Prome dia Aruba Beach Tennis Open 2016 ta tras di lomba

Posted on 11/15/2016 10:26 am AST | Updated on 11/15/2016 10:27 am AST

ORANJESTAD -  Cu casi 1200 participante, representando 32 pais, ayera a cuminsa riba Eagle Beach Aruba, e prome Aruba Beach Tennis Open. Un torneo, organisa hunto cu e federacion internacional di Tennis (ITF), cu ta carga e nomber “open” cu ta dune un posicion halto den tur otro competencia di Beach Tennis rond di mundo. Un torneo cu ya ta wordo organisa pa basta aña, pero cu e aña aki a haña un nomber nobo, cu e lo bai keda carga pa un tempo basta largo.

Ayera a cuminsa e categoria di singles den diferente nivel: fun, intermediate, advanced como tambe pro. Esaki ta wordo hunga pa ambos femenino y masculino. Dialuna a tuma lugar e ronde nan pa clasifica pa asina aki por sigi pa e final cu lo tuma lugar awe, diamars 15 november. E weganan ta cuminsa pa 9or di mainta y lo termina awe nochi cu e final di Singles den tur categoria. Awe tambe lo tin e categoria di hubenil entre tur e paisnan participante

Diaranson lo cuminsa den e categoria di mix doubles, como tambe e ronde eliminatorio pa e categoria hubenil. Diahuebs tin Nations Cups cu ta duna tur pais participante e chens pa bira campeon pero e biaha aki representando nan pais, y no individualmente. 

E competencia, cu tur hende ta prepara pe, lo start diahuebs atardi cu e qualification rounds pa e ITF ranking. Akinan, atrobe den cada nivel, lo tin participante batayando pa wak ken ta logra drenta e final draw cu lo tuma lugar diabierna y diasabra pa asina jega na e final diadomingo 20 november 2016. Atrobe nos ta remarca cu tin wega henter dia na Eagle Beach, cuminsando pa 9or di mainta y ta termina pa 10or di anochi. Ta boso falta pa jega. Nos ta warda boso. Entrada ta completamente gratis

  • Reino Hulandes ta cay venci contra Puerto Rico den World Classic Baseball

    Reino Hulandes ta cay venci contra Puerto Rico den World Classic Baseball

    LOS ANGELES — Carlos Correa di Puerto Rico a score e ultimo careda den e di 11 inning y laga Reino Hulandes den tereno. Puerto Rico ta gana cu e score di 4-3 den un wega cu a laga hopi hende lanta te final (despues di mey anochi) for di momento cu e wega a cuminsa 9’or di anochi. Reino Hulandes a comete algun fayo garafal na comienso di e wega, costando nan por lo menos 4 careda. Algo cu e manager Meulens no tabata nada contento cu ne. Despues toch e team forma practicamente pa yiunan di Corsou y di Aruba, a logra pone pia abou y midi forsa sam sam cu Puerto Rico. E wega a yega e score di 3-3 y a keda asina te final, teniendo tur hende den suspenso. Riba rednan social por a nota e tension cu tabata biba riba e dos islanan Aruba y Corsou, cada bes ora cu e hungadornan tabata sea bati of fildea, creando momentonan di tension serio. Bon wega sigur ta loke mayoria a sigui bisa. Cu Reino Hulandes no a gana, no tabata nada pa hopi, y e reaccion tabata indica esey tambe. A gradici pa e bon ratonan cu a pasa, y cu a pone nos lubida tur problema cu nos tin akibanda. Pa algun ora Aruba y Corsou tabata uni den alegria, tension y mas, pa wak si ta yega final. Algo cu no a logra, pero cu ta cosnan cu por pasa.

  • Presidente di FIFA ta bishita Aruba otro luna

    Presidente di FIFA ta bishita Aruba otro luna

    ORANJESTAD – E presidente di e federacion internacional di futbol Fédération Internationale de Football Association (FIFA) esta Giovanni Vincenzo "Gianni" Infantino lo ta na Aruba na april. E lo hiba palabara durante e di 32 Congreso ordinario di CONCACAF (Confederation of North, Central American and Caribbean Association Football) cu ta tuma lugar riba nos isla dia 8 di april proximo. Infantino a bira presidente di FIFA dia 26 di februari 2016, reemplasando e presidente anterior Sepp Blatter.  

  • Reino Hulandes ta topa siguiente contrincante otro siman dialuna

    Reino Hulandes ta topa siguiente contrincante otro siman dialuna

    LOS ANGELES – E proximo wega di Reino Hulandes den e World Baseball Classic (WBC) ta dialuna dia 20 di maart proximo. E oponente di e wega no ta conoci ainda, pero ta bira e ganador di pool F. E ganadornan ey ta wordo disputa e siman aki ainda. Y e otro ekipo di e pool E cu tambe a avansa pa Los Angeles, ta Japon, cu ta hunga un dia mas laat contra e number dos di pool F.

  • AVB lo sanciona esunnan responsabel pa agresion riba veld

    AVB lo sanciona esunnan responsabel pa agresion riba veld

    ORANJESTAD - Den fin di siman a tuma luga un wega di futbol den stadion Guillermo Trinidad den cual tabatin agresion, te cu referee mester a para e wega. E agresion tabata precisamente contra e referee y e linesman. Arubaanse Voetbal Bond, di acuerdo cu e reglanan stipula, a inicia un investigacion interno mesora pa yega na e berdad di locual a sosode riba veld y pa sanciona tur esunnan responsabel pa purba daña e bon nomber y imagen di e deporte Rey di Aruba y di mundo, esta futbol.

  • Reino Hulandes ta gana Cuba 14-1 y pasa pa proximo buelta

    Reino Hulandes ta gana Cuba 14-1 y pasa pa proximo buelta

    TOKYO – Reino Hulandes a sigura nan biahe pa Los Angeles cu nan victoria aplastante contra Cuba, y e hecho cu Japon a gana Israel cu score di 8-3 despues. E wega contra Cuba tabata un victoria aplastante, cu a pone cu e hungador Wladimir Balentien su hugadanan a haci’e e MVP pa e pool E. No menos cu 2 homerun Balentien a dal den e wega contra Cuba. Cu e victoria di Reino Hulandes y Japon, Reino Hulandes ta biaha pa Los Angeles pa hunga den e parti SemiFinal den Dodgers Stadium.

  • WBC: Reino Hulandes a kibra invicto di Israel, ganando 12-2!

    WBC: Reino Hulandes a kibra invicto di Israel, ganando 12-2!

    TOKIO – Cu e score di 12-2, e ekipo di Reino Hulandes a kibra e invicto di e ekipo di Isreal dialuna anochi (ora di Tokio) den e World Baseball Classic den e Tokyo Dome. Cu e ‘wipeout’ aki, tanto Reino Hulandes y Israel ta empata na e di dos lugar den e pool E, despues di Japon cu ta lidera e pool. Cuba ta na ultimo lugar cu un wega hunga y perdi. Un dia prome, Japon a gana Reino Hulandes cu e score di 8-6 den un wega hopi preta te na final. Den e wega di dialuna, a aplica e asina yama ‘eliminacion tempran’ cu ta e.o. si e ekipo ganado di mas di 10 careda den 7 inning, cu a pone cu e wega a caba na di 8 inning. Didi Gregorius a dal un doblete y homerun y a percura asina pa 5 careda. E proximo wega di Reino Hulandes ta contra Cuba diaranzon anochi 11’or.

  • Powered by SETAR