Ken ta ingenuo? Mike de Meza, Richard Arends of ESNAN cu a kere nan y duna nan card blanche?

Ken ta ingenuo? Mike de Meza, Richard Arends of ESNAN cu a kere nan y duna nan card blanche?

Posted on 12/28/2016 4:41 pm AST | Updated on 12/28/2016 5:51 pm AST

UPP na varios ocasion a bin ta adverti e 21 miembronan di parlamento pa no bay ciegamente tras di loke gobierno di Aruba a presenta bou di nan nanishi, pa loke ta e supuesto reapertura di e refineria, cu mas bien ta un "upgrader" of “blender”. Nos a spera un parlamento cu lo a exigi e tempo necesario y exigi tambe TUR documento (tambe esunnan secreto cu lo ta existi segun nos por a comprende for di declaracionnan di sr. Koenders, minister di exterior di Hulanda) encuanto e deal cu Citgo pa asina por a haci un estudio riguroso y profundo cu e unico proposito pa evita cu nos pueblo hay'e den un debacel. Pero POPULISMO tabata mas importante, en todo caso pa e 19 parlamentario y 9 minister (incluyendo Otmar Oduber). Incluso tabata tin parlamentarionan cu a pretende cu sin lesa e documentonan en cuestion, e tabata convenci cu e contrato cu Citgo ta mihor cu esun cu na 1989 Coastal a cera durante e gobernacion  di Gabinete Oduber I. 

Recientemente a sali un articulo den NoticiaCla.com, Bon Dia Aruba y tambe Amigoe cu ta mustra cu Citgo ta 100% te na su strot hipoteca. Aunke ta ser bisa cu esaki lo no tin consecuencia directo pa e "upgrader" di Aruba, UPP ta di opinion cu no mester descarta e posibilidad cu PDVSA, dor di acto aki, lo no por haya ningun instituto financiero asina loco di bay fia nan placa pa rehabilita e planta na Aruba. Awor por compronde pakico Citgo y PDVSA tabata pura pa cera e deal aki, ya cu asina nan por a bay over na hipoteca e compania. Pues UPP ta exigi claridad pa cu e consecuencia cu esaki lo por tin pa Aruba den e caso cu PDVSA no cumpli cu e Rusononan. 

E populismo ta sigui su rumbo ora cu UPP a tuma nota cu un biaha mas tin parlamentario cu ta bin bisa cu ela reuni cu alto funcionarionan di PDVSA y nan a sigur'e cu tanto contratista local como trahadornan local lo haya preferencia. Pero e realidad sunu ta otro. Recientemente sr. Zambrano a tuma 12 hende den servicio di cual 10 ta VENEZOLANO y solamente DOS SO ta local. Y  pa colmo TUR trahador local MESTER drenta via PMEC, compania di Mike de Meza. Aunke cu e kier haci comosifuera cu e no tin nada di haber cu dicho compania.

Y si e informacion cu UPP a logra di haya ta cuadra cu berdad, anto e parlamentario aki mester bay duna un splicacion dicon trahadornan local no ta haya preferencia y tambe mester splica pueblo dicon den e contract ta poni cu PDVSA  por contracta un contratista extranhero pa bin haci un trabou si no tin un contratista Arubiano pa haci esaki? Dicon no por duna e contratista local mes e oportunidad pa busca hende di pafor pa haci e trabou aki?? Ta compinchinan di esnan di PDVSA lo bin haci e trabou, manera ya caba nan ta haciendo cu e grupo di mas di 15 Venezolano den inspeccion??

Colmos de los colmos, den e mesun articulo ta stipula cu den e caso cu e contratista local tin un trahador local cu por haci e trabou, pero Citgo Aruba ta haya cu e prijs no ta competitivo Citgo Aruba tin e pleno libertad, derecho y autoridad pa busca un contratista di afo bin haci e trabou cu su trahadornan y gobierno ta OBLIGA di duna e hendenan aki permiso di trabou!! Y nos sa cu Arubiano capacita ta mucho mas costoso cu uno for di afo. 

Tur esaki ta wordo regla den articulo 9.4. di e contracto entre Citgo/PDVSA y Aruba. Ki berguensa y insulto pa e trahador Arubiano capacita.

E asunto ta bira pio ainda ora cu nos lesa articulo 12.2(b)(iv) di e contrato ariba menciona. Den e articulo aki ta stipula cu Citgo Aruba por paga e contrastista stranhero aki pa colmo tambe den MONEDA extranhero pa nan servicionan, trabounan, tecnologia y productonan. Cu otro palabra ni loonbelasting, ni BBO etc. nan lo bai paga riba e salario di e trahadornan of e producto y servicionan cu e contratistanan aki lo ofrece.

Poco poco e puitonan ta saliendo for di e contrato entre Citgo/PDVSA y Aruba na unda Aruba lo ta esun cu lo sali e gran perdedor. Nos ta spera cu aki un paar di dia no bin algun parlamentario padilanti bin grita cu nan ta kita nan sosten for di e acuerdo aki mescos cu a sosode den e asunto di e amienda.

Si tene na cuenta 1) cu e compania di Mike de Meza ta keda strika placa cu e boiler riba e tereno di e "upgrader"; 2) cu de hecho TUR empleado local cu haya trabou den e compania lo mester drenta via e mesun compania di Mike de Meza; 3) cu CITGO tin e autoridad y e prerogativo di contrata compania extranhero pagando esakinan na bolivar, cu na su turno ta nifica un concurencia "unfair" cu nos contratistanan local, cu SI mester paga na florin, paga loonbelasting y inkomstenbelasting; y 4) cu den caso cu tin trahador local di igual experiencia, pero mas costoso, e compania por busca trahador extranhero y pague un  sueldo miserabel, e ora e pregunta balido ta si enberdad por sigui yama Mike de Meza y Richard Arends nan SO pa  INGENUO, kendenan cu deliberadamente a hinca Aruba den otro debacel financiero cu sosten di casi tur parlamentario, of e apodo aki por ser pasa pa tur e parlamentarionan cu ciegamente a bay di acuerdo cu e "wurgcontract" aki?? 

Un cos ta sigur, cu ta pa motibo cu Aruba tin un set di parlamentarionan iresponsabel cu no a exigi di gobierno pa nan haya e tempo necesario pa studia e contratonan, awe poco poco ta sali afo cu ta nos pueblo ta esun cu ta bira victima di incapacidad di 19 parlamentario y 9 minister cu a scoge pa un multinacional (hipoteca te den su strot) enbes di scoge pa e bienestar di e pueblo Arubano.

 

Lider di UPP

C.A.S.D. Wever

28 december 2016

 

  • Opinion: Supervision parlamentario efectivo?!

    Opinion: Supervision parlamentario efectivo?!

    Dia 27 di october 2017 e di dies inicio di Parlamento a tuma luga cu bastante tamtam. Tawatin cantidad di bon intension y promesa. A pone hopi emfasis riba e interes di pais y su ciudadanonan. E pregunta ta, si e biaha aki como excepcion no ta trata di storia atrobe?

  • Opinion: Un yamada urgente na AVB encuanto futbol femenino na Aruba

    Opinion: Un yamada urgente na AVB encuanto futbol femenino na Aruba

    Futbol femenino na peliger!: Cu nan accionnan Arubaanse Voetbal Bond (AVB) lo hiba futbol femenino na Aruba den decadencia!

  • Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

    Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

    E siman aki nos por a mira con arogancia den politica aki na Aruba parce di no tin limite. Nos por a tuma nota e.o. di un entrevista realisa pa NoticiaCla cu dos minister di e actual gobierno cu e proposito pa sa si nan lo continua den politica y e motibo dicon nan e escoge pa sigui. Tambe nos por a mira e actitud di un minister cu ta sinta na cas ta cobra, ta bin cuestiona e investigacionnan rond su persona y cu ta trata di algo politico aki.

  • Academico, Experto, e microfono ta dibo!

    Academico, Experto, e microfono ta dibo!
  • Opinion: 'Een schuld op steroids, en … wat je niet verteld wordt !'

    Opinion: 'Een schuld op steroids, en … wat je niet verteld wordt !'

    Een Conspiratie met de CAFT: Deze buitegewoon lid van de Raad van State, A. Bakker,  zal uitleg moeten geven over de 6 pagina tellende CAFT rapport d.d. 4 maart 2016 aan de Minister van Financiën, dhr. A. Bermudez, welke ervoor gezorgd dat Aruba weer miljoenen heeft kunnen lenen, met goedkeuring van Minister R. Plasterk, en Premier M. Rutte, terwijl in dit 6 pagina tellende rapport een aantal woorden verschijnen met de volgende frequenties: “tekort 18x,  waarvan tekortnorm 4x, voorlopig 12x, verwacht 11x, verbeter 6x, gebleken 3x, graag 3x. plan 3x, raming 3x, ruim 3x, signaleert 2x, summier 1x, tentatief  1x, tijdelijk 1x, schatting 1x, en het woord DEFINITIEF…maar 1 x.”  

  • Populismo y neo-liberalismo den aña di campaña

    Populismo y neo-liberalismo den aña di campaña

    Na maart di e aña aki UPP a denuncia cu e hecho cu ta e propio trucknan di Serlimar, bou instruccion di e director di Serlimar di e tempo ey hunto cu e minister responsabel, tabata tira sushi den candela, pa di e manera ey tene e candela cendi. Lider di UPP, Booshi Wever a mustra esaki via di su Facebook cu potretnan cu e mes a saca. Mientras cu e tempo ey kier a laga pueblo kere cu ta “otro hende” ta pega sushi na candela.

  • Powered by SETAR