ORANJESTAD - Scogiendo pa interes general, Corte a rechasa peticion di un grupo di trahado di InselAir Aruba pa forsa e compania pa cumpli cu traspaso di pagonan retene riba belasting y pensioen. Asina Corte a dicta den e sentencia awe mainta. Mes momento Corte ta mustra si cu e caso di e trahadonan ta uno solido y fuerte. "Pero pa interes general mester desvia y tuma parti pa InselAir awor", corte ta dicta den su sentencia. Ta keda vigila e situacion di awor pa januari pa wak si e situacion ta cambia. E caso a tuma lugar dialuna y ya 2 dia despues tabatin sentencia, cu ta mustra urgencia di e caso.
ARGUMENTACION
Hues a mustra cu e hecho cu belasting no a haci 'fastioso' pa cobra belasting atrasa, no ta kita e responsabilidad y obligacion di InselAir pa cumpli cu nan responsabilidad. Pa loke ta e parti di pensioen, e problema di ken a acepta of no acepta pago, no ta relevante pa e relacion entre e trahadonan y InselAir. De hecho e responsabilidad di esaki ta cay pa InselAir over di e discrepancia aki. Tur e puntonan aki sinembargo no ta nifica si cu ,- segun hues-, e mester bay di acuerdo cu e peticion di e trahadonan awor. A demonstra cu e compania tin problema financiero pero con nan a yega na e problema aki, no ta relevante pa e caso sumario aki, segun e hues.
KICO TA RELEVANTE
Loke ,- segun hues - ta relevante ta si tin suficiente interes pa e trahadonan pa tin pago inmediado di e sumanan menciona, compara cu e interes cu InselAir tin den e caso aki,y e consecuencia pa cu esaki. "No obstante cu e caso di e trahadonan ta hopi duro, mester desvia y duna InselAir rason den e caso aki". Ademas, impone un multa di maximo 10 miyon florin ta solamente hinca e compania den un problema mas severo, cu tur e consecuencia cu esaki por tin. Algo cu na fin por perhudica e propio trahadonan. E por tin un efecto cu lo finalmente conduci na ciere di e compania, afecta e compania na Corsou y tambe transporte aereo entre e islanan. Cu tur esaki mester wak e bienestar general (pa awor) y dicta na fabor di e compania, pa problematico cu esaki por zona pa e trahadonan awor. Huez ta bisa tambe cu dependiendo e desaroyo den december y januari, su decision den un caso na e momento ey lo por ta otro. Por lesa e veredicto completo aki.
ORANJESTAD – E testigo principal di parti defensa den caso Flamingo, den e caso aki, e hefe di BCI, lo no por declara dilanti Huez Comisario. Asina ex minister Otmar Oduber a declara publicamente diamars. Segun e ex mandatario, Huez Comisario a informa nan diabierna ultimo cu e motibo ta cu salud di e testigono ta permiti.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.