Consensus pa hopi tema entre ministernan husticia di Reino

Consensus pa hopi tema entre ministernan husticia di Reino

Posted on 01/10/2017 11:42 pm AST | Updated on 01/11/2017 12:24 am AST

ORANJESTAD - E reunion anual di ministernan di husticia di Reino a termina diamars merdia y a trata un serie di topico. Ministernan Dowers (Aruba), Boasman (St Maarten), vd Steur (Hulanda) y Martina (Corsou) a reuni diamars riba e temanan. Entre nan, traficacion di hende, terorismo, polis, prizon, y tambe e rijkswet. "Nos a logra riba mayoria punto consensus y desicionan a wordo tuma" minister di Aruba Arthur Dowers a bisa. Sinembargo algun tema si no a logra consensus, y lo bin bek riba eseynan dentro di un luna. 

TRAFICACION DI HENDE

A haya presentacion di OM riba aspecto di traficacion di hende, y a mira un adelanto despues di a firma un protocol riba e tereno aki algun tempo atras. "Nos a felicita St Maarten cu a logra un T1 (e nivel di mas halto di logro riba tereno di combatimento di traficacion di hende), despues cu a desmantela algun banda ocupa cu esey.

COMBATIMENTO DI TERORISMO

A haya un presentacion riba e analisis y e risico cu nos ta core riba e tema aki. "Logicamente nos no por comparti tur e informacionan cu prensa. Pero si nos a palabra cu nos lo sigui traha riba e tereno aki conhuntamente" Dowers a sigui bisa. Lo uza instrumentonan pa fortifica e fronteranan miho ainda sea local of internacional (esta e instrumentonan).

  • Erin Croes acerca como posibel reemplaso pa Paul Croes

    Erin Croes acerca como posibel reemplaso pa Paul Croes

    ORANJESTAD – Ruman muher mayor di minister Paul Croes, esta Erin Croes, a wordo acerca pa posiblemente reemplace, si e mandatario no bolbe riba lista (di partido AVP). Erin Croes awe tardi a confirma esaki pa NoticiaCla. “Mi por bisabo cu mi a wordo acerca” Croes a confirma pa e e portal aki. Mas informacion e no por a bisa. Pero ora cu a puntr'e si e acercamento tabata pa reemplasa su ruman, ela bisa “si”. Mas informacion e no por a duna aworaki, pero a priminti cu otro siman elo tin mas informacion riba e tema. Manera ta conoci Erin Croes ta ruman muher mayo di e mandatario, y tabata hopi instrumental den su carera politico, sigur den e parti di relacion publico. E pregunta di reemplazo a surgi diasabra ora cu –manera e portal aki a raporta anteriormente caba-, e portal 24ora a puntra lider di partido berde AVP Mike Eman si ta berdad cu Erin Croes a keda acerca. E mandatario no kier a bay den detaye pero si a menciona un posibilidad.

  • Eman: No a dicidi ainda si Paul Croes ta bolbe riba lista

    Eman: No a dicidi ainda si Paul Croes ta bolbe riba lista

    ORANJESTAD – Decision no a cay ainda si Paul Croes ta bolbe riba lista di partido berde AVP. Asina lider di e partido Mike Eman a declara den un entrevista na e website 24ora diasabra merdia. Eman a confirma cu enberdad e loke a crea a impresion ey, ta e decision di Croes diabierna pa no aparece na e apertura di Green Square. Esaki pa no ‘crea e confiansa’ entre su seguidornan cu elo ta riba e lista proximamente. Ta for di mainta tabatin informacion ta circula riba rednan social cu Croes lo a retira di e partido y/of no pone su mes disponibel pa ta riba lista. Dia 4 di augustus proximo e partido tin cu entrega su lista y pa e fecha ey mester tin claridad. Croes a bisa Eman tambe cu si e no tin claridad pa e tempo ey, elo no kier ta riba e lista. Eman a splica e portal cu nan ta sostene e decision ey tambe.

  • Resultado encuesta NoticiaCla/Doc Opleiding riba debate di Millennials

    Resultado encuesta NoticiaCla/Doc Opleiding riba debate di Millennials

    ORANJESTAD – Segun e ultimo encuesta politico realisa pa NoticiaCla y Doc Opleiding, debatenan ta sigui ta un instrumento importante pa dicidi e patronchi di voto di un ciudadano, aunke no e unico. Tambe a demostra cu e grupo di votadornan indeciso ta sigui grandi, y tambe e grupo cu no ta dispuesto pa bisa ainda pa ken nan vota, aunke cu e encuesta ta anonimo. E biaha aki e debate tabata specificamente dirigi pa haya sa e pensamento di e comunidad riba e debate di millennials y e lidernan politico cu a participa.

  • Lista di horario pa partidonan entrega lista politico ta cla

    Lista di horario pa partidonan entrega lista politico ta cla

    ORANJESTAD – Partido MAS ta e prome partido programa pa entrega nan lista dia 4 di augustus proximo y partido RAIZ ta e ultimo. E entrega lo tuma lugar na edificio di Censo, den e sala unda normalmente ta casa pareha. E lista completo ta conoci y publica riba e website di Censo.aw. For di e lista por haya sa ki ora cada un di e 10 partidonan ta programa pa haci entrega di nan respectivo lista. E prome ta wordo entrega 9 am mientras cu e ultimo ta wordo entrega 3 pm e diabierna ey. Notabel ta cu tin 10 partido y cada mey ora uno ta haya turno pa entrega nan lista. Partidonan grandi AVP y MEP ta programa pa entrega nan respectivo lista 10:30 am y 1:30 pm respectivamente. A compronde for di hefe di Censo y alabes miembro di Conseho Supremo Electoral Sharin Luydens, cu mientras cu partidonan no por pidi pa cambia nan horario di entrega di lista, pa ley no por nenga nan un otro ora. Pa loke ta e horario, a compronde cu no mester tin problema ya cu semper partidonan a sa di tene nan mes na nan horario respectivo. Por mira e lista completo AKI.

  • Falta apenas 2 dia pa encuesta debate di millennials cera

    Falta apenas 2 dia pa encuesta debate di millennials cera

    ORANJESTAD – Falta apenas 2 dia pa e encuesta mas nobo di NoticiaCla y Doc Opleiding cera. Ta trata di e encuesta basa riba e debate politico positivo di Millennials cu a tuma lugar siman pasa diahuebs. E encuesta ta duna un bista di kico e comunidad cu sea a presenta esaki en persona - of e version televisa- ta pensa di e evento. Ademas tin mas pregunta cu ta laga e participante mes contesta e preguntanan haci e anochi ey. E encuesta ta tuma apenas 4 minuut di bo tempo, y ta duna un bista di kico tur esnan participando ta haya di e evento. Tambe e ta duna un bon bista di un grupo specifico nan patronchi di voto, cu ta informacion valioso cu por tene na cuenta pa esnan cu ainda no a dicidi pa ken nan vota, of pa e partidonan tene cuenta cune den e ultimo dos lunanan cu falta prome cu eleccion. E encuesta ta cera diabierna algo prome cu merdia. Pa participa na e encuesta, click AKI

  • Debate politico pa mercado Latino ta otro luna sin partido AVP

    Debate politico pa mercado Latino ta otro luna sin partido AVP

    ORANJESTAD – E unico partido cu no a confirma nan participacion pa e unico debate politico di Latino e aña aki, ta partido AVP. Asina organizador di e prome debate latino pa e aña aki, Sherwin (Win) Donata a bisa NoticiaCla. Donata ta propietario di e radio Latina 92.3FM cu ta pa e audiencia Latino di Aruba. E debate programa pa tuma lugar dia 24 di augustus proximo, ta conta pues cu participacion di tur lider menos AVP. “Nan no a confirma prome cu e deadline, cu tabata fin di luna” Donata a sigui bisa. E debate lo tuma lugar den Cas di Cultura y ta di 6’or pa 10’or di anochi y modera pa e conocido personalidad Wilmer Aristizabal. Ainda no ta confirma si e debate aki tambe lo keda televisa. “E decision ey no a cay ainda” Donata a sigui bisa. Esaki ta bira e di 5 debate politico, si tene na cuenta cu tabatin uno di EPI, uno di Kvk y uno di Millennials. Pa ora cu esun Latino tuma lugar, lo a pasa e ultimo di Kvk cu ta dia 17 di e mesun luna. E entrada ta 25 florin y tur e placa cu recauda ta bay pa fundacion Arubaanse Juan Pablo Duarte. Esaki ta bira pues e di dos debate cu AVP lo no tin representacion. Foto ta di e doño di Latina FM Sherwin Donata y e presidente di fundacion Arubaanse Juan Pablo Duarte Winston Tavarez. 

  • Powered by SETAR