Reunion IPKO lo trata 'geschillenregeling' atrobe

Reunion IPKO lo trata 'geschillenregeling' atrobe

Posted on 01/9/2017 7:28 am AST | Updated on 01/9/2017 5:23 pm AST

WILLEMSTAD/ORANJESTAD - Parlamentarionan di Reino lo debati cu otro atrobe riba e asina yama 'geschillenregeling'. E siman aki reunionan parlamentario di Reino, conoci como Inter Parlementaire Koninkrijks Overleg (IPKO) ta inicia na Corsou. Ta parlamentonan di Aruba, Corsou, St Maarten y Hulanda lo reuni pa algun dia pa despues saca un declaracion conhunto. Fuera di geschillenregeling (areglo riba disputa), lo trata tambe e nombramento di gobernador nobo di Aruba. 

GESCHILLENREGELING 

Pa algun tempo caba e topico di areglo di disputa ta riba agenda di IPKO, pero cada bes tin algo cu ta pone cu e no por keda concretisa. Gran parti di e problema ta gobierno di Hulanda cu no kier acepta e palabracion haci entre e parlamentonan di Reino, incluyendo esun di Hulanda. Tin indicacion cu Hulanda no kier perde su control y cu e geschillenregeling, e control por ta na peliger. Hulanda su gobierno a ofrece un solucion pero e parlamentonan (sigur esnan di Caribe Hulandes) no kier tende di esaki. Lo wak si e biaha aki si tin algo mas concreto riba e tema aki. 

NOMBRACION GOBERNADOR

Fraccion di MEP a informa cu e tema di nombracion di gobernador tambe lo wordo trata, mirando cu aki tin un 'disputa'  tambe entre Hulanda y Aruba pa con esaki a bay. Hulanda, mientras a acepta cu e nombracion no a bay den e miho forma, y no merece un 'premio', tur cos a bay segun ley y regla. Y como tal no ta mira e problema. Ademas, entre Aruba y Hulanda a firma un acuerdo unda cu partidonan a 'bay di acuerdo' pa acepta e situacion. Sinembargo na Aruba, gobierno di Aruba ta sigui insisti cu e situacion no tabata bon y tin señal cu lo sigui boycotea e situacion di gobernador. Durante e reunionan na Corsou, esaki lo haya su debido atencion, manera cu NoticiaCla.com a compronde. Foto archivo noticiacla.com di reunionan ipko na Hulanda na 2016. 

 

 

 

 

  • Plasterk : Continuacion supervision financiero pa Aruba ta na ordo

    Plasterk : Continuacion supervision financiero pa Aruba ta na ordo

    ORANJESTAD – Un continuacion di supervision financiero pa Aruba ta na ordo y e mandatario Hulandes encarga cu Relacionnan di Reino Ronald Plasterk y/of su sucesor lo no tin obhecion pa esaki. Asina Plasterk a confirma pa NoticiaCla ayera tardi. E mandatario tabata na Aruba pa 24 ora den su bishita di despedida di Caribe Hulandes. “Den un combersacion recien cu minister di Finanzas (Angel Bermudez), el a bisami cu mester continua cu un forma di supervision financiero, sea extendiendo esun actual of un otro tipo (di supervision financiero)” Plasterk a sigui bisa. “Pa cuanto tempo y den ki forma, ta keda pendiente” e mandatario a sigui bisa. E pregunta a bin a base di declaracion di e presidente saliente di e colegio di supervision financiero, CAft esta Age Bakker cu a retira na juli ultimo. Segun Bakker, e ta kere cu mester simplemente haci e supervision di CAFT uno permanente.

  • ‘Desorden planifica’ a mancha ultimo debate politico di KVK

    ‘Desorden planifica’ a mancha ultimo debate politico di KVK

    ORANJESTAD – ‘Desorden planifica’ ta loke hopi cu a bishita e debate final di Camara di Comercio, a cualifica e evento. No pa motibo di Camara di Comercio mes, sino pa un grupo hoben di simpatisantenan di e partido berde AVP, cu a dicidi na final pa desobedece orden y crea un tipo di ‘desorden’ na final. “Mi ta desapunta cu nan no a respeta nos reglanan” presidente di KvK, Ernst Mohammed a bisa NoticiaCla na final refiriendo na e grupo aki. E formato diferente di e debate riba su mes tabata dinamico, aunke cierto momento complica, pero sigur diferente cu e prome debate teni na juni ultimo.

  • Wyatt Ras: Parlamento a cuminsa traha bek awe despues di reces

    Wyatt Ras: Parlamento a cuminsa traha bek awe despues di reces

    ORANJESTAD - Parlamento di Aruba a sigui awe cu trabounan normal despues di reces. Desde 10 di juli Parlamento tabatin su reces anual. Den e periodo aki a probecha pa haci trabou nan necesario di mantencion. Entre otro a cambia e sistema di airco y a cambia parti di tapijt. Tur esaki tabata posibel ora cu a resulta na fin di aña 2016 cu contrario na loke a ser sugeri anteriormente, a resta placa ariba presupuesto di Parlamento. Segun Presidente di Parlamento e ex vice-Presidente y ex-Presidente di Parlamento tabatin discusion tocante e suma disponibel pa Parlamento. Wyatt-Ras tabata sorpresa ora a resulta fin di aña cu hasta a resta placa. E placa awor a ser bon gasta y a bay pa e sistema di airco. Wyatt-Ras ta gradici personal di parlamento pa e sosten y pasenshi durante e trabou nan. Awe lo schedule diferente reunionnan pa trata leynan cu a drenta Parlamento, entre otro esun di FDA, reglamentacion pa deurwaarder y “intrekking” di diferente leynan bieu.

  • Partido AVP a presenta nan programa di partido 'Padilanti'

    Partido AVP a presenta nan programa di partido 'Padilanti'

    ORANJESTAD - Partido di Pueblo Arubano AVP a presenta su Programa di Partido pa 2017-2021 diamars anochi. Un publico cu for di trempan a yena e espacionan di Renaissance Convention Center tabata testigo, mientras cu atravez di television y live stream riba media social, otro ciudadano a conoce tambe e plan yama 'Padilanti'. Segun e partido, "Aruba Padilanti” no ta simplemente un plan y vision cu hunto nos mester carga; e ta un pensamento, e ta un vision cu ta inculca un compromiso, e compromiso pa comparti e prosperidad den nos pais," asina lider di partido Mike Eman a bisa den su discurso cu, cu 'standing ovation' a cera e programa di e grandioso anochi aki. Keda pendiente pa contenido di e programa. 

  • ABO no a logra yega 578 firma y no por bay eleccion

    ABO no a logra yega 578 firma y no por bay eleccion

    ORANJESTAD – Partido politico ABO no ta participa den e proximo eleccion. Nan no a logra yega e cantidad di firma necesario di 578 firma necesario manera cu ley a rekeri e aña aki. Ora cu e ora final a yega, esta 8:30 pm, e partido (segun cifra oficial di censo.aw) a cera cu 487 firma, faltando 91 firma. Den e un ora y mey cu a falta, nan a logra nan ultimo 55 firma, pero cu no tabata suficiente pa logra e meta. Lamentablemente como tal, partido ABO ta keda asina for di e eleccion di dia 22 di september 2017. Tur otro partido cu tabatin necesidad di colecta firma, a logra esaki. Foto archivo di NoticiaCla di entrega di lista di partido ABO. 

  • Partido MAS a yega su 578 firma pa participa na eleccion

    Partido MAS a yega su 578 firma pa participa na eleccion

    ORANJESTAD – Mey ora despues cu Censo a habri posibilidad pa continua cu proceso di firma pa partidonan politico, partido MAS a logra su cantidad di firma di 578. Cu esaki, e unico partido cu falta pa acumula e firmanan pa por garantisa su participacion na e eleccion, ta partido ABO, cu tabatin 298 firma, faltando 280 firma ainda prome cu e dia cera. Nan tin te 8:30 pm pa acumula e cantidad necesario.

  • BDC3
  • Powered by SETAR