Prome minister di Aruba y Corsou ta topa otro mayan na Corsou

Prome minister di Aruba y Corsou ta topa otro mayan na Corsou

Posted on 01/10/2017 10:55 am AST | Updated on 01/10/2017 8:23 pm AST

WILLEMSTAD - E intencion ta pa diaranson awor prome minister di Aruba Mike Eman y su colega di Corsou Hensley Koeiman topa otro. No ta conoci si esaki lo bira un encuentro formal of djies toca tema di un forma mas informal. Koeiman a confirma esaki na NoticiaCla.com dialuna ultimo. Ela splica cu dialuna ela papia cu Eman durante su bishita cortico na Corsou relaciona cu entiero di bankero Lio Capriles. Eman a yam'e na e ocasion aki, y a bisa cu e ta bolbe diaranson pa bolbe otro entiero, y e ora nan lo topa otro pa toca temanan comun. "Nos ta paisnan cu ta hopi cerca otro, antes den Antias, y nos mester mantene un bon relacion y nos mester soru pa hunto nos haci cos cu ta cumbini tanto Aruba, Bonaire y resto di ABC eilanden pa hunto nos progresa" Koeiman a sigui bisa. 

SITUACION CORSOU

Pa loke ta e situacion politico na Corsou, Koeiman a sigura cu awor tin un tiki trankilidad y stabilidad. "Nos ta spera cu nos por sigui bay dilanti awor cu e otro parlamentarionan tambe a huramenta. Pues e team ta completo". E prome mandatario di Corsou a mustra cu despues di un periodo di eleccion cu a yega cu tin un gobierno, tin cu bay cumpli. "Nos tin cu bay ehecuta loke cu nos a priminti e pueblo. Ta masha masha importante pa dje forma ey bo restablece confiansa bek, pasobra pueblo mester confiansa den politiconan".  Koeiman a bisa e portal aki cu nan kier ta e diferencia, y demonstra realmente cu loke cu nan a palabra, nan ta bay pa nan haci. 

 

 

 

 

  • Powered by SETAR