Muyale riba e relacion Tiara Air/Avior Airlines y e situacion financiero

Muyale riba e relacion Tiara Air/Avior Airlines y e situacion financiero

Posted on 04/11/2016 7:10 pm AST | Updated on 04/11/2016 8:40 pm AST

ORANJESTAD - Tiara Air no a cambia di doño, y ainda ta recuperando e parti financiero pa haci nan solido atrobe. Esey ta algun di e asuntonan cu e CEO Alejandro Muyale a discuti dialuna mainta cu NoticiaCla.com durante un encuentro na Corsou. E hecho cu Tiara Airlines a 'reinicia' su buelonan bek dialuna 12 di april, ta nifica un otro capitulo pa e aerolinea cu 10 aña pasa tabata e orguyo di Aruba como e prome aerolinea despues di Air Aruba cu por a yama su mes 'e aeroliña nacional' di nos isla. Na caminda, e compania a haya su mes den problema serio financiero cu a resulta finalmente na paro di su operacion na 2013. Muyale ta yama esaki e 'tempestad cu e compania a pasa aden'. Debe gigantesco na su creditornan, trahadonan y otro instancia a pone cu nan a termina den corte pa por a regla tur nan asuntonan. 

AVIOR AIRLINES A TUMA TIARA AIR OVER?

Awe e compania ta asina leu cu nan por a cuminsa bula atrobe. Pero cu e 'reinicio' di e buelonan, a surgi varios pregunta cu a keda circula. Entre nan, e relacion cu Avior Airlines unda cu tabatin informacion cu e compania conoci Venezolano, lo a cumpra mayoria accion di Tiara Air (a haci mencion di 80%) y cu como tal e ta un compania Venezolano y no uno local mas. Muyale ta desmenti esey y ta papia simplemente di un 'aliansa' entre e dos aerolineanan unda cu Tiara cu su un Short 360, lo haya ayudo di Avior cu su mas di 10 avionnan cu lo asisti e aerolinea. "Tiara ta riba su mes, Tiara tin su AOC (Aircraft Operating Certificate), Avior tin su AOC. Nos a haci un aliansa caminda cu nan ta support Tiara" Muyale a sigura NoticiaCla.com. Como tal e ta desmenti tambe cu Avior a cumpra mayoria di e shares pa bira doño di e compania. "Negativo. No" Muyale a sigui bisa. 

UNDA E AVION 737 A BAY?

Un asunto cu tambe ta comenta, ta kico a sosode cu e avion 737 cu e compania tabata bula cu ne. Diripiente e no t'ey mas y tin te hasta informacion cu e avion awor ta wordo uza na Mexico. Muyale a confirma cu enberdad nan a 'laga e avion bay'. "Nos a opta pa entreguele y den e mesun business plan nobo ta poni cu ta bay bin otro 737, pero un modelo un tiki mas avansa cu ta e modelo 400, mas stul, mas capacidad. Nos ta premira cu esaki lo bin pa juli" Muyale a sigura e portal aki. 

SITUACION FINANCIERO  TIARA AIR

E situacion financiero ainda ta un reto pa Tiara Air, pero awor cu tin un acuerdo den corte, e compania por traha mas trankilo riba e recuperacion financiero. Aña pasa november mayoria di e creditornan a vota na fabor di e plan di rescate y cu esey ta trahando pa reforsa e compania financieramente, door di entre otro habri rutanan cu ta genera bon entrada y pa asina cumpli cu e acuerdo. Manera cu a keda anuncia recientemente fin di e luna aki e trahadonan cu falta pa haya placa ainda, lo mester wordo paga. "Si nos no ricibi ningun placa durante 2016, nos lo mester cuminsa paga nan (creditornan) otro aña esta 2017. Pero e trahadonan nos ta paga nan fin di luna di april".  Muyale a confirma cu un di e motibonan cu a cuminsa bula awor tambe, ta pa genera e placa necesario pa por paga e trahadonan fin di e luna aki, pero tambe via inversion cu nan ta haci. 

RESULTADO INVESTIGACION INCIDENTE RECIEN

Por corda tambe cu recientemente tabatin un incidente ora cu un di e avionnan cu nan tabata entrena cu ne a haya un problema tecnico ora cu e avion a haya un 'flat tire'. A puntra Muyale con ta para cu e investigacion aki. "E investigacion ta cla, e ta cera, y nos ta considere como un incidente. No tabatin nada grave cu a pasa. No tabatin ningun malfuncionamento cu e avion. Ora cu e incidente a sosode segun Muyale, a bay analisa kico a sosode, y e resultado tabata cu nada grave no a pasa."

ITINERARIO DIFERENTE

Mientras cu pa hopi, e comienso tabata uno poco straño ora cu a cuminsa dialuna cu e ruta di Corsou en bes di e ruta mas popular pa Tiara cu ta pa sea Colombia of Venezuela, Muyale a mustra cu alcontrario. E prome ruta cu nan a bula 10 aña pasa tambe tabata Corsou. Dia 2 di mei proximo ta habri e ruta di Punto Fijo atrobe. Esey no ta kita afo cu e itinerario awor lo ta mas conservativo cu ta nifica basicamente buelonan tur dia. Pa por opera mas avion, lo amplia e cantidad di personal 'gradualmente'. "Esnan cu ta bula shorts awe lo pasa pa e Fokker 50, y unda cu habri mas ruta, lo tuma mas hende den servicio".

  • Powered by SETAR