Ex-futbolista Ruud Gullit a bishita Prome Minister Eman

Ex-futbolista Ruud Gullit a bishita Prome Minister Eman

Posted on 11/10/2016 10:02 pm AST | Updated on 11/12/2016 1:39 pm AST

ORANJESTAD - Ex-futbolista Ruud Gullit a bishita Prome Minister Eman. E no ta riba veld ta scop bala mas, pero e ta keda un futbolista te den su higra. Futbol ta keda su pasion y semper cu e por, e ta duna un man pa yuda otronan, specialmente muchanan e atencion y guia riba e tereno deportivo aki. Actualmente Ruud Gullit ta na Aruba y a haci un bishita cerca Prome Minister Eman. E no a bin man bashi. Gullit a regala Eman un bala di futbol cu ela firma na e momento ey y tambe un T-shirt cu su firma y cu su nomber y number dies (10) riba dje. Na su turno Prome Minister a regala e astro un moneda conmemorativo di 40 aña di Himno y Bandera y 30 aña di Status Aparte. Ambos a aprecia e regalonan cu nan a ricibi. Gullit a recorda Eman cu na 1989 ela bishita Aruba pa prome bes hunto cu mas colega futbolista despues di e gana Euro Cup. E ta recorda e periodo ey como uno masha placentero cu a dura demasiado cortico. 

Na su salida Gullit a bisa cu e cu Eman no a echt traha plannan pa futuro, pero si cu lo ta un bon idea pa e bin bek pa yuda cu cierto proyectonan riba tereno di futbol.  Eman a bis'e di lo wak con regla esey.  Gullit:  "Mi lo mester reparti mi tempo di tal forma cu mi por bin mas biaha aki. Tur esaki tin que ver cu KNVB cu tin mas proyecto aki banda, entro otro na Surnam."Prome Minister Eman a papia tambe cu Gullit riba e veldnan artificial den e barionan, cu e futbolista ta haya un bon idea. "Mi ta haya e idea bon, pero mester bin mas di e veldnan aki pa e proyecto cu tin pa muchanan por hunga riba nan. Por sigui den mas bario. Haci deporte ta algo hopi importante", Gullit a enfatisa.   

Ruud Gullit ta na Aruba pa cinco dia pa duna cursonan. Ela splica cu ela papia di su experiencia cu e prome cursistanan. "Awe mi ta duna algun training cu otro cursista. Tur esaki ta bay via KNVB y ta hopi leuk pa haci." Na final Gullit a conta cu e no ta trahando como coach mas, pero mas bien ta traha na television pa tur loke tin que ver cu futbol. Tambe e ta duna charlanan y no mucho tempo pasa e tabata na Aruba pa duna un lectura pa PWC. "Mi ta haya esaki masha agradabel pa haci."

  • Reino Hulandes ta cay venci contra Puerto Rico den World Classic Baseball

    Reino Hulandes ta cay venci contra Puerto Rico den World Classic Baseball

    LOS ANGELES — Carlos Correa di Puerto Rico a score e ultimo careda den e di 11 inning y laga Reino Hulandes den tereno. Puerto Rico ta gana cu e score di 4-3 den un wega cu a laga hopi hende lanta te final (despues di mey anochi) for di momento cu e wega a cuminsa 9’or di anochi. Reino Hulandes a comete algun fayo garafal na comienso di e wega, costando nan por lo menos 4 careda. Algo cu e manager Meulens no tabata nada contento cu ne. Despues toch e team forma practicamente pa yiunan di Corsou y di Aruba, a logra pone pia abou y midi forsa sam sam cu Puerto Rico. E wega a yega e score di 3-3 y a keda asina te final, teniendo tur hende den suspenso. Riba rednan social por a nota e tension cu tabata biba riba e dos islanan Aruba y Corsou, cada bes ora cu e hungadornan tabata sea bati of fildea, creando momentonan di tension serio. Bon wega sigur ta loke mayoria a sigui bisa. Cu Reino Hulandes no a gana, no tabata nada pa hopi, y e reaccion tabata indica esey tambe. A gradici pa e bon ratonan cu a pasa, y cu a pone nos lubida tur problema cu nos tin akibanda. Pa algun ora Aruba y Corsou tabata uni den alegria, tension y mas, pa wak si ta yega final. Algo cu no a logra, pero cu ta cosnan cu por pasa.

  • Presidente di FIFA ta bishita Aruba otro luna

    Presidente di FIFA ta bishita Aruba otro luna

    ORANJESTAD – E presidente di e federacion internacional di futbol Fédération Internationale de Football Association (FIFA) esta Giovanni Vincenzo "Gianni" Infantino lo ta na Aruba na april. E lo hiba palabara durante e di 32 Congreso ordinario di CONCACAF (Confederation of North, Central American and Caribbean Association Football) cu ta tuma lugar riba nos isla dia 8 di april proximo. Infantino a bira presidente di FIFA dia 26 di februari 2016, reemplasando e presidente anterior Sepp Blatter.  

  • Reino Hulandes ta topa siguiente contrincante otro siman dialuna

    Reino Hulandes ta topa siguiente contrincante otro siman dialuna

    LOS ANGELES – E proximo wega di Reino Hulandes den e World Baseball Classic (WBC) ta dialuna dia 20 di maart proximo. E oponente di e wega no ta conoci ainda, pero ta bira e ganador di pool F. E ganadornan ey ta wordo disputa e siman aki ainda. Y e otro ekipo di e pool E cu tambe a avansa pa Los Angeles, ta Japon, cu ta hunga un dia mas laat contra e number dos di pool F.

  • AVB lo sanciona esunnan responsabel pa agresion riba veld

    AVB lo sanciona esunnan responsabel pa agresion riba veld

    ORANJESTAD - Den fin di siman a tuma luga un wega di futbol den stadion Guillermo Trinidad den cual tabatin agresion, te cu referee mester a para e wega. E agresion tabata precisamente contra e referee y e linesman. Arubaanse Voetbal Bond, di acuerdo cu e reglanan stipula, a inicia un investigacion interno mesora pa yega na e berdad di locual a sosode riba veld y pa sanciona tur esunnan responsabel pa purba daña e bon nomber y imagen di e deporte Rey di Aruba y di mundo, esta futbol.

  • Reino Hulandes ta gana Cuba 14-1 y pasa pa proximo buelta

    Reino Hulandes ta gana Cuba 14-1 y pasa pa proximo buelta

    TOKYO – Reino Hulandes a sigura nan biahe pa Los Angeles cu nan victoria aplastante contra Cuba, y e hecho cu Japon a gana Israel cu score di 8-3 despues. E wega contra Cuba tabata un victoria aplastante, cu a pone cu e hungador Wladimir Balentien su hugadanan a haci’e e MVP pa e pool E. No menos cu 2 homerun Balentien a dal den e wega contra Cuba. Cu e victoria di Reino Hulandes y Japon, Reino Hulandes ta biaha pa Los Angeles pa hunga den e parti SemiFinal den Dodgers Stadium.

  • WBC: Reino Hulandes a kibra invicto di Israel, ganando 12-2!

    WBC: Reino Hulandes a kibra invicto di Israel, ganando 12-2!

    TOKIO – Cu e score di 12-2, e ekipo di Reino Hulandes a kibra e invicto di e ekipo di Isreal dialuna anochi (ora di Tokio) den e World Baseball Classic den e Tokyo Dome. Cu e ‘wipeout’ aki, tanto Reino Hulandes y Israel ta empata na e di dos lugar den e pool E, despues di Japon cu ta lidera e pool. Cuba ta na ultimo lugar cu un wega hunga y perdi. Un dia prome, Japon a gana Reino Hulandes cu e score di 8-6 den un wega hopi preta te na final. Den e wega di dialuna, a aplica e asina yama ‘eliminacion tempran’ cu ta e.o. si e ekipo ganado di mas di 10 careda den 7 inning, cu a pone cu e wega a caba na di 8 inning. Didi Gregorius a dal un doblete y homerun y a percura asina pa 5 careda. E proximo wega di Reino Hulandes ta contra Cuba diaranzon anochi 11’or.

  • Powered by SETAR