- Wever: Fin di di dos cuartaal 2024, centro di Oranjestad ta haya mas luz
- Banco Central ta mantene e tasa di reserva obligatorio na 22,0 porciento
- DEA: Cabesante y docentenan ta sigui prepara pa introduci Papiamento na scolnan basico
- A.T.A.: Por Mira Documentario Blue Lizard Effect via nos Planta Nacional TeleAruba
- Corte: Caso ‘Isla di Oro’ ta sigui fin di luna awor, cu mesun huez
Homber cu a golpea tanta mata, a haya 12 aña di prizon
ORANJESTAD - E homber M.A.B. cu a golpea su tanta mata, a haya 12 aña di prizon awe pa Corte den Prome Instancia. Corte a haya cu ta comproba cu e homber a intencionalmente mata su tanta di edad halto, dor di dal e cu mokete y cu forsa varios biaha na su cabes. E sentencia di Corte ta de acuerdo cu e exigencia di Ministerio Publico. Durante e tratamento, fiscal a exigi un castigo di 12 aña contra e sospechoso aki.
RAPPORT NFI
Di importancia decisivo den e caso tabata e rapport di NFI (Instituto Forensico Hulandes). For di investigacion di NFI riba e curpa di e victima a sali cu señora a fayece a consecuencia di un hersenbloeding, cu a sucede un rato prome cu su morto.
E SUSESO
E anochi di 23 di maart 2016, B. y su tata tabata e uniconan (banda di e victima) na cas. B. a declara despues cu su tata tabata drumi caba ora ela pone su tanta den cama, y cu tur cos tabata oke. Mas laat el a scucha (segun su declaracion) un sonido, despues di cual el a bay wak cerca su tanta kico a pasa. Ela ripara cu su tanta tabata benta riba flur banda di e cama, y cu e tabatin un bolobonchi na su cabes. El a carg'e pone riba un stul, y a yama su tata.
LESION RICIBI
NFI a constata cu e lesion cu señora tabatin na su cabes, imposiblemente por a wordo causa pa un caida di cama. E conclusion di NFI tabata cu señora a fayece a consecuencia di violencia di golpi riba of na su cabes. Tabatin hopi blousa tambe na su cara, curpa, brazanan y pianan, pero NFI no por a yega na un conclusion tocante cuanto biaha lo a wordo aplica violencia riba su curpa. E lesionnan aki a bin sinembargo, dor cu un hende tabata wordo gedal of golpea frecuentemente.
SOSPECHOSO A NENGA
B. semper a nenga. Corte den Prome Instancia a deduci a base di e contenido di e pruebanan cu considerando cu señora a fayece a consecuencia di violencia cu ela sufri un rato prome cu su morto, y considerando cu B. tabata e ultimo cu tabata cerca dje, no por saca ningun otro conclusion cu tabata e mes cu a dal y golpea su tanta.
E TANTA
E victima tabatin 73 aña bieu y no tabata por a papia, ni cana. Su curpa tabata hopi fragil y e tabata pisa solamente 40 kilo tempo ela fayece. B. mester por tabata sa cu si e golpea un persona asina bros varios biaha cu violencia bruto na su cabes, e persona aki lo minimo lo sufri lesion grave. Corte den Prome Instancia ta considera comproba cu e intencion di B. tabata pa mata su tanta, pasobra algo cu tur hende sa ta cu si bo golpea cabes di un persona varios biaha cu forsa, e chens ta considerabel cu e persona aki ta fayece. B. a aparentamente tuma e chens aki concientemente.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
