ORANJESTAD - E avion di e compania boliviano La Mia cu a cay na Colombia e siman aki matando practicamente henter un ekipo di futbol, tabatin lasonan cu Aruba un tempo. Investigacion cu NoticiaCla.com a haci ta mustra cu na 2013, pa un periodo di algo menos cu un aña, e avion tabata registra na Aruba cu e matricula P4-LOR. Esaki debi cu e tempo ey e mesun avion ey mester a bira parti di un flota di e compania cu kier a establece na Aruba. Algo cu despues no a logra y cu finalmente si a logra na Bolivia. E mesun avion ey, ta esun cu a cay na Medellin matando 75 persona.
FLOTA PA ARUBA
Segun informacion cu NoticiaCla.com a acumula, ta mustra cu e intencion tabata di un grupo di Venezolano (cu algun Arubiano) pa lanta un aeroliña local na 2013. For di 2011 e compania a keda registra como Linea Aerea Merida Internacional de Aviacion ( La Mia) na Camara di Comercio di Aruba, y mester a bira operacional na november 2013. E intencion tabata pa opera cu 4 avion tipo Avro RJ85s di Britisch Aerospace. Tur cuater, incluyendo esun cu a cay, esta P4-LOR, cu despues a cambia dos biaha mas y ora di e crash, mester a keda registra na Aruba pa por a pasa den e proceso di scrutinacion y haya licencia local. E avion cu a cay, tabata den operacion for di 1999 y de hecho a wordo 'afgeschreven' caba.
"Nan a cuminsa enberdad cu e proceso pa lanta un compania di aviacion na Aruba" fuentenan na Directie Luchtvaart a confirma na NoticiaCla.com diaranson. "Sinembargo mitar caminda nan a descontinua e proceso, ora cu nan a mira cu no por cumpli cu e exigencianan" e fuentenan a sigui bisa. Tin tambe ta bisa cu problema cu placa no a laga nan continua e operacion na Aruba. E minister encarga cu transporte e tempo ey, Otmar Oduber tambe ta corda e plannan di e compania ey. "Mi ta corda enberdad e intento di e compania", Oduber a bisa. E ta corda cu 2 di e flota di 4 avion lo a keda registra na Aruba durante e periodo cortico ey (investigacion di NoticiaCla.com ta mustra cu e avion cu a crash, tabata registra na Aruba entre october 2013 pa september 2014) pa menos cu un aña. Despues cu e plan no a logra, a haci e intento tambe na Venezuela. Aki tampoco e compania no a logra y a purba nan ultimo suerte na Bolivia na januari 2015. Aki si e compania a mira bida.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.