- Un dama di 33 aña a bira e di 5 morto di trafico pa 2024 pa Aruba
- Parlamento a ‘schedule’ tratamento di ley matrimonio mesun sexo pa otro siman diaranson!
- Elmar: Problema cu turbina di gas a causa brown out diabierna anochi
- Corte: Ta trata apelacionan di caso Avestruz entrante 13 di mei di proximo
- VIDEO: Antersijn ta conta di highlight di su carera profesional como keeper
Matta: CITGO deal ta ilegal pasobra e no ta aproba pa Asamblea Nacional
CARACAS - Gobierno di Venezuela a firma convenio cu Aruba sin consulta cu Asamblea Nacional. Vice presidente di comision di energia y petrolio di e Asamblea Nacional Elías Matta a critica diadomingo segun e corant Diario de Caracas. E ta referi na e convenio firma pa medio di e compania CITGO. Segun Matta, Asamblea Nacional no tin ningun informacion riba esaki."E informacion no a yega cerca nos y nos no conoce e condicion den cual e refineria ta" Matta a bisa. "Venezuela ta pretende di uza e refineria aki como un mehorador di crudo pa eleva e costo di bari pa medio di e mehorado aki".
MESTER A INVERTI NA VENEZUELA
E inversion di aproximadamente 500 pa 600 miyon dollars cu ta bay inverti den Aruba, mester a wordo inverti na Venezuela."Mester a inverti e placa den e pais (Venezuela) pa eleva e capacidad di e mehorado di Venezuela cu ta den e faha petrolifera di Orinoco. Nos no ta compronde pakico e tipo di operacionnan aki di presidente Maduro, ta insisti di wordo haci tras di lomba di Asamblea Nacional, mientras cu segun articulo 150 di e constitucion ta bisa cu tur contracto di interes nacional cu pais stranhero mester wordo aproba pa AN". "Ainda no tin ningun informacion riba e acuerdo aki y por lo tanto e ta uno ilegal, pasobra e no a cumpli cu establecimento di e constitucion di republica bolivariana di Venezuela".
REUNION PA TRATA E DEAL
Segun Matta, e loke cu kier logra na Aruba por a wordo logra na Venezuela tambe. A mustra tambe cu ta spera e proximo reunion di e comision di energia y petrolio pa presenta e tema, habri un investigacion y exigi cu nan tin cu demonstra cu na Aruba ta mes viable inverti, cu na Venezuela. FOTO CORTESIA DIARIO DE CARACAS.
Gobernador di Los Angeles cu critica riba actuacion laat di polis contra demonstracionan
LOS ANGELES – Gobernador di estado Mericano di California a critica e reacciona laat di polis riba un confrontacion entre demostrantenan rival riba University of California (UCLA). Un grupo pro Israel a invadi un campo di tent di demonstrantenan pro Palestina riba e campus di e universidad. Polis lo a reacciona apenas algun ora despues, cual e gobernador Gavin Newsom a yama un reaccion ‘limita y laat’ y inaceptabel di parti di polis. Varios otro ciudad tambe ta tin studiantenan universitario protestando awe riba e tema di e guera na Gaza actualmente. .
Petro: Colombia a kibra relacion diplomatico cu Israel
BOGOTA – Presidente di Colombia Gustavo Petro a kibra relacion diplomatico cu Israel entrante awe 2 di mei. Esaki e la anuncia un dia prome durante un discurso. E presidente ta contra e accionan di Israel na Gaza, Y ta sostene esnan di Palestina.
Mericano sentencia pa declaracion falso di bancarota despues di a bay un vacantie na Aruba
HUNTINGTON, W.Va. – John Christopher Spence, 67, a keda sentencia ayera na Merca na 5 aña di prueba federal, incluyendo 6 luna di aresto na cas cu banchi di control GPS, y multa di 5 mil dollar. Tur esaki pa a haci declaracion falso di bancarota. Spence a paga pasashi pa e.o. un vacacion pa Aruba, a disfruta na Aruba, y ora a bolbe a haci un declaracion falso di ta bancarota. E la admiti cu e la haci compra di e.o. e pasashi pa Aruba, asabiendas cu e lo a declara bancarota despues. E la haci esaki cu intento pa defrauda su creditornan pa medio di e proceso di bancarota. Algo cu na Merca ta castigabel pa ley.
Union Europeo preocupa con Facebook y Instagram por influencia e proximo eleccion Europeo
BRUSELAS – Union Europeo ta preocupa cu e tarea di Facebook y Instagram pa eleccion di Parlamento Europeo proximamente. E comision Europeo tin tur atencion riba e gigante di red social META, cas di Facebook. Tin preocupacion cu e medidanan cu e gigante META a tuma rond di e eleccion Europeo, no ta suficiente. E urgencia pa e investigacion ta grandi, ya cu ta aki un luna tin eleccion caba. E miedo ta entre otro e plamamento di desinformacion Ruso via propaganda, y e opresion di desinformacion politico via di propaganda, y e forma con pa monitoria loke ta aparece riba Facebook y Instagram. Meta no a reacciona ainda riba esaki.
Premier di Escocia ta retira despues di caida di gobierno di coalicion
EDIMBURGO – E premier di Escocia, Humza Yousaf ta baha di su funcion. Su posicion tabata tambalia caba despeus cu su partido SNP a termina e relacion cu e partido di coalicion. E kier a sigui cu un gobierno di minoria pero e no a haya sosten di oposicion. Pasobra tabatin intencion di vota riba un mocion di desconfiansa, e la dicidi di tene honor na su mes y retira.
Premier Spaño a dicidi di keda den funcion aunke husticia ta sospecha casa di corupcion
MADRID – Prome minister di Spaña Pedro Sanchez no ta retira finalmente di su funcion, no obstante cu husticia Spaño ta acusa su casa di corupcion. Den un discurso televise, e la confirma su decision. Siman pasa e la tuma un siman liber pa dicidi kico e tin cu haci, ora cu husticia a anuncia un investigacion contra su casa. Un grupo extremo derechista di accion Manos Limpias a denuncia e casa, pa cual a inicia un investigacion. E ta sigura cu su casa ta inocemente. E grupo ta acusa e casa di a participa den regla 475 miyon euro na sosten di gobierno pa Air Europe, a cambio di patronicio. Huez awor ta bay investiga e caso.
Follow NoticiaCla
