Mientras awa sigui yobe no por stop creacion di buraco

Mientras awa sigui yobe no por stop creacion di buraco

Posted on 01/10/2017 6:43 pm AST | Updated on 01/10/2017 8:31 pm AST

ORANJESTAD – E motibo pakico tin asina tanto buraco riba camindanan a causa di yobidanan, ta pasobra cu hopi caretera ta na turno pa haya mantencion necesario. Door cu e yobidanan tabata asina hopi, e daño a bira asina grandi, Marlon Jacobs, hefe di seccion Infrastructura y Trafico di DOW a splica. 

Den un declaracion duna, e funcionario a splica cu mientras cu awa no stop di yobe, e buraconan lo sigui wordo crea. Ta algo cu a yega di sosode den pasado caba ora cu awa a yobe den forma pisa y pa periodonan largo. Mas ainda riba careteranan cu ta na turno pa un mantencion grandi. 

Den fin di siman cu ta tras di lomba mes personal di DOW a haci un sondeo y a constata cu e problemanan mas grandi ta riba e camindanan di mas o menos 20 aña of mas di existencia. Un caminda nobo normalmente tin un bida di 40 aña maximo, dependiendo di factornan manera con hopi e ta wordo uza, e efecto di solo y yobida. 

Pa añanan largo camindanan ta wordo renoba y Jacobs ta calcula cu esaki ta rond di 180 pa 200 km pa aña, cual na su turno ta un inversion grandi, ademas cu e cantidad grandi di trabou aki no por keda realisa den un periodo cortico. Por ehempel, renobacion di un caminda mes ta costa rond di 1100 florin pa meter, cu normalmente tin un hanchura di 6 meter. P'esey semper ta haci un evaluacion si por scapa un caminda prome cu tuma un decision pa reconstrui esaki. 

Den e situacion actual, desde cu departamentonan di Gobierno a reanuda nan trabou na inicio di 2017, a pone tur e ploeg disponibel pa e 4 vehiculonan cu DOW tin pa carga asfalt cu ta wordo uza pa tapa e buraconan durante e temporada di yobida. Nan ta pasando rond Aruba y lo sigui haci esaki mientras cu tin buraco pa tapa. Mientrastanto, DOW ta trahando pa lanta un team di evaluacion pa e trabou cu mester wordo haci riba e careteranan existente, Jacobs a comenta. 

 

  • Green Corridor tin retraso awor debi na ruptura kabel Elmar

    Green Corridor tin retraso awor debi na ruptura kabel Elmar

    ORANJESTAD – E daño causa na e cabel di halto voltahe di Elmar dos siman pasa, lo causa un retraso di por lo menos un luna den e proyecto di Green Corridor. Asina director di DOW Marlon Croes a confirma pa NoticiaCla. Esaki pasobra for di dos siman pasa Elmar a ordena DOW y Odinsa pa para e trabounan di cobamento pa e proyecto di Green Corridor. Croes a admiti cu a ‘pidi’ pa para e trabou te ora cu por sigura cu e compania responsabel pa e trabounan, esta Odinsa, por garantisa cu algo asina lo no pasa mas. Ainda Croes ta wardando riba e documento cu por specifica e peticion di Elmar. E trabounan di reparacion a costa 400 mil florin y ta bay pa cuenta di e compania Odinsa. Mientrastanto awe mainta Elmar a informa cu e kabel ta bek den servicio despues di dos siman di trabou riba dje. E trabounan di Green Corridor mester a keda entrega na luna di augustus. Pero esaki no ta e caso mas awor, y un fecha nobo no por a wordo duna ainda. Foto cortesia Elmar. 

  • Awe NV Elmar ta cuminsa uza e kabel grandi di 60KV atrobe

    Awe NV Elmar ta cuminsa uza e kabel grandi di 60KV atrobe

    ORANJESTAD - Despues di dos siman di e susedido, uzando 27 trahado entre esunnan di NV Elmar y di contratista priva y dos experto di kabel for di Hulanda, awe NV Elmar lo cuminsa uza e kabel grandi di 60KV atrobe. A kap e kabel dos siman pasa, cu consecuencia cu mester a kita coriente den varios area y parti e coriente via otro "feedernan".

  • Falta apenas 1 dia pa encuesta debate di millennials cera

    Falta apenas 1 dia pa encuesta debate di millennials cera

    ORANJESTAD – Falta apenas 1 dia pa e encuesta mas nobo di NoticiaCla y Doc Opleiding cera. Ta trata di e encuesta basa riba e debate politico positivo di Millennials cu a tuma lugar siman pasa diahuebs. E encuesta ta duna un bista di kico e comunidad cu sea a presenta esaki en persona - of e version televisa- ta pensa di e evento. Ademas tin mas pregunta cu ta laga e participante mes contesta e preguntanan haci e anochi ey. E encuesta ta tuma apenas 4 minuut di bo tempo, y ta duna un bista di kico tur esnan participando ta haya di e evento. Tambe e ta duna un bon bista di un grupo specifico nan patronchi di voto, cu ta informacion valioso cu por tene na cuenta pa esnan cu ainda no a dicidi pa ken nan vota, of pa e partidonan tene cuenta cu ne den e ultimo dos lunanan cu falta prome cu eleccion. E encuesta ta cera diabierna algo prome cu merdia. Pa participa na e encuesta, click AKI

  • Bapor crucero a cancela Aruba debi na ex Tormenta Tropical Don

    Bapor crucero a cancela Aruba debi na ex Tormenta Tropical Don

    MIAMI/ORANJESTAD – E loke tabata tormenta tropical Don a afecta Aruba den sentido cu un bapor crucero a dicidi di desvia y bishita Puerto Rico awe envez di Aruba. Ta trata di e bapor crucero Carnival Vista. Carnival Magic tambe ester a altera su itinerario debi na e mal tempo. Mientrastanto e tempo a cambia y Don a desintegra den un ola tropical. Carnival Vista cu a sali for di Miami, mester a yega Aruba awe, pero awor a opta pa baha na San Juan Puerto Rico. Carnival Magic mester a yega Corsou pero a opta pa keda ‘riba laman’. Foto ta di archivo di un bishita previo di Carnival Vista na Aruba. 

  • METEO: Yobida di entre 5-15 mm na caminda pa Aruba

    METEO: Yobida di entre 5-15 mm na caminda pa Aruba

    ORANJESTAD - E ola tropical, resto di Tormenta Don ta bay tin efecto riba tempo di Aruba proximamente.  Segun METEO, e asina yama mid - level vortex di loke tabata Don ta Noord Oost di Bonaire. Esey lo pasa pa 6pm noord di Aruba.  Segun servicio meteorologico, e awacero di awe mainta mientrastanto lo por genera awacero entre 5 pa 15 mm ora cu e ta cla. E potret di radar di Corsou ta mustra e tempo aki aworaki. 

  • A causa destruccion riba dama Husticia

    A causa destruccion riba dama Husticia

    ORANJESTAD - Antisocialnan a comete acto di vandalismo riba nos 'dama husticia' dilanti di Corte di Husticia. Mientras cu e detayes no ta conoci, NoticiaCla a compronde inoficialmente cu un persona ambulante lo ta responsabel pa e acto aki. Confirmacion di su detencion no por a wordo haci. E potret banda drechi ta e estatua den su forma optimal, mientras cu esun banda robes ta despues di e destruccion. 

  • Powered by SETAR