haci e publicacion den medionan di comunicacion.
CANTIDAD DI KAVEL
E aña aki tin atrobe 250 kavel, di cual 180 ta destina pa e loting pa wak carnaval. Tin 71 kavel cu ta wordo uza pa benta di cuminda y bebida (vent) y tambe pa fundacionan y otro instancia cu ta bin na remarke tur aña pa esaki.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.