UN EVALUACION DI NOS TURISMO; E CRISIS GRANDI DEN NOS TURISMO

UN EVALUACION DI NOS TURISMO; E CRISIS GRANDI DEN NOS TURISMO

Posted on 09/10/2016 11:25 am AST | Updated on 09/10/2016 7:02 pm AST

UN VUELO HISTORICO

Diarason, dia 31 di augustus 2016, despues di 55 aña, e prome vuelo directo comercial, esta vuelo 387 di JetBlue, procedente for di Fort Lauderdale na Florida, Merca, a baha na Santa Marta, Cuba.

Por cierto un vuelo historico cu destino Cuba, e isla cu te na aña 1959, cu inicio di e revolucion di Fidel Castro, tabata pa e Americanonan e destino turistico mas popular den Caribe.

Na aña 1962 esaki a yega na su fin ora cu e relacionnan diplomatico entre Merca y Cuba a wordo kibra pa motibo cu Cuba a afilia su mes na e bloke comunista Ruso.

Nos por corda cu ya for di e prome añanan di turismo, tempo cu a construi Aruba Caribbean Hotel, Sheraton Hotel y Holiday Inn, aki na Aruba nos por a scucha cu, na momento cu Cuba lo a bay habri su fronteranan atrobe, turismo pa Aruba lo a caba, pasobra Cuba lo ta hopi mas bunita; tabata ser bisa cu hasta e playanan y e calidad di e awa di laman di Cuba tabata mucho mas bunita y mihor cu aki na Aruba; e hendenan di Cuba lo tabata mas amabel cu nos propio hendenan;  tabatin hopi mas cos di haci na Cuba, tabatin mas gozo den un paisahe hopi grandi, bunita y aventuroso, yen di cultura y bunitesa natural.

Aki na Aruba nos a keda comodo, sin preocupa nos mes nunca pa e menaza ey, pasobra nos a kere cu Cuba nunca mas lo a habri su portanan! 

Wel, den esaki Aruba a ekiboca su mes grandemente! 

Awor ta asina leu: pronto lo sali DIARIAMENTE no menos cu 110 vuelo for di 10 ciudad na Merca (Atlanta, Houston, Los Angeles, Fort Lauderdale, Miami, Orlando, Charlotte, Newark, New Jersey, New York) pa 10 ciudad na Cuba, entre cua 20 vuelo diario pa Havana. 

E vuelonan lo ta cu entre otro American Airlines, Delta, JetBlue, Southwest y United Airlines. 

Bo por imaginabo un vuelo di un ora for di Miami pa menos cu 200 dollar??

110  VUELO  DIARIO!!

Bo a lesa bon! Diariamente 110 vuelo for di diferente ciudad na Merca rumbo Cuba! Centenares di miles di viaheronan Mericano lo bay bishita Cuba, y di berdad bo ta kere cu esaki lo no tin su efecto riba turismo di Merca pa Aruba?

No laga ningun hende, ni minister di turismo Otmar Oduber, hinca esey den bo cabes. Ta sea un arogancia “ten top”, of un ignorancia di e materia, cu por haci cu e minister por declara cu islanan manera Santo Domingo y Jamaica, y hasta Mexico, lo sufri cu e apertura di Cuba, pero Aruba si no, pa motibo di e supuesto nivel halto di calidad na Aruba. Ta di cua nivel halto di calidad e ta papia! Con, unda, kende, ki ora!!!! Nos tur sa cu e calidad di Aruba ta yegando na su punto zero! Esta si e no a yega na e punto ey caba!!

Wak por ehempel nos playanan; esakinan ta keda bira mas chicito; e tamaño di e playa dilanti Holiday Inn ya caba ta menos cu mitar di locual e tabata antes; e laman dilanti di e playa di Palm Beach ta gris, troebel y vies; e fondo di e playa aki ta tapa cu un lodo vies cu ta parce desperdicio di riool; turistanan no ta sinti nan mes sigur of safe mas, y hasta riba e beach dilanti di hotel Ritz-Carlton turistanan ta wordo atraca; e calidad di restaurantnan riba Aruba en general ta di un nivel mucho malo y nan nivel di prijs ta demasiado halto;  gozo, ambiente bon y social, y actividadnan divertido te awe ainda ta hopi minimo; e amabilidad na Aruba ta bayendo atras hopi rapido, y casi no a resta nada mas di e (sentido pa) hospitalidad Arubano di antes; en general e nivel di prijsnan riba Aruba y e costonan di hotel, restaurant, bebida, watersports y tours, ta barbaramente halto compara cu hopi otro destino den Caribe.

 

E CALIDAD NA CUBA

Con diferente tur esaki ta na Cuba ora nos haci un comparacion!

E hopi playanan na Cuba berdad ta consisti di santo berdad “pristine”, blanco y limpi; e awa di lama ta cla y di un color blou/berde hopi bunita, e amabilidad di e poblacion ta enorme, e calidad di e restaurantnan ta espectacular, e nivel di prijs ta tremendo, bunitesa di naturalesa, actividadnan, cultura y musica ta asombroso y fascinante, accesibilidad ta facil, cumbiniente y barata, …pues pakiko e Mericanonan lo kier sigui bini Aruba?

Na lugar di prepara nos mes pa e fracaso y ruina total cu ta acercando, e minister di turismo ta perde su tempo culpando AHATA pa e bahada continuo den turismo, pasobra nan lo ta bendiendo demasiado paketenan all-inclusive na turistanan, comosifuera esey lo ta e motibo pakico e cantidad di turista cu ta bishita Aruba mensualmente, ta keda baha. 

UN PRONOSTICO Y UN ADVERTENCIA

Den e lunanan nos dilanti turismo pa Aruba ta core riesgo di cay den otro totalmente.

E pleitonan entre partidonan politico y asociacionnan di interes manera AHATA, ta crece te yega na un punto cu candela ta spart, y cu tur partido ta yena su dia na culpa y reprocha e otro, y busca (mas) pleito. 

Ningun hende a prepara su mes riba e crisis cu e re-apertura di Cuba pa e turistanan Mericano, ta bay causa Aruba.

E gobierno no a mustra ningun vision den esaki, y no a produci ningun mision pa enfrenta e situacion aki.

E gobierno no tabatin ni e mira of e sabiduria pa adapta e presupuesto di Pais Aruba pa aña 2017 na e golpi cu turismo lo bay sufri.

Wel, t’asina cu sinta haci nada ta mucho mas facil, y pa esey bo no tin mester di diplomanan di preparacion, ni di capacidad, ni di competencia!

 

Remigio A.R. Wever

Ex – director ATA

Savaneta, september 10, 2016

  • Powered by SETAR