Eman: Tin cu inverti pa drecha relacion cu Gobernador

Eman: Tin cu inverti pa drecha relacion cu Gobernador

Posted on 01/9/2017 10:45 pm AST | Updated on 01/10/2017 7:30 am AST

ORANJESTAD - Gobierno no tin confiansa den Gobernador nobo y lo tin cu bay traha riba esaki pa reestablece e confiansa ey bek. E herida ainda ta mucho grandi pa bay haci como si fuera nada no a pasa entre gobierno y Gobernador nobo, rond di su nombracion aña pasa. Asina prome minister Mike Eman a reacciona pa NoticiaCla.com dialuna riba e 'comportacion' di gobierno siman pasa rond di instalacion di e Gobernador. 

'FALTA DI RESPET' Y 'MUCHACHADA'

Nan presencia minimo diahuebs den Parlamento y ausencia total den e receptie a wordo hopi cuestiona den comunidad, yamando esaki 'kinderachtig' osea muchachada, y 'falta di respet'. Fraccion di MEP a bay asina leu di bisa cu Eman mester pidi Rey Willem Alexander despensa pa e actuacion di siman pasa manera cu a actua contra su representante Gobernador Boekhoudt. 

PRESENTE DEN MOMENTO IMPORTANTE

Eman como reaccion, a mustra cu e tabata presente den Parlamento pa por cumpli debidamente cu e responsabilidad constitucional. Pero mes momento ta recorda cu e no ta un secreto cu e forma con e proceso a cana, a haci Aruba hopi dolor, y gobierno di Aruba tin hopi dolor. Y lo dura un periodo pa wak con por drecha esaki y haya e confiansa bek. "E ta un tarea di tur dos banda" Eman a bisa. Segun Eman, e ta duna como muestra di  intento di gobierno pa cu esaki, e hecho cu nan tabata presente na e momento di mas importante cu ta e momento di instalacion (di Gobernador den Parlamento siman pasa diahuebs). 

HERIDA 

"Di fiesta nos no ta, p'esey nos no ta (bata) na e celebracion (di diabierna na e recepcion di aña nobo) pasobra nos ta haya cu tin un herida cu no lo mustra sincero si nos cana eynannan cu un smile grandi pasobra e ta un hecho cu nos no ta di fiesta cu locual a sosode" Eman a sigui bisa. Y ta p'esey, pa e motibo ey, Eman ta kere cu cada minister y minister ta liber pa tuma e desicion cu nan kier (di atende un evento asina). E mandatario ta confirma tambe cu a discuti e situacion internamente y partido, cu pa loke ta e aspectonan constitucional, nan lo duna tur colaboracion y contenido tambe pasobra e ta haya cu mester mantene e sistema constitucional semper intacto, fuerte y sin ningun discusion rond di e aspectonan constitucional. "Rond di e tema di celebracion esey ta algo otro" Eman a bisa. 

PRESENCIA MINIMO DI MINISTER DEN PARLAMENTO

E hecho cu tabatin solamente 3 minister presente na Parlamento diahuebs segun Eman, ta discrecion di cada colega. "Cada minister ta liber pa dicidi pasobra cada uno tabatin nan experiencia di cerca cu loke a tuma lugar" Eman a bisa. Cu esaki e ta mustra cu e loke cu cada un minister a experencia cu e awe Gobernador, tabata diferente y basa riba esey, nan a actua. 

GOBERNADOR NO A TENE SU PALABRA 

Eman a bay mas den detaye di loke a sosode rond di e nombracion, revelando cierto detayes. "Nos tin cu corda cu e personalidad di Gobernador awe tabata na Aruba un anochi prome cu e nombracion a tuma lugar den Rijks Ministerraad y palabracionan a wordo haci cu coleganan minister cu tabata presente e dia/anochi ey" Eman a bisa. Aki e mandatario ta indica cu e palabracionan ey lo no a wordo manteni pa e actual Gobernador, cu a pone cu e colega ministernan no ta contento cu esey. "Y nan tin cu verwerk pa e desapunto cu tabatin rond di e situacion" Eman a sigui bisa. Mes momento ela bisa cu ta miho pa awor enfoca riba e futuro. 

COOPERA CU PARTI CONSTITUCIONAL

Pero ora cu a puntra e mandatario ta pa mas specifico kico e kiermen cu coopera cu e parti constitucional den futuro, e mandatario a simplemente bisa cu ta 'tur cos cu mester wordo haci pa constitucionalmente por funciona, y tur e aporte ey gobierno lo duna. "P'esey Parlamento tabat'ey pa ricibi e Gobernador (diahuebs mainta). Minister president tabat'ey pa representa e gabinete pa tambe forma parti di e momento constitucional ey, y tur esaki tabata importante pa en todo caso e aspectonan constitucional di e funcionamento di un Gobernador no sufri bou di e proceso cu a tuma lugar y e confiansa cu mester wordo crea" e prome mandatario a sigui bisa. Ora cu a puntra e mandatario si e ta referi tambe e ora cu e bishitanan regular di gobierno na Gobernador lo tuma lugar, ela prefera pa no continua cu e combersacion y a bisa 'na otro ocasion lo sigui elabora riba esaki'. E tabata interesante pa sa pasobra a compronde cu esaki lo no a bay sosode (e audiencianan cerca Gobernador). A compronde cu e siman aki e prome bishitanan lo mester cuminsa cerca Gobernador.  NOTA: Foto ta di prome minister Eman y e tempo ey minister plenipotenciario Alfonso Boekhoudt durante un conferencia di prensa na Den Haag aña pasa februari pa anuncia e sitio pa e conferencia di Nacionan Uni (foto Suzanne Koelega)

 

  • Placa di FDA pa e.o. drecha infrastructura destrui pa mal tempo

    Placa di FDA pa e.o. drecha infrastructura destrui pa mal tempo

    DEN HAAG – E suma di 16 miyon florin cu a resta di Fondo Desaroyo Aruba, lo wordo destina a corto plazo pa reparacion di entre otro camindanan y otro infrastructura na Aruba cu a keda afecta pa e mal tempo na november di 2016. Awe mainta minister presidente di Aruba Mike Eman y minister hulandes Ronald Plasterk a acorda esaki na Hulanda y firma un acuerdo riba e destinacion aki. Ademas, lo destina e placa tambe pa ‘bon gobernacion, desaroyo duradero, enseñansa y proteccion di naturalesa." E placa pa naturaleza mester wordo destina primordialmente pa proteccion di rifkoraal.

  • Lamento pa practica di fraude den companianan estatal

    Lamento pa practica di fraude den companianan estatal

    ORANJESTAD – “Mi ta lamenta cu practicanan asina ta sosode, especialmente den companianan estatal” tabata e prome reaccion di minister di telecomunicacion Richard Arends riba e caso di fraude cu a keda revela ayera di e compania Setar. E corant mericano Miami Herald a revela un caso di fraude miyonario cu a keda desenmascara, envolviendo un (awor ex) trahado di e Setar, cu a keda revela danki na e asina yama ‘Panama Papers’. Manera revela ayera pa NoticiaCla.com, ta trata di fraude miyonario envolviendo compra y benta di telefon celular di un forma no corecto. “Hechonan asina ta daña bon nomber di Setar y ta trece Aruba den luz negativo” e mandatario a sigui bisa e portal aki. Mas e no por a bisa. “Ta un serie di investigacion nan local y internacional ta tumando lugar. Pa bon marcha di esakinan, mi no por duna detaye pa esnan encarga por hacii nan trabou” e mandatario a finalisa bisando.

  • Dowers: Tur hende tin derecho di haci keho ora di maltrato

    Dowers: Tur hende tin derecho di haci keho ora di maltrato

    ORANJESTAD – “Logicamente tin situacionnan unda cu bo por hayabo den un tension caminda cu cos por bay for di man”. Esey tabata un comentario di minister di husticia Arthur Dowers riba e situacion di polisnan cu recientemente a cay cera, a base di sospecho di e.o. abuso “Un di e puntonan importante ta con bo ta train bo hendenan” e mandatario a sigui bisa. Un di e polisnan en cuestion su caso a bin dilanti caba, y ta tende su sentencia dia 30 di maart proximo. Riba e casonan specifico, e mandatario no por a duna comentario, pero a bisa en general, cu e forma di training cu un polis ta haya, esaki ta importante pa con e ta actua y desaroya su mes den su trabou.

  • Minister Hooyboer na e di 61 sesion di ‘Comission on the Status of Women’ na U.N.

    Minister Hooyboer na e di 61 sesion di ‘Comission on the Status of Women’ na U.N.

    ORANJESTAD -E di 61 sesion di Commision on the Status of Women a habri dia 13 di Maart na Nacionan Uni, y manera custumber tur aña, Reino Hulandes ta presenta un "statement" durante e sesion hunto cu mas cu 180 pais rond di mundo. E reunion na e Headquarters na New York ta e reunion di mas grandi tur aña cu ta dedica na debati, dialoga y trece solucionnan pa diferente tema cu ta afecta hende muhe rond di mundo. E aña aki e sesion ta dedica na “Women’s economic empowerment in the changing world of work.” 

  • Eman contento cu resultado di eleccion Hulanda

    Eman contento cu resultado di eleccion Hulanda

    ORANJESTAD – Prome minister Mike Eman ta contento cu e resultado di e eleccion na Hulanda di ayera. Asina el a declara na Aldrich Croes durante e entrevista di dia na HITS 100FM. Aunke cu e partido VVD no ta liga na partido AVP (e partido ruman ta CDA:red), e ta contento toch cu e populismo negativo no a afecta Hulanda manera tabata e caso na Merca y Inglatera (Brexit). Eman ta mira e desaroyo cu tanto CDA y D66 a bay dilanti, un punto positivo.

  • ‘Tin 350 trahador local cu ya a haya trabou cu CITGO’

    ‘Tin 350 trahador local cu ya a haya trabou cu CITGO’

    ORANJESTAD - “Tin 350 trahador local den CITGO”. Asina minister di Labor, Paul Croes, a informa pa medio di un comunicado diadomingo. Di e 350 trahado, segun Croes, ta inclui e contratista y tambe directamente cu CITGO. "Te na e momentonan aki ya caba tin mas di 350 trahador local laborando na e refineria sea directa of indirectamente. Y mi lo kier impulsa mas ainda den e lunanan nos dilanti. Nos lo mira mas hende wordo emplea den e lunanan nos dilanti. Pa nos e localnan tin prioridad esaki tambe ta locual mi a enfatisa durante nos ultimo bishita na Venezuela. Contratistanan local y trahadornan local ta mi prioridad", Croes a reitera.

  • Powered by SETAR